01 Sep 2023, 20:48
ރާއްޖޭގެ ސިއްހީ ދާއިރާގައި މަސައްކަތްކުރާ މީހުން ތަމްރީނު ކުރުމަށް 1973ވަނަ އަހަރު ސަރުކާރުން "އެލައިޑް ހެލްތު ސާވިސަސް ޓްރެއިނިން ސެންޓަރު"ގެ ނަމުގައި މަރުކަޒެއް ގާއިމުކުރިއެވެ.
ކުޑަކުޑަ އެ އިންސްޓިޓިއުޓަކީ މިއަދުގެ ދިވެހިރާއްޖޭގެ ގައުމީ ޔުނިވާސިޓީގެ ފެށުމެވެ. ފެންވަރު ރަނގަޅު، ތައުލީމީ ދިވެހިން ބިނާކޮށް، ދިވެހިންގެ ޚިދުމަތަށް ނެރުމަށް ތަމްރީނުކުރުމުގެ ފެށުމަކީ އެއީއެވެ.
އޭގެ ބަރާބަރު 25 އަހަރު ފަހުން، މޯލްޑިވްސް ކޮލެޖް އޮފް ހަޔާ އެޑިއުކޭޝަން އުފެއްދި އިރު، އެކި ދާއިރާތަކުން މީހުން ބިނާކުރުމުގައި ސަރުކާރުގެ ހަތް އިންސްޓްޓިޓިއުޓެއް އޮތެވެ. އެއީ؛
އިންސްޓިޓިއުޓް އޮފް ހެލްތު ސައެންސަސް
- މޯލްޑިވްސް އިންސްޓިޓިއުޓް އޮފް ޓެކްނިކަލް އެޑިއުކޭޝަން
- މުދައްރިސުންގެ ތައުލީމީ މަރުކަޒު
- އިންސްޓިޓިއުޓް އޮފް ހޮޓެލް އެންޑް ކޭޓަރިން ސާވިސް
- އިންސްޓިޓިއުޓް އޮފް މެނޭޖްމެންޓް އެންޑް އެޑްމިނިސްޓްރޭޝަން
- މެރިޓައިމް ޓްރެއިނިން ސެންޓަރު
- ޓާޝަރީ އިންސްޓިޓިއުޓް އޮފް އޯޕަން ލާނިން
އެމްސީއެޗްއީ އުފެއްދުމާ އެކު މި ހަތް މަރުކަޒު އެއް ފުރާޅެއްގެ ދަށަށް އައެވެ. އަދި, ކުރިއަށްވުރެ ރަނގަޅަށް އިންތިޒާމުވެގެން، ހިންގާ ކޯސްތަކާއި، ޕްރޮގުރާމުތައް ތައާރަފުވާން ފެށިއެވެ.
ގައުމަށް ބޭނުންވާ މީހުން ބިނާކުރުމުގެ މަސައްކަތް އިތުރަށް ހަރުދަނާވިއެވެ.
ސެޕްޓެމްބަރ 2، 2018: ރާއްޖޭގެ ގައުމީން ޔުނިވާސިޓީ (އެމްއެންޔޫ)ގެ ދަރިވަރުންްގެ ދަސްވެނިވުން: އެމްއެންޔޫގެ ދަސްވެނިވުން ބާއްވާފައި ވަނީ ސިނަމާލެ ބުރިޖުގައި، މި ދަސްވެނިވުމުގައި 781 ދަރިވަރުން ވަނީ ދަސްވެނިވިފައި -- ސަން ފޮޓޯ/ ފަޔާޒު މޫސާ
ނަތީޖައަކީ 13 އަހަރުގެ ތެރޭގައި އެތަން އިތުރަށް ފުޅާވެ، ޔުނިވާސިޓީއެއްގެ ދަރަޖައިގައި ހިންގުމަށް ފައްކާވުމެވެ. ގާނޫނާއި، ސިޔާސަތަށް ގެނައި ބަދަލުތަކަކާ އެކު، ދިވެހިރާއްޖޭގެ ގައުމީ ޔުނިވާސިޓީ އުފެއްދީ 2011 ވަނަ އަހަރުގެ ތެރޭގައެވެ.
"ދިވެހިރާއްޖޭގެ ޤައުމީ ޔުނިވަރސިޓީއަކީ، ދިވެހިރާއްޖޭގައި ޢިލްމުގެ ނޫރު ފަތުރާ އަލިގަދަ ދަންމަރަކަށް ހެދުމަށް ޢަޒުމް ކަނޑައެޅުން ވަރަށް މުހިންމު،" އެ ޔުނިވާސިޓީ ހުޅުވި ދުވަހު، އޭރުގެ ނާއިބު ރައީސް ޑރ. މުހައްމަދު ވަހީދު ހަސަން މަނިކު ވިދާޅުވިއެވެ.
އެ ވިދާޅުވި އަޒުމާ އެއްގޮތަށް އެ ޔުނިވާސިޓީން ވަނީ ފާއިތުވި 12 އަހަރު ދުވަސްތެރޭ ގިނަ މަސައްކަތްތަކެއްކޮށް، ބޮޑެތި ކާމިޔާބީތަކެއް ހޯދާފައެވެ.
މިހާރު އެ ޔުނިވާސިޓީގެ ކެމްޕަސްތައް ރާއްޖޭގެ ހަތަރު ސަރަހައްދެއްގައި އެބަހުއްޓެވެ. އޭގެ އިތުރުން 10 އައުޓްރީޗް ސެންޓަރެއް ގާއިމުކޮށްފައިވެއެވެ. އެތަންތަނުން 9000އަށްވުރެ ގިނަ ދަރިވަރުން މިހާރު ވެސް ތައުލީމު ހާސިލްކުރަމުން އެބަދެއެވެ.
ދިވެހިރާއްޖޭގެ ގައުމީ ޔުނިވާސިޓީ ---- ސަން ފޮޓޯ/ އިބްރާހިމް އިފާޒް
ރާއްޖެއަށް ބޭނުންވާ މުހިއްމު ދާއިރާތަކުގެ ދިރާސާކޮށް، އިލްމީ މަސައްކަތް ހިނގަހިނގާ ހުންނާނެ 11 ފެކަލްޓީއެއް އެބަހުއްޓެވެ. ސެޓްފިކެޓް ލެވެލް އިން ފެށިގެން، ޕީއެޗްޑީއާ ހަމައަށް އެބަ ކިޔަވައިދެއެވެ. ތައުލީމާއި، ތަމްރީނާއި، ތަޖުރިބާ ލިބިގެން ތިބި 690އަށް ވުރެ ގިނަ މުވައްޒަފުން ހަރަކާތްތެރިވެއެވެ.
ވޭތުވެދިޔަ 50 އަހަރުގެ ތެރޭގައި އެ ޔުނިވާސިޓީން ވަނީ 70،000އަށް ވުރެ ގިނަ ދަރިވަރުން މަސައްކަތުގެ މައިދާނަށް ނެރެފައެވެ. އޭގެ ތެރޭގައި ސިއްހީ މަސައްކަތްތެެރިންނާއި، މުދައްރިސުންނާއި، ވަކީލުންނާއި، ޓެކްނީޝަނުންނާއި، އިންޖިނޭރުން އަދި ސައިންސްވެރިން ވެސް ހިމެނެއެވެ. މުޅި ރާއްޖެ ބިނާ ކުރުމުގައި މިއަދު ވެސް އެ މީހުންގެ ހިއްސާ ބޮޑެވެ.
"އެމްއެންޔޫއިން ލިބުނު ތައުލީމާއި، އިރުޝާދުތައް، އަޅުގަނޑުގެ މަސައްކަތުގައި ކުރިއަށް ދިއުމަށް އަދި، އަޅުގަނޑުގެ ދަރިވަރުންގެ ހަޔާތަށް ހެޔޮ ބަދަލެއް ގެނެސްދިނުމަށް ތައްޔާރުކޮށްދިން" އެމްއެންޔޫއިން ތަމްރީނު ވުމަށް ފަހު، މުދައްރިސެއްގެ ގޮތުގައި މަސައްކަތުގެ ހަޔާތް ހޭދަ ކުރެއްވި، މިހާރުގެ ފަސްޓް ލޭޓީ ފަޒްނާ އަހްމަދު ވިދާޅުވިއެވެ.
ފާއިތުވި 50 އަހަރު އެ ޔުނިވާސިޓީން ހިފެހެއްޓި އަގުތަކާއި، އުސޫލުތަކާއެކު، ތަނުގެ ކޮންމެ ދަރިވަރަކަށް ދޭ ޔަގީން ކަމަކީ އެފަދަ ތަޖުރިބާއެއް ދިނުމެވެ.
އެ ޔަގީންކަމާއި، ގައުމީ ޔުނިވާސިޓީގެ ޚިދުމަތްތެރި ތާރީޚަށްޓަކައި، ކޮންމެ ދިވެއްސަކު ވެސް މި ރަންޔޫބީލުގެ މުނާސަބަތުގައި ފަޚުރުވެރިވުން ހައްގެވެ.