14 Aug 2023, 23:47
އައްޑޫގައި ހިންގި އޭޝިއަން އެކެޑަމީ އޮފް އޭރޮނޯޓިކްސް (އޭއޭއޭ) އިން ޕައިލެޓު ތަމްރީނު ފަށާ، ފުރިހަމަ ނުކުރެވުނު ދަރިވަރުންނަށް ސަރުކާރުން އެހީތެރިވުމުގެ ގޮތުން ދޫކުރާ ލޯނުގެ ފަހު ބެޗަށް ހުޅުވާލައިފިއެވެ.
ހަޔާ އެޑިއުކޭޝަން މިނިސްޓްރީން މިއަދު ކުރި އިއުލާނެއްގައި ބުނެފައިވަނީ މިއަދު ހުޅުވާލި ފުރުސަތުގެ މުއްދަތު ހަމަވާނީ އަންނަ މިމަހުގެ 21ވަނަ ދުވަހު ކަމަށެވެ.
ގަން އިންޓަނޭޝަނަލް އެއާޕޯޓުގައި 2010ވަނަ އަހަރުން ފެށިގެން ހިންގަމުން ދިޔަ ފްލައިން ސްކޫލުގެ ދަރިވަރުންގެ ކޯސް ނުނިމި ދިގުލައިގެން ދިޔުމުގެ މައްސަލަ ފެންމަތިވީ 2019ވަނަ އަހަރު ސިވިލް އޭވިއޭޝަން އޮތޯރިޓީން ކުރި އޮޑިޓަކަށް ފަހުއެވެ.
އެ ރިޕޯޓުގައި ދަރިވަރުންގެ ކިޔެވުމަށް ބުރޫއަރާ ކަހަލަ އެތައްކަމެއް ވަނީ ފާހަގަވެފައެވެ. އެކަންކަން ރަނގަޅު ކުރުމަށް ދެވުނު މުއްދަތުގައި ވެސް އިސްލާހުކޮށްފައި ނުވުމުން 2021ވަނަ އަހަރު ވަނީ އެ ސްކޫލަށް ފިޔަވަޅު އަޅައި، ލޯނު ނަގައިގެން ކިޔަވަމުން ދިޔަ ދަރިވަރުންނަށް ލުއި ދޭން ރައީސް އިބްރާހީމް މުޙައްމަދު ޞާލިހު ނިންމަވާފައެވެ.
އަދި، ބީއެމްއެލުން ލޯނު ނަގައިގެން ކިޔަވަމުން ދިޔަ ދަރިވަރުންގެ ލޯނު ހަޔާ އެޑިއުކޭޝަންގެ ދަށަށް ބަދަލުކޮށްދެއްވިއެވެ.
ދަރިވަރުންނަށް ލުއި ދިނުމުގެ ގޮތުން ދެން އިއުލާނު ކުރެއްވީ، މޯލްޑިވިއަންގެ އޭވިއޭޝަންގެ އެކެޑަމީގައި އެ ދަރިވަރުންގެ ކޯހުގެ ބާކީބައި ފުރިހަމަކުރުމުގެ ފުރުސަތެވެ. އެކަން ކުރުމަށް، ކޯހުގެ ބާކީ ބަޔަށްވާ ފައިސާ ލޯނު އެހީގެ ގޮތުގައި އައީ ދެމުންނެވެ.