24 Aug 2023, 15:17
ދުނިޔޭގެ އެންމެ މުއްސަނދި މީހުންގެ ތެރޭގައި ހިމެނޭ އީލޯން މަސްކުގެ ސްޓާލިންކު ޕްރޮޖެކްޓުން ރާއްޖެއަށް ޚިދުމަތް ދިނުމަށް ހުއްދަ ދިނުމަށް ނިންމައިފިއެވެ.
މިއަދު ހަވީރު އެންއައިސީޓީގައި އެކަމާ ގުޅޭ ހާއްސަ ރަސްމިއްޔާތެއް ބޭއްވުމަށް ވަނީ ހަމަޖެހިފައެވެ.
އެ ރަސްމިއްޔާތު މިއަދަށް ތާވަލުކޮށްފައިވާ އިރު، އެ ކުންފުންޏަށް ހުއްދަ ދިނުމާ ބެހޭ މަޝްވަރާތައް ކުރިއަށް ދާތާ ދުވަސްކޮޅެެއް ވަނީ ވެފައެވެ. އެގޮތުން، މިދިޔަ އަހަރުގެ ފެބްރުއަރީ މަހު އެކަމާ ގުޅޭ މަޝްވަރާތައް ކުރިކަން މިނިސްޓްރީން ހާމަކޮށްފައިވެއެވެ.
ރާއްޖެއިން ސްޓާލިންކަށް ހުއްދަ ދިނުމުގެ ސަބަބުން އެހެނިހެން އައިއެސްޕީތަކުގެ ފައިދާއަށް އަސަރުނުކުރާނެ ކަމަށް އެ ކުންފުނިތަކުން ވަނީ ބުނެފައެވެ.
އުރީދޫގެ 2022ވަނަ އަހަރުގެ އަހަރީ އާންމު ޖަލްސާގައި ވާހަކަދައްކަވަމުން އެ ކުންފުނީގެ ޗެއާޕާސަން ފާތިމާ ސުލްތާން އަލް ކުވައިރީ ވިދާޅުވީ އުރީދޫގެ ފައިދާ އެއްވަރެއްގައި ހިފެހެއްޓުމަށްޓަކައި ފިޔަވަޅުތަކެއް އަޅާފައިވާ ކަމަށެވެ.
ސްޓާލިންކުން އިންޓަނެޓު ޚިދުމަތް ދެނީ 1700 އަށްވުރެ ގިނަ ސެޓެލައިޓު ދުނިޔޭގެ ތިރީ އޯބިޓަށް ފޮނުވައިގެންނެވެ. އެ ޚިދުމަތް މިހާރު ދުނިޔޭގެ ހުރިހާ ބައްރަކަށް ވަނީ ފުޅާވެފައެވެ. ރާއްޖޭގައި މި ޚިދުމަތް ފެށުމާއެކު ވާނީ ދެކުނު އޭޝިއާ ސަރަހައްދުން އެންމެ ފުރަތަމަ ޚިދުމަތް ލިބޭ ގައުމަށެވެ.