11 Aug 2023, 17:40
"އެންމެ ވަރުގަދަ ހަގުރާމަތަކާއި ކުރިމަތިލާން ﷲ ސުބުހާނަހޫ ވަތައާލާ ޖައްސަވަނީ އެފަރާތުގެ އެންމެ ކުޅަދާނަ ފަހުލަވާނުންނަށެވެ."
***
ރާހާވެސް ކީމޯ ހަދައިގެން އައިސް ހޮޑުލާފައި ހާލު ދެރަވުމަށްފަހު އޭރު ކޮންމެވެސް ވަރަކަށް ރަގަޅުވެ ތެދުވެ އުޅުނެވެ. މަންމަގެ އެދުމަށް ރާހާއާއި ޒާދާވެސް ގެއަށް އަންނަ މެހުމާނުންނާއި ބައްދަލުވާން ތައްޔާރުވެގެން ސިޓިންރޫމްގައި އިންތިޒާރުގައި ތިއްބެވެ.
"މަންމާ ދުވަހަކުވެސް އެ ފްރެންޑްގެ ވާހަކަ މަންމަ ނުބުނަމެއްނު...އެއީ ކޮންބަޔެއްތަ؟"
އެވަގުތު ބެލްގެ އަޑުއިވުނެވެ. ކާއިނާތުގެ މޭގަނޑު ތެޅިގަތީ ވަކިގޮތެއް ބަލާފައެއް ނޫނެވެ. އަވަސްވެފައިވާ ހިތަކާއިއެކު ދޮރު ހުޅުވައިލިއިރު ދޮރުމަތީގައި ތިބީ މެދުއުމުރުގެ ދެމަފިރިންނެވެ. ޔާސްމީންއާއި ޔަހްޔާ ސަލާމްކޮށްލާފައި ދަރިފުޅު ޔަޒީދު ތައާރަފުކޮށްދިނެވެ.ޔަޒީދުވެސް އިސްކޮޅުން ދިގުވެފައި މުށިލޮލަކާއި އިސްތަށިގަނޑެއް ލިބިފައިވިއެވެ. މުށިޖެކެޓާއިއެކު ކަޅުކުލައިގެ ފަޓުލޫނެއް ލައިގެން ހުރިއިރު އެހާ ތަފާތު ރީތިކަމެއް ނުފެނުނަސް ހުތުރެއް ނޫނެވެ.ކާއިނާތު ދަރިފުޅާއި ހަތަރުކަޅިހަމަކޮށްލިއެވެ. ގެނެސްމޭގައި ޖައްސާބޮޑިކޮށްލަން ބޭނުންވިއެވެ. ކިތަންމެވަރަކަށް ހިތް އެދުނަސް މިވަގުތު ޖަޒުބާތުގައި ޖެހި އެފަދަ އެއްވެސް ކަމެއްކޮށްލާކަށް ނުކެރުނެވެ. މައިމީހާއާއި ދަރިފުޅުގެ ޚާއްސަގުޅުމެއް އޮންނަކަމަށާއި ފެނުމުން ތަފާތު އިހުސާސްތައް ކުރެވޭނެކަމަށް ބުންޏަސް އިތުރަށް އެފަދަކަމެއް ފާހަގަނުކުރެވުނެވެ.
"މިއީ ޒާދާއާއި ރާހާ...."
"ހެލޯ..." ޔަޒީދު ޒާރާގެ އަތުގައި ހިފިގޮތަށް މަޑުމަޑުން ފިތައިލުމުން ޒާދާއަށް އަތް ދަމައިގަނެވުނެވެ.މަންމަގެ ޒަމާންވީ އެކުވެރިއެއް ވުޖޫދަށް އައިގޮތަށް ޒުވާން ފިރިހެނަކާއެކު އައުމުން ވިސްނުނީ އޭގެ އެންމެ ނުބައިގޮތަށެވެ.
ޒާދާއަށް މިޒުވާނާގެ ޖެހިލުންކުޑަކަން ކަމަކުނުދިޔައެވެ.
"މަންމާ..ފޯނެއް..އެބަ އަންނަން.." ޒާދާ ފޯނު ކަންފަތުގައި ޖަހައިގެން ހުރެ ދުރަށް ދާން ހިނގައިގަތެވެ.
ކާއިނާތު ޔަހްޔާގެ ދެމަފިރިންނާއި ދަރިފުޅު ޔަޒީދުގޮވައިގެން ކާކޮޓަރިއަށް ގެންގޮސް އެންމެން ކެއުމުގެ ތެރޭގައި ދެކެވުނު ވާހަކަތަކުން ޔަޒީދުއަކީ ޑޮކްޓަރެއްކަންވެސް އެނގުނެވެ. ކާއިނާތު ހިތާހިތުން އުފާކުރިއެވެ. ޒާދާއާއި ރާހާއަށް އެކުދިންގެ ބޭބެއަކީ ޔަޒީދުކަން އެނގުމުން ފަޚުރުވެރިވާނެކަން ޔަގީނެވެ. ޒާދާފަދައިން އޭނަގެ ފިރިހެންދަރިފުޅުވެސް މިވީ ޑޮކްޓަރަކަށެވެ. ނަމަވެސް ދެވަނަ ސިކުންތުކޮޅުގައި ޔަޒީދު ބުނެލި ޖުމްލައިން އޭނަގެ ހިތް އޮއްސުނެވެ.
"ޖަނަވާރަށް ބޭސްކުރާ ޑޮކްޓަރެއް..."ޔަޒީދު ހިނިތުންވެލިއެވެ.
"އޯހ....ގްރޭޓް.."ކާއިނާތު ހިންދިރުވައިލިއެވެ.
"ޔަޒީދު ކުޑައިރުއްސުރެ ދިރޭ އެއްޗިއްސާއިހެދި މޮޔަވެފައި ހުންނާނީ. މަގުމަތިން ބުޅަލެއް ޑޯގެއް ފެނުނަސް ގެނެސް ކާންދޭ އޮޅުކުރާނެ. ކުޑައިރުއްސުރެ ތަފާތު ޕެޓްތައް ގެންގުޅޭ. އެހެޔޮ ޕައިތަންއަކަށްވިޔަސް. އަހަރެމެންގެ ޔަޒީދުއަށް ލިބިފައިވަނީ ބޮޑުހިތެއް..." ޔާސްމީން ފަޚުރުވެރިކަމާއެކު ދަރިފުޅުގެ ބުރަކަށީގައި ފިރުމައިލިއެވެ.
"އަޅުގަނޑުގެ އަމިއްލަ ވެޓް ކްލިނިކެއްގައި މަސައްކަތްކުރަނީ..."ޔަޒީދު އިތުރަށް ބުނެލަމުން ވަށައިގެން ނަޒަރު ހިންގައިލިއެވެ. "ޒާދާ ދިޔައީތޯ؟"
"މުހިއްމު ކޯލެއް އައިސްގެންނޯ...ޒާދާވެސް އޮންކޮލޮޖިސްޓަކަށްވާން ބޭނުންވެގެން މިދުވަސްކޮޅު އެ ޑިޕާޓްމެންޓްގައި އޭނަގެ ބައްޕައާއިއެކު މަސައްކަތްކުރަނީ..."
"ވާއު...."ޔަޒީދު ލޯބޮޑުކޮށްލިއެވެ.
"ސުބުހާނަﷲ. މާޝާﷲ....."ޔާސްމީންއާއި ޔަހްޔާވެސް އެކަކު އަނެކަކަށް ބަލައިލީ އުފާވެރި ހިނިތުންވުމަކާއެކީގައެވެ."ވަރަށް އުފާވެއްޖެ..ފަޚުރުވެރިވުން ހައްގު..ކާއިނާތުއަކީވެސް މަޝްހޫރު ޖާނަލިސްޓެއްނު...."
ކާއިނާތުގެ ސިކުނޑީގައި ވަގުތުން ކުރެހުނީ ސައިރަސްގެ ރީތި ސޫރައެވެ.
"ވެލް....އެއީ މާޒީ.މިހާރު ފުލްޓައިމް މަންމައެއްގެ ރޯލު މިކުޅެނީ..."ކާއިނާތުގެ ނަޒަރު އަނެއްކާވެސް ޔަޒީދުއަށް ހުއްޓުނެވެ. ޔަޒީދު ވަރަށް ފޯރިއާއެކު ކަމުން ދިޔައީ ބަނޑަށް ޖެހިފައިވާކުއްޖެއްހެން ދަހިކޮށެވެ. ފަގީރުކޮށް އުޅެބޮޑުވީމަ ނޫނީ ކާއިނާތުމެންގެ ސުފުރާގެ ރަހަ ހިސާބަށްވުރެ ކަމުދިޔައީއެވެ. ޔަޒީދުގެ އާދަތައް ކަމުނުދިޔަސް އަމިއްލަ ދަރިފުޅާއިމެދު އިހާނެތިކޮށް ކަންތައް ކުރެވުނުކަން ހިތަށް ވައްދާދިނެވެ. ދަރިފުޅުގެ އުޅުމާއި އަޚުލާގުގެ އުނިކަމެއް ހުރެއްޖެއްޔާ އެއީ އޭނަގެ އިހުމާލެވެ. ދަރިފުޅު އެއްލައިލެވުނުކަމުގެ މޮޔަ ހީވެ ލޮލަށް ކަރުނަ އައެވެ. ޔަޒީދުގެ މޫނުން ސައިރަސްގެ ސިފަ ހޯދަން މަސައްކަތްކުރިޔަސް އެފަދަކަމެއް ނުފެނުނެވެ. އޭނަގެ އާދައެއް ނަމަވެސް ޔަޒީދުގެ ނެތެވެ. ބޮޑަށްހީވަނީ އޭނަގެ އުޅުން ހުރިހެންނެވެ.
"ޔަޒީދު އެއްވެސް ވަރަކަށް ތަރިތަކާއިބެހޭގޮތުން ވިސްނަންތަ؟ އެސްޓްރޮނޮމީއަށް ޝައުގެއް ހުރޭތަ؟"
"ނޫން..."
ޔާސްމީން ލޮލުންކޮށްލި އިޝާރާތާއެކު ޔަޒީދުގެ ވާހަކައިގެ މިސްރާބު އެނބުރުނެވެ.
"ޔެސްސް...އާންޓް ކައިލީން......ހަގީގަތުގައި އެސްޓްރޮނޯޓަކަށްވާން ބޭނުމީ..ފޮތްތައްވެސް ވަރަށް ބެލިން..ޔުނިވާސްއާއި ބެހޭގޮތުން ކިތަންމެވަރަކަށް ހޯދާ ދިރާސާކޮށް މޮޅެތި ފިލޯސަފަރުންގެ ފޮތްތައް ކިޔާނިމުނުއިރު އަޅުގަނޑުގެ ކޮންކްލޫޝަންއަކީ ދުނިޔެއަކީ ފްލެޓްތަނެކޭ.. އާންޓްކައިލީންއަށް އެނގޭތަ؟ އަހަރެން ދިޔައީމޭ މާސްއަށް......................."
"ކޮން އަހަރަކު؟" ކާއިނާތު ހިނި އަންނަގޮތްވިއެވެ. އޭނަގެ ދަރިއަށް ޔަގީނުންވެސް އޭނަގެ ސިފައެއް ވާރުތަވެއްޖެއެވެ. ދޮގުހެދުމުން އަރާހުރި މާހިރެކެވެ.
"އަދި ނުދަމެއްނު. ދާންވެގެން ލިސްޓްކުރީ.."ޔަހްޔާ ކަރުކެހިލިއެވެ.
"ބައްޕަމެންނަށް ސިއްރުން ދިޔައީމޭ...އެކްސްޕެޑިޝަނެއްގައި...ސިއްރު މިޝަނެއްގައި....ޒާދާ އަދިވެސް ނާންނަނީތަ؟"
ރާހާ ލޯބޮޑުކޮށްގެން އިނދެފައި ދަތްދޮޅީގައި އަތް ވިއްދައިލިއެވެ.
"އެތާ މޫސުމް ކިހިނެއް؟ އިންސާނުންނަށް ދިރިއުޅެވޭވަރުވޭތަ މިސްޓަރ ޔަޒީދު................."
"އަހަރެން ދިޔައީ ފިނި މޫސުމްގައި...ދުނިޔެއަށްވުރެ ހަގުނަ އިތުރަށް ސްނޯފައިބާފައި އޮތީ...ވަރަށްފިނިގަދަ..މައިނަސް ސެވެންޓީގައި ކަަން ނޭގޭ ހުރީ..."
"ވާއު....ސީރިޔަސްކޮށް؟ މާސްއަށް ސްނޯވެހޭކަމެއް ނުދެނެހުރިން..." ރާހާގެ ޖުމްލައިން އެންމެފަހުން ކާއިނާތު ހިނިގަނޑު ފަޅައިގެން ދިޔައެވެ.
"ދަރިފުޅާ ޔަޒީދު...ސަމާސާއަކަށްވެސް ދޮގުހެދުމަކީ ދީނުގައި ހުއްދަކަމެއްނޫން. އާންޓްވެސް ތި ނުބައި އާދަ ހަރުލައިގެން އެކަން ނުހުއްޓި ވަރަށް ޒަމާންވި. އެއީ ރަގަޅު އާދައެއްނޫން މައި ސަން..." ކާއިނާތު ވިސްނައިދޭ ރާގަކަށް ބުނެލިއެވެ.
"އެކަމަކު މިއީ ހަގީގަތް...ދޮގެއްނޫން.."ޔަޒީދު އިތުރަށް ބޭޒާރުވިއެވެ.
ރާހާ ލޮލުތެރޭގައި ކަޅި ހިންގައިލެވުނެވެ.
"ކިހިނެއް ދެން ދިރިއުޅުން؟ ވެޓެއް ވީމަ ވަރަށް އިންޓެރެސްޓިން....." ރާހާ ސުވާލުކުރިއެވެ.
ޔަޒީދުގެ ފޮނިކެނޑުމާއި ދޮގުހެދުމުގެ ހައްދެއްނެތެވެ. ދީނާއި ބެހޭގޮތުން ވާހަކަދެއްކުމުންވެސް އޭނަގެ ވާހަކައިން ދޭހަވީ ދީނަށް ގަދަރުނުކުރާކަމެވެ. ލޯތްބެއްނެތްކަމެވެ. ޒަމާނަށް ފެތޭގޮތަށް ދީނީ ކަންތައްތަކަށް ބަދަލުތައް ގެނެވެން ޖެހޭނެކަމަށާއި ތުނބުޅިއާއި ނިގާބަށް ފޫހިވާކަމުގައެވެ. ހައްދުން ބޭރުވަނީކަމަށެވެ. ހުޅަނގު ރުއްސަން އޭނަ ބޭނުންވާކަން ވާހަކަތަކުން އެނގުނެވެ. ހަގީގަތުގައި އޭނައަށް ހުޅަގުގެ ތަހުޒީބުކަމުދަނީއެވެ. ރާހާވެސް ފޫހިވެގެން އާފުރެންފެށިއެވެ. ދޭތެރެއަކުން ޔަޒީދު ޒާދާ ނައިސްގެން ސުވާލުކުރަން ފެށިއެވެ. ޒާދާ ކާން ނައުމުން ކާއިނާތުގޮސް ކޮޓަރީގެ ދޮރުގައި ތަޅާތަޅާ ޚަބަރެއްނުވުމުން ހިތްހަމަނުޖެހިގެން މެސެޖްވެސް ކުރިއެވެ. ނަމަވެސް ޒާދާގެ ހިލަމެއްނުވިއެވެ. ކައިގެން އިރުކޮޅެއްވާންދެން ވާހަކަދައްކަން ތިބެލާފައި އެ އާއިލާ އެނބުރިދިޔުމުން ކާއިނާތު ސޯފާއަށް ވެއްޓިގަތްގޮތަށް ވިސްނުމެއްގެ ތެރޭގައި އޮވެފައި ޖީލަންއަށް ގުޅިއެވެ. އެނބުރެމުންދާ ބާރުގަަދަ ތޫފާނަކަށް ދަމައިގަނެފައިވާ ހިތެކޭ އޭނަގެ ހިތް ތަފާތެއްނެތެވެ. ސިކުނޑިވެސް ހައިޖާނަކަށް ވެއްޓިއްޖެއެވެ. ބޮލުގައި ރިއްސަންފެށިގޮތަށް ހެޔަށްވެސް ގޮތެއްވާން އުޅުނެވެ.
***
ޒާދާ މަހްރާއަށް ގުޅައިގެން އެނދުމަތީގައި އޮތެވެ."މަންމަމެން ގެނެސްގެން އުޅޭ ކުރީގެ ފްރެންޑެކޯ. އޭނަގެ ދަރި މަށަށް ބަލަން ހުރީ ދީވާނާއެއްހެން. އަދި އަތުގައި ހިފިގޮތަށް ފިތައިލީ. ފޫހިވީވަރުން އެ މަކަރުވެރި ފޮކްސް ވައްތަރަށް ހުރި ލޯމަތީގައި އެތިފަހަރެއް އަޅަން ހިތަށް އެރި. ފޫހިމީހެއް ހުވާ...ބާސިލް ނުވޭ އެއްވެސް އެއްޗަަކަށް. ބާސިލްވެސް އެވަރަށް ފުލުފުލުގައި މެސެޖްކުރަނީ. މިފިރިހެނުންގެ އުދަގޫ ބޮޑުކަމުން ދުނިޔޭގައި އުޅެވެންނެތް. އެހެން ޕްލެނެޓަކަށް ދާންވީ..ފިރިހެނުން ނެތްތަނަކަށް....."
"ކާމް ޑައުން ލަވް....ތި ފިރިހެނާ ގެނައީ ކޮން ބޭނުމަކު؟"
"މަންމައަށް ކަމުދިޔައީކަމަށްވާނީ.."
"އެރެންޖް މެރިޖެއްތަ؟"
"އަަގް....އޭނައާއި އިންނަންވެއްޖެއްޔާ ބާސިލްއާއިއެކު ފިލައިގެންދާންވެސް މަށަށް މާރަގަޅު.....ސީރިޔަސްކޮށް ވަރަށް ފޫހިކޮށް ބަލަން ހުރީ..ޔަޒީދުއެކޯ ކިޔަނީ..."
"ހޭޓް އިޒް ދަ ބިގިނިން އޮފް ލަވް..."
"މަހްރާވެސް......"ޒާދާ ތޫލިކޮށް ހަޅޭއްލަވައިގަތެވެ.
"އޭނަ ފޫހިކަމަށް ހީވިޔަސް އަޅުވެރި ތަގުވާވެރި ކުއްޖަކަށްވެދާނެއްނު. ހާފިޒަކަށް ނޫނީ ސްކޯލާއަކަށް ވެއްޖެއްޔާ....ބާސިލްއަކީ މުސްލިމެއް ނޫނޭ ޒާދާ އަމިއްލައަކަށްނު ބުނީ. މެރިޖްގައި ބަލަން ޖެހޭނީ ރަގަޅުތޯ....ޕްލީޒް ޒާ...ވިސްނާލާފައި ނޫނީ ޑިޒިޝަނެއް ނުނަގާތި...މަންމަ އެހާވަރުން ޒާއާއި ބައްދަލުކުރުވަން ގެންދާނީ އެކުއްޖާގެ ހުރި ރަގަޅުސިފައަކުން ހެން މަށަށް ހީވަނީ. ރިމެމްބާ. ޑޯންޓް ޖަޖް އަ ބުކް ބައި އިޓްސް ކަވާރ..."
"އާނ...ތިހެން އޮތީ. އެކަމަކު އައި ލައިކް ބާސިލް...އޭނަ ރިވާޓަކަށް ވެއްޖެއްޔާ..."
"ދުޢާކުރޭ. ރަގަޅުގޮތަކަށްވާނީ އިންޝާﷲ..ﷲ ސުބުހާނަހޫ ވަތައާލާއަށް ކޮންމެކަމެއްގައި ދުޢާކުރަން އޮންނަނީ. ހީއިޒް ޔޯ ރަބް...އެންމެންގެ ހުރިހާ އެފެއާސްތައް ބަލަހައްޓަވާ އަޅަމެންގެ ވެރި އިލާހު...ކޮންމެކަމެއްގައި ދުޢާކުރަން ޖެހޭނީ..." މަހްރާ ވިސްނާދިނެވެ.
"މަހްރާއަށް އެންމެ ރަގަޅު ބޯއިއަކީ މެހެރާޒް...."ޒާދާ ދިމާކޮށްލިއެވެ.
***
ޒާދާ ކޮޓަރިން ނިކުމެގެން އައިއިރު ރާހާ ސިޓިންރޫމްގެ ސޯފާއެއްގައި އޮށޯވެލައިގެން ލެކްޗާއެއްބަލަން އޮތެވެ. އިސްތަށިގަނޑު އެއްކޮށް ބާލާފައި ހުރިނަމަވެސް ރާހާ ފެންނަލެއް ވަރަށް ލޯތްބެވެ. ޔަޒީދް ދިޔުމުން ނަމާދުކޮށްގެން އޭނަ ބުރުގާ ނާޅާ ބޭރަށް ނުކުތީއެވެ. ޒާދާ ފެނުމާއެކު ރާހާ ދިމާކުރާގޮތަށް ވާހަކަދެއްކިއެވެ. ޔަޒީދު އެތައް ފަހަރު ޒާދާ ނައިސްގެން އުޅުނު ވާހަކައާއި ދެނަންވެސް ގުޅޭކަމުގައި ބުނުމުން ޒާދާ އުކުޅުގައި އަތް ވިއްދާލަމުން ފުންކޮށް ނޭވާލާންފެށިއެވެ.
"ސީރިޔަސްކޮށް ރާހާ ބަލިނޫންނަމަ އައި ވިލް ކިލް ޔޫ..........."
"ޒާދާ ކިހިނެއް ތިވަނީ؟"ކާއިނާތު ނުކުމެގެން އައެވެ. އަތްދިގު ސްވެޓަރަކާއި ޖިންސްގައި ހުރިއިރު ކާއިނާތުގެ އޮމާން މޫނު ވިދައެވެ."މަންމަ ލަދުން ހަލާކުވި. މެހުމާނުންތަކެއްގެ މޫނަށް ދޮރު ޖަހާފައި ކޮޓަރި ތަޅުލައިގެން އޮތީ..."
"މަންމަގެ އެކުވެރިންވީމަ އަޅުގަނޑު ނެތަސް އޯކޭވާނެއްނު..އެހެންނޫނަސް އޭނަ މަގޭ އަތުގައި ހިފާ ފިތައިލީ..."ޒާދާ ތުން ފިތައިލިއެވެ.
"ޒާދާ..."ކާއިނާތު އަޑުކޮޅަށް ގޮވައިލިއެވެ.
ޒާދާ ހައިރާންވިއެވެ. މަންމަ އެފިރިހެނާގެ ދިފާއުގައި އޭނަދެކެ ރުޅިއަންނަ ހިސާބަށް ދިޔައީބާވައެވެ.
"އެއީ ކާކުކަން އެނގޭނަމަ ތިހެނެއް ނުބުނާނެ..."
"މަންމަ ބުނީމައެއްނު އެނގޭނީ..."ޒާދާ ހަގުރާމަކުރަން ނިންމިއެވެ. މަންމަ ބުނަން އުޅެނީ ޒާދާއާއި ކައިވެނިކުރަން ހަމަޖެހިފައިވާ ކުއްޖާކަމަށާއި ޒާދާ އެއްބަސްވާންޖެހޭނެ ކަމުގައެވެ. މިފަހަރު ބައްޕަ އަމުރުކުރިޔަސް އޭނަ އެއްބަސްވާނެ އެއްވެސް ގޮތެއްނެތެވެ.
ނުނިމޭ