08 Aug 2023, 19:09
އާޖެންޓީނާ ތަރި ލިއޮނެލް މެސީގެ ޓްރާންސްފާއާ ގުޅިގެން ސުވާލުތަކެއް އުފެއްދި ގޯލްކީޕަރު ނިކް މާސްމަންގެ ކޮންޓްރެކްޓް، އިންޓަ މަޔާމީން ބާތިލުކޮށްފިއެވެ.
މިދިޔަ ޖޫން މަހުގެ ތެރޭގައި 'އީއެސްޕީއެން'އަށް ދިން އިންޓަވިއުއެއްގައި މާސްމަން ވަނީ މެސީ ފަދަ ކުޅުންތެރިއެއް ގެންނަން އިންޓަ މަޔާމީގެ އިންފްރާސްޓްރަކްޗާ ރަނގަޅުކުރެވިފައިވޭތޯ ސުވާލު އުފައްދައިފައެވެ.
"އަހަރެން ދެކެނީ މެސީ ފަދަ ކުޅުންތެރިޔަކު ކްލަބަށް ގެންނަން އަދި ތައްޔާރެއް ނޫން ކަމަށް. ކްލަބުގައި އޮތީ ވަގުތީ ސްޓޭޑިއަމެއް. އެ ސްޓޭޑިއަމްގައި ގޭޓެއް ނެތް، ބޭނުން މީހަކަށް ސްޓޭޑިއަމަށް ވަދެވޭނެ. ކުޅުންތެރިން ވެސް ސްޓޭޑިއަމް ދޫކޮށް ދާން ޖެހެނީ ސެކިއުރިޓީއެއް ނެތި. ކްލަބު އަދި ތައްޔާރެއް ނޫން. އެކަމަކު އަހަރެން އުންމީދުކުރަނީ މެސީ ކްލަބާ ގުޅޭނެ ކަމަށް،" މީގެ ކުރިން ދިން އިންޓަވިއުގައި މާސްމަން ބުންޏެވެ.
އިންޓަ މަޔާމީގެ ފެންވަރާއި އަދި މެސީގެ ޓްރާންސްފާއާ ގުޅޭގޮތުން މާސްމަން ސުވާލު އުފެއްދިތާ މާގިނަ ދުވަސްތަކެއް ނުވެ، އެ ކްލަބުން ވަނީ އޭނާއާއެކު ހަދާފައިވާ ކޮންޓްރެކްޓް ނިމުމަކަށް ގެނެސްފައެވެ. ނަމަވެސް ރަސްމީކޮށް އެކަމުގެ ސަބަބެއް އިންޓަ މަޔާމީން ބުނެފައެއް ނުވެއެވެ.
މިދިޔަ މަހު އިންޓަ މަޔާމީއާ ގުޅުމަށްފަހު، މޭޖާ ލީގް ސޮކާ (އެމްއެލްއެސް)ގައި މެސީގެ ނަން ވަނީ ވިދާލައިފައެވެ. މިހާތަނަށް އިންޓަ މަޔާމީއަށް ކުޅުނު ހަތަރު މެޗުން މެސީ ވަނީ ހަތް ގޯލު ކާމިޔާބުކޮށްފައެވެ. ކުޑަ ދުވަސްކޮޅެއްގެ ތެރޭގައި މެސީ ވަނީ އިންޓަ މަޔާމީގެ ގޯލު ރެކޯޑުގެ ހަތަރުވަނައަށް ވެސް ޖެހިލައިފައެވެ.
އިންޓަ މަޔާމީން ކޮންޓްރެކްޓް ބާތިލުކުރި އުމުރުން 32 އަހަރުގެ ނެދަލެންޑްސް ކީޕަރު މާސްމަން، އެ ކްލަބާ ގުޅުނީ 2021 ވަނަ އަހަރުއެވެ. އޭނާ ވަނީ 29 މެޗެއްގައި އެޓީމުގެ ގޯލު ބަލަހައްޓައިފައެވެ.