07 Aug 2023, 17:52
އިދިކޮޅުގެ ލީޑަރު ރައީސް އަބްދުﷲ ޔާމީން އަބްދުލްގައްޔޫމް މާފުށީ ޖަލުގައި ވޯޓުލުމަށް ރީރެޖިސްޓާ ކޮށްފައި ނުވާކަން "ސަން"އަށް ކަށަވަރުވެއްޖެއެވެ.
މި އަހަރުގެ ރިޔާސީ އިންތިޚާބަށް އެ މީހެއްގެ ރަށް ނޫން އެހެން ތަނެއްގައި އޮންލައިންކޮށް ރަޖިސްޓާވުމަށް އިލެކްޝަންސް ކޮމިޝަނުން ހުޅުވައިލި ފުރުސަތު މިދިޔަ ހޮނިހިރު ދުވަހުގެ ރޭ 10:00އަށް ވަނީ ހަމަވެފައެވެ.
ރައީސް ޔާމީން ވޯޓުލުމަށް ހަމަޖެހިފައި އޮތީ މައްޗަންގޮޅި އުތުރުގެ ދެވަނަ ވޯޓު ފޮއްޓަށެވެ. އެ ފޮށި ބައްޓަނީ އަމީނިއްޔާ ސްކޫލުގައެވެ. އެހެން ނަމަވެސް، ޖަލު ހުކުމެއް މާފުށީ ޖަލުގައި ތަންފީޒުކުރައްވަމުން ގެންދަވާ ޔާމީނަށް މާލެއަށް ވަޑައިގެން ވޯޓު ލެއްވުމުގެ ފުރުސަތެއް ނުލިބޭނެއެވެ.
މޯލްޑިވްސް ކަރެކްޝަނަލް ސާވިސްގެ މީޑިއާ އޮފިޝަލަކު ވިދާޅުވީ، އިންތިހާބަށް ރީރެޖިސްޓާ ކުރަން ބޭނުންވާ ގައިދީންނަށް އެ ކަމުގެ އިންތިޒާމު ހަމަޖައްސައިދިން ކަމަށެވެ. އަދި ހުރިހާ ޖަލެއްގައި ވެސް ވޯޓުފޮށި ބަހައްޓާނެކަމަށާއި ގައިދީން ވޯޓުލުމަށް އެހެން ތަނަކަށް ގެންގޮސްދިނުމުގެ އިންތިޒާމު ހަމަޖައްސައިނުދޭނެ ކަމަށް އޮފިޝަލް ވިދާޅުވިއެވެ.
މި އަހަރުގެ ރިޔާސީ އިންތިހާބުގައި ވާދަކުރުމަށް އެންމެ ފުރަތަމަ ކެންޑިޑެސީ ފޯމު ހުށަހެޅުއްވީ ޔާމީނެވެ. ނަަމަވެސް، ޖަލު ހުކުމެއް ތަންފީޒު ކުރައްވަމުން ގެންދަވާތީ އެމަނިކުފާނުގެ ކެންޑިޑެސީ ބަލައިނުގަންނަން އިލެކްޝަންސް ކޮމިޝަނުން މިދިޔަ އަންގާރަ ދުވަހު ވަނީ ނިންމައިފައެވެ.
އެ ނިންމުން ސުޕްރީމް ކޯޓުގައި އިސްތިއުނާފު ކުރުމުން މިދިޔަ ހުކުރު ދުވަހު އަޑުއެހުންތައް ބޭއްވުމަށް ފަހު، އެ ކޯޓުގެ ހަތް ފަނޑިޔާރުންގެ އިއްތިފާގުން ހުކުމްކޮށްފައި ވަނީ ކޮމިޝަނުގެ ނިންމުން ރަނގަޅު ކަމަށެވެ.
އެ ހުކުމް ކުރިތާ މާގިނައިރެއް ނުވެ ނޯޓެއް މެދުވެރިކޮށް ޕީޕީއެމް، ޕީއެންސީގެ ލީޑާޝިޕަށް ޔާމީން އެންގެވީ، ސެނެޓަށް ފެންނަ ނަމަ ރިޔާސީ އިންތިޚާބު ބޮއިކޮޓް ކުރުމަށެވެ. އެކަމާ ބެހޭ ގޮތުން ޕީޕީއެމް އޮފީހުގައި ސެނެޓުން ބޭއްވި މަޝްވަރާ ބައްދަލުވުން ހޫނުވެ، ހަމަނުޖެހުން ވެސް އުފެދުނެވެ.
އެ ބައްދަލުވުމުގައި ސެނެޓުން ނިންމީ އިންތިޚާބުގައި ވާދަކުރުމަށެވެ. ނަމަވެސް ރޭވެސް އަނބިކަނބަލުން ފާތިމަތު އިބްރާހީމް މެދުވެރި ކުރައްވައި ޔާމީން ވަނީ ސެނެޓުގެ ނިންމުން ބަލައިނުގަންނަ ކަމަށް ވިދާޅުވެފައެވެ.
އެހެން ނަމަވެސް، ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިއަދު ވަނީ ކެންޑިޑެންސީ ފޯމު ހުށަހަޅުއްވައިފައެވެ. އެއާއެކު ޔާމީން ވަނީ ގޮތް ދޫކުރައްވާ މުއިއްޒަށް ތާއިދުކުރަން ނިންމަވައިފައެވެ.