އުސްފަސްގަނޑުގައި މިރޭ ފެށި ޖަލްސާ ރައީސް މުހައްމަދު ނަޝީދުގެ ވާހަކަފުޅަށްފަހު، މުޒާހަރާ އިންތިޒާމް ކުރި މީހުންގެ އަޑު އުފުލުމާއެކު ސީދާ ހަރަކާތައް އެމްޑީޕީ ނުކުތީ މިރޭ 9:45 އެހާކަންހާއިރު އެވެ.

މާލޭގެ މަގުތަކުން ގޮސް މުޒާހަރާގެ ބައިވެރިން މަޑު ކުރީ އެމްއެމްއޭ ސަރަހައްދަށެވެ. އަދި ބައެއް މީހުން ރައީސުލް ޖުމްހޫރިއްޔާ ޑރ. މުހައްމަދު ވަހީދު ހަސަން މަނިކު ދިރިއުޅުއްވާ ހިލާލީގެ ކައިރިއަށް ވެސް އެއްވި އެވެ. ނަމަވެސް އެ ސަރަހައްދުގައި މާބޮޑު ހަމަނުޖެހުމެއް ނުހިނގަ އެވެ.

އެމްޑީޕީ މަޖިލިސް މެންބަރުންނާއި ކުރީގެ ވަޒީރުންގެ އިސްވެ ތިއްބަވައި އެމްއެމްއޭ ކައިރީގައި ކުރި މުޒާހަރާގައި އަޑު އުފުލާފައި ވަނީ އަވަސް އިންތިހާބެއް ބޭއްވުމަށާއި ވެރިކަން ބަދަލުވި ގޮތް ބެލުމަށް ހަދާފައިވާ އިންކްއަރީ ކޮމިޝަން މިނިވަން ކުރުމަށާއި ބައިނަލް އަގުވާމީ ޖަމާއަތްތަކުން ރާއްޖެ އެކަހެރި ނުކުރުމަށެވެ.

މުޒާހަރާގެ ބައިވެރިންގެ އަޑު ގަދަކުރާ ހަރުކޮށްފައިވާ ހުރި ޕިކަޕް ކައިރީގައި ހުންނަވައިގެން ކުރީގެ ހޯމް މިނިސްޓަރު ހަސަން އަފީފު ވިދާޅުވީ މި ސަރުކާރު އައިސްފައިވަނީ "ބަޣާވާތަކުން" ކަމަށާއި ފުލުހުންނާއި ސިފައިން ރައީސް ވަހީދުގެ އައްޔަންކޮށްފައިވާ މަގާމުތަކުގައި ތިއްބެވި ބޭފުޅުންގެ އަމުރުތަކަށް ކިޔަމަންވެގެން ނުވާނެ ކަމަށެވެ. އަދި އެފަދަ އަމުރުތަކަކީ ޣައިރު ގާނޫނީ އަމުރުތަކެއް ކަމަށް ވެސް ވިދާޅުވި އެވެ.

އޭނާ ފުލުހުންގެ ކިބައިން އެދިވަޑައިގެންނެވީ ރައީސް ވަހީދު ހައްޔަރުކޮށްގެން ޝަރީއަތް ހިންގަންވާނެ ކަމަށާއި އިންސާފުގެ ކުރިމަތީގައި ރައީސް ވަހީދުއަށާއި "ބަޣާވާތު"ގަި ބައިވެރިވި ސިޔާސީ މީހުންނާއި ފުލުހުންނާއި ސިފައިންގެ ތެރެއިން ބައިވެރިވި މީހުންނަށް އަދަބު ދޭންޖެހޭނެ ކަމަށެވެ.

މުޒާހަރާ ހޫނުވެގެން ދިޔައީ، އެމްއެމްއޭ ސަރަހައްދުގައި ޖަހާފައިވާ ބެރިކޭޑްތައް ފަހަނައަޅައި އެމްއެމްއޭ ކައިރިއަށް ޖަމާވާން އުޅުމުންނެވެ. ފުލުހުން އެކަމުގައި ނަސޭހަތްތެރިވާން ފެށުމުން ބައެއް މީހުން ފުލުހުންނާޢި ހަޑިހުތުރު ބަހުން މުއާމަލާތްކޮށް، ޒުވާބުކޮށްފައިވެ އެވެ. އަދި އެ މީހުން ހައްޔަރު ކުރަން އުޅުމުން ހަމަނުޖެހުން ބޮޑުވުމުން ފުލުހުން ވަނީ މުޒާހަރާ ކޮންޓްރޯލް ކުރުމަށް ބައެއް މީހުންގެ ލޮލަށް ޕެޕާ ސްޕްރޭ ވެސް ޖަހާފައެވެ.

މުޒާހަރާގެ ތެރޭގައި ފުލުހުންގެ އަމުރަށް ނުކިޔަމަންތެރިކަން ދެއްކި އަންހެނަކު ހައްޔަރު ކުރަން އުޅުމުން އެކަމަށް ދެކޮޅު ހަދަން ފެށުމުން ފުލުހުންގެ އަނިޔާވާފަދަ ގޮތަކަށް ފުލުހުން އަމަލު ކުރިތަން ވެސް ފެނުނެވެ. އޭނަގެ ގައިގައި ބައެއް ފުލުހުން ފައިން ވެސް ޖެހި އެވެ.
މުޒާހަރާ ހޫނުވާން ފެށުމުން ފުލުހުން ޕެޕާ ސުޕްރޭ ޖެހުމާއެކު ފުލުހުންނާ ދިމާލަށް ފުޅި، ގާފަދަ ތަކެތި އުކަން ފެށި އެވެ. އަދި މުޒާހަރާގެ ބައިވެރިއަކު އެއްލި ބިއްލޫރި ފުޅިއަކުން ޖެހި ފުލުހެއްގެ ބޯ ފަޅައިގެން ގޮސްފައިވެ އެވެ. އެ ފުލުސް މީހާއަށް މިހާރު އައިޖީއެމްއެޗްގައި ފަރުވާދެމުންދާ ކަމަށް ފުލުހުން ބުންޏެވެ.

އެހިސާބުން ފުލުހުން ބާރުގެ ބޭނުންކޮށް މުޒާހަރާ ފަހަތައް ޖައްސާލި އެވެ. އަދި މުޒާހަރާގެ ބައިވެރިން އަޑުގަދަކުރާ ހަރުކޮށްފައި ހުރި ޕިކަޕް ވެސް ފުލުހުންގެ ބެލުމުގެ ދަށަށް ގެނައެވެ.
މިރޭގެ މުޒާހަރާގައި ފުލުހުންގެ އަމުރަށް ނުކިޔަމަންތެރިކަން ދެއްކި ދެ އަންހެނުންނާއި ހަތަރު މީހަކު ހައްޔަރުކޮށްފައިވެ އެވެ. މުޒާހަރާގެ ބައިވެރިން އެމްއެމްއޭ ސަރަހައްދުން ފައްސާލީ މިރޭ 12:00 ޖެހިފަހުންނެވެ. އެ ސަރަހައްދުން މުޒާހަރާގެ ބައިވެރިން ފައްސާލުމުން އެމްޑީޕީން ސީދާ ހަރަކާތައް ނުކުތް މުޒާހަރާ ނިންމާލީ ވެސް އުސްފަސްގަނޑަށެވެ.