18 Aug 2023, 13:15
ރަހިމުގެ ގުޅުން ކެނޑުމަކީ ވަރަށް ނުބައި ކަމެއް ކަމަށާއި، އެ ގުޅުން ކެނޑުމުގެ ބަދަލުގައި ދެމެހެއްޓުމަށް މިއަދުގެ ހުކުރު ޚުތުބާގައި ނަސޭހަތްތެރިވެއްޖެއެވެ.
ރަޙިމުގެ ގުޅުން ދެމެހެއްޓުމަށް ޚާއްސަކޮށްފައިވާ މިއަދުގެ ހުކުރު ޚުތުބާގައި ވަނީ، ރަހިމުގެ ގުޅުން ދެމެހެއްޓުމަށްޓަކައި ގާތްތިމާގެ މީހުންނަށް އިޙްސާންތެރިވެ އެމީހުންނަށް ޒިޔާރާތްކޮށް އެމީހުންގެ ހާލުއަހުވާލު ބަލައި، ހެޔޮ ފޯރުވުމަށް ނަސޭހަތްތެރިވެފައެވެ. އަދި އެ މީހުންނަށް ޒިޔާރާތްކުރެވެން ނެތް ހާލަތެއްގައި ފޯނުން ގުޅައި ހާލުއަހުވާލު ބަލައި، އަދި މުނާސަބަތުތަކުގައި ތަހުނިޔާ ބަދަލުކުރެވިދާނެ ކަމަށް ޚުތުބާގައި ބުންޏެވެ.
"މުސްލިމް އަޚުންނޭ! ބައެއް މީހުންނަށް އެމީހުންގެ ގާތްތިމާގެ މީހުންނާއި ރަހިމުގެ ގޮތުން ގުޅިފައިވާ މީހުންނަކީ ކޮބައިކަން ނޭނގިދާނެ. ބައެއް މީހުންނަށް އެއީ ކޮން ބައެއްކަން އެނގުނުކަމުގައި ވިޔަސް އެ މީހުންނަށް ޒިޔަރާތްކުރުމާއި، ބަލިވުމުން ގޮވައިލަންދިޔުން، އެ މީހުންގެ ދަރިންނަށް މަނާކުރޭ." ޚުތުބާގައި ބުންޏެވެ.
ޚުތުބާގައި ބުނީ މައިންބަފައިން އެމީހުންގެ ދަރިންނަށް ރަހިމުގެ ގުޅުން ކެނޑުމަށް ގޮވައިލާ ގޮވައިލުމަކީ ހިތާމަހުރި ކަމެއް ކަމަށެވެ. އަދި ލޮބުވެތި ރަސޫލާ ވަނީ ރަހިމުގެ ގުޅުން ދެމެހެއްޓުމަށްޓަކައި އަހަރެމެންގެ ނަސަބު ދަސްކުރުމަށް އަންގަވާފައެވެ.
ދީނުގެ ފަރުޟެއް އަދާކުރުމަށްފަހު ކުރެވޭ އެންމެ ބޮޑު ހެޔޮކަމަކީ ރަހިމުގެ ގުޅުން ދެމެހެއްޓުން ކަމަށް ޚުތުބާގައި ވަނީ ބުނެފައެވެ.
"ރަހިމުގެ ގުޅުންތައް ދެމެހެއްޓުމަށްޓަކައި ތިޔަބައިމީހުންގެ ނަސަބުތައް ދަސްކުރާށެވެ! ފަހެ ހަމަކަށަވަރުން ރަހިމުގެ ގުޅުން ދެމެހެއްޓުމަކީ ގާތްތިމާގެ މީހުންގެ މެދުގައި ލޯބި ދެމެހެއްޓޭނޭ ކަމެކެވެ. އަތްމަތި ތަނަވަސްކޮށްދޭނޭ ކަމެކެވެ. އަދި އުމުރު ދިގުކޮށްދޭނޭ ކަމެކެވެ." ޚުތުބާގައި ބުންޏެވެ.
ރަހިމުގެ ގުޅުން ދެމެހެއްޓުމަކީ ސުވަރުގެ ވަނުމުގެ ސަބަބުތަކުގެ ތެރޭގައި ހިމެނޭ ކަމެއްކަން ފާހަގަކޮށް ޚުތުބާގައި ބުނީ، ރަހިމުގެ ގުޅުން ދެމެހެއްޓުމަކީ އީމާންކަމުގެ އަލާމާތްތަކުގެ ތެރޭގައި ހިމެނޭ ކަމެއް ކަމަށާއި އެ ގުޅުން ދެމެހެއްޓުމަކީ ފާފަ ފުއްސަވާ ކަމެއް ކަމަށެވެ.
ރަހިމުގެ ގުޅުން ކަނޑާ މީހުންގެ އަމަލުތައް މާތްﷲ ގަބޫލު ނުކުރައްވާނެ ކަމަށާއި އާޚިރަތް ދުވަހުން ލިބޭ އަޒާބުގެ އިތުރުން ދުނިޔެމަތީގައި ވެސް އުގޫބާތް ލިބޭނެކަމަށް ޚުތުބާގައި ވަނީ ހަނދާންކޮށްދީފައެވެ.