01 Sep 2023, 22:37
މިއަދު ވޯޓެއް ނެގިޔަސް، ރިޔާސީ އިންތިޚާބު ކާމިޔާބު ކުރައްވާނެ ކަމަށް ރައީސް އިބްރާހިމް މުހައްމަދު ޞާލިޙް މިރޭ ވިދާޅުވެއްޖެއެވެ.
މި މަހު ނުވައެއްގައި އޮންނަ ރިޔާސީ އިންތިޚާބުގެ ކެމްޕޭނަށް މިރޭ މާލޭގައި ބޭއްވި އުފާވެރި މާލެ ކެމްޕޭން ޖަލްސާގައި ވާހަކަފުޅު ދައްކަވަމުން އެ މަނިކުފާނު ވިދާޅުވީ، މި އިންތިޚާބު ކާމިޔާބު ކުރެވޭނެ ކަމާ މެދު އެއްވެސް ޝައްކެއް ނެތް ކަމަށާއި މިރޭ ވޯޓެއް ނެގިޔަސް އިންތިޚާބު ކާމިޔާބު ކުރައްވާނެ ކަމަށެވެ. އަދި، އިންތިޚާބަށް ބާކީ މިއޮތް ކޮންމެ ދުވަހެއްގެ ކޮންމެ މިނެޓަކީ އެ މަނިކުފާނަށް އިތުރުވާނެ ތާއީދު ކަމަށް އެ މަނިކުފާނު ވިދާޅުވިއެވެ.
"އިންތިޚާބު މިހާރު މިއޮތީ ނިމިފައި. ނިމިފައި. ނިމިފައި،" ރައީސް މިރޭ ވާހަކަފުޅު ފެއްޓެވިއެވެ.
"މިރޭ ވޯޓު ގުނިޔަސް އިރާދަކުރެއްވިއްޔާ އަޅުގަނޑުމެން މޮޅުވާނެ. މާދަމާ ވޯޓު ގުނައިފިއްޔާ އެއަށް ވުރެ ބޮޑުތަނުން މޮޅުވާނެ. ނުވައެއް ސެޕްޓެމްބަރުގައި ގުނައިފިއްޔާ އެއަށް ވުރެ ބޮޑުތަނުން އަޅުގަނޑުމެން މޮޅުވާނެ. މި ހިނގާ ކޮންމެ ސިކުންތަކާއި ކޮންމެ މިނެޓެއް ދިވެހިންނާ މި ގާތް ކޮށްދެނީ، އުފާވެރި އަމާން ރާއްޖެ،"
ދެވަނަ ދައުރަކަށް ނުކުންނަވައިގެން ރައީސް ކުރައްވާ ކެމްޕޭންގައި އެ މަނިކުފާނު ތަކުރާރުކޮށް ވިދާޅުވަމުން ގެންދަވަނީ މި އިންތިޚާބު ވެސް އެ މަނިކުފާނު ކާމިޔާބު ކުރައްވާނީ އެއްބުރުން ކަމަށެވެ.
އެ މަނިކުފާނު ވިދާޅުވީ މިދިޔަ ދައުރުގައި އޮތް އަނިޔާވެރިކަމަށް އެނބުރި ދާން ދިވެހިރައްޔިތުން ބޭނުންނުވާ ކަމަށެވެ. އެގޮތުން، މިދިޔަ ޕީޕީއެމްގެ ސަރުކާރުގައި އެ މަނިކުފާނު ހައްޔަރުކުރި އިރު، ޖަލުގައި ވެސް "ސަރުކާރެއް ހިންގޭހާ މީހުން" ތިއްބެވި ކަމަށް ރައީސް ވިދާޅުވިއެވެ.
"ޖަލުގައި ވެސް އޮތް ވަކި ސަރުކާރެއް ހިންގޭހާ މީހުން،" އެ މަނިކުފާނު ވިދާޅުވިއެވެ.
ރައީސް ތަކުރާރުކުރެއްވީ މި އަހަރު އެއްބުރުން ނިންމުން ނޫން ގޮތެއް ނެތް ކަމެވެ. އެ މަނިކުފާނު ވިދާޅުވީ، ދިވެހިން ތިބީ ވަކި ގޮތެއް ނިންމައިގެން ކަމަށެވެ. އެ ގޮތަކީ އެއްބުރުން އެ މަނިކުފާނަށް ދެވަނަ ދައުރެއް ދެއްވުން ކަމަށް އެ މަނިކުފާނު ވިދާޅުވިއެވެ.
"ރައްޔިތުން ތިބީ ވަކި ގޮތަކަށް ނިންމައިގެން. އެއީ މިރޭ ތިބޭފުޅުން ވެސް ތިއްބެވި ގޮތް. އެއް ބުރުން ނޫން ގޮތެއް ނެތް،" ރައީސް ވިދާޅުވިއެވެ.
މިދިޔަ ރިޔާސީ އިންތިޚާބު ވެސް އެ މަނިކުފާނު ކާމިޔާބު ކުރެއްވީ އެއްބުރުންނެވެ. އެކަމަކު، އެ އިންތިޚާބުގައި އެ މަނިކުފާނާއި އޭރުގެ ރައީސް އަބްދުﷲ ޔާމީން އަބްދުލްގައްޔޫމް ނޫން އެހެން ބޭފުޅެއް ވާދަކުރައްވައިފައެއް ނުވެއެވެ. އެ އިންތިޚާބުގައި ޕީޕީއެމް ފިޔަވާ އެހެން ޕާޓީތަކުން ވަނީ ރައީސް ޞާލިޙަށް ތާއީދުކޮށްފައެވެ.