06 Aug 2023, 14:09
އިދިކޮޅު އެންމެ ބޮޑު ޕާޓީ ޕީޕީއެމުން ރިޔާސީ އިންތިޚާބު ބޮއިކޮޓު ކުރަން އެ ޕާޓީގެ ރިޔާސީ ކެންޑިޑޭޓު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމް އެންގެވި ގޮތަށް އިންތިޚާބު ބޮއިކޮޓު ކޮށްފި ނަމަ، ރައީސް އިބްރާހިމް މުހައްމަދު ޞާލިޙަށް މާ ފުރުސަތު ބޮޑު ވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.
ވ. އާރަށު މައްސަލައިގައި މިދިޔަ ޑިސެމްބަރު 25 ގައި ޔާމީންގެ މައްޗަށް ކްރިމިނަލް ކޯޓުން އިއްވި 11 އަހަރުގެ ޖަލު ހުކުމުގެ ސަބަބުން، އެ މަނިކުފާނުގެ ކެންޑިޑެސީ ބަލައިނުގަންނަން އިލެކްޝަންސް ކޮމިޝަން (އީސީ)ން ވަނީ ނިންމައިފައެވެ.
އެކަމަކު، އެ ހުކުމް އިސްތިއުނާފު ކޮށްފައި އޮތުމުން، ނިހާއީ ހުކުމެއް ނެތް ހާލަތުގައި އެ މަނިކުފާނަށް ވާދަ ކުރެއްވެން ވާނެކަމަށް ގަބޫލުކޮށް، ޔާމީންގެ ފަރާތްޕުޅުން އެ މައްސަލަ ސުޕްރީމް ކޯޓަށް ވެއްދީއެވެ. އެ މައްސަލަ އެ ކޯޓުގައި ބެއްލެވި ހަތް ފަނޑިޔާރުންގެ އިއްތިފާގުން ނިންމީ، ޔާމީންގެ ކެންޑިޑެސީ ބަލައިނުގަންނަން އީސީން ނިންމީ ރަނގަޅަށް ކަމަށެވެ. އަދި، ނިހާއީ ހުކުމެއް ނެތް ނަމަވެސް، މަތީ މަރުހަލާ ކޯޓަކުން ކުރީގެ ހުކުމް ބާތިލު ނުކުރާނަމަ، އެ ހުކުމް ދެމިއޮންނާނެ ކަމަށެވެ. އެހެންވެ، ޔާމީނަށް ވާދަ ކުރެއްވެން އޮތް އެންމެ ފަހު ދޮރު ވެސް ވަނީ ބަންދުވެފައެވެ.
"ސަން"އަށް އެނގިފައިވާ ގޮތުގައި، ޕީޕީއެމް/ޕީއެންސީގެ ލީޑާޝިޕުން ވަނީ ދެން އިންތިޚާބުގައި އަމަލު ކުރާނެ ގޮތެއް ކަނޑައެޅުމަށް ކުއްލި ބައްދަލުވުމަކަށް ގޮވައިފައެވެ. އެ ބައްދަލުވުމުގައި ނިންމާފައިވަނީ އިންތިޚާބު ބޮއިކޮޓު ކުރަން ޔާމީން އެންގެވި އެންގެވުމާ ގުޅޭ ގޮތުން މަޝްވަރާ ކޮށްފައެވެ. އެހެންވެ، އިންތިޚާބު ބޮއިކޮޓު ކުރުމާ ގުޅޭ ގޮތުން ގޮތެއް ނިންމުމަށް ބާއްވާ ސެނެޓު ބައްދަލުވުން މިހާރު އެބަ ކުރިއަށް ދެއެވެ.
ކަން މިހެން އޮއްވައި ކުރެއްވި ޓުވީޓެއްގައި ނަޝީދު ވިދާޅުވީ، އިންތިޚާބު ބޮއިކޮޓު ކުރުމަކީ ރައީސް ޞާލިޙަށް އެންމެ ފުރުސަތު ބޮޑު ވާނެ ގޮތް ކަމަށާއި ޕީޕީއެމްގެ އެންމެހައި މެންބަރުން އަދި އިތުރަށް ވިސްނަވަން އެދިލައްވައި ކަމަށެވެ.
"އުންމީދު ނަގައިނުލައްވާ ޑިމޮކްރެޓްސްއާ އެކު ކުރިއަށް ވަޑައިގަންނަވާ. ﷲގެ އިރާދަފުޅާ އެކު ކާމިޔާބު ވާނެ،" ނަޝީދު ވިދާޅުވިއެވެ.
ޔާމީނަށް ވާދަ ނުކުރެއްވިދާނެ ހާލަތަކަށް ބަލައި، ޕީއެންސީގެ ސެނެޓުން ވަނީ އިންތިޚާބުގައި ވާދަކުރަން ނިންމައިފައެވެ. އަދި، އެ މަނިކުފާނަށް ވާދަ ނުކުރެވޭ ހާލަތެއްގައި ވާދަކުރައްވަން މާލޭގެ މޭޔަރު ޑރ. މުހައްމަދު މުއިއްޒަށް ޓިކެޓު ދޭން އެ ޕާޓީގެ ސެނެޓުން ވަނީ ނިންމައިފައެވެ.
އެކަމަކު، ޕީޕީއެމުން ފަހުން ބުނެފައިވަނީ އެ ޕާޓީން ކެންޑިޑޭޓަކު ނެރެން ބޭނުންވާ ކަމަށެވެ. އަދި، ޔާމީން ނެތް ހާލަތެއްގައި މުއިއްޒަށް ތާއީދު ކުރަން އެ ޕާޓީން ނުނިންމާ ކަމަށެވެ.
އެނގިފައިވާ ގޮތުގައި ޕީޕީއެމްގެ ލީޑާޝިޕުން ބޭނުން ވަނީ ޕީޕީއެމްގެ ކެންޑިޑޭޓެއް އިންތިޚާބަށް ނެރޭށެވެ. ސުޕްރީމް ކޯޓުން ޔާމީންގެ ހުކުމް ލަސްވެދާނެ ކަމަށް ބަލައި، ޔާމީން ހުށަހެޅުއްވި މައްސަލައިގައި ވެސް ވަނީ ޕީޕީއެމުން އިތުރު ކެންޑިޑޭޓެއް ނެރެން ފުރުސަތު ދެއްވަން އެދިވަޑައިގެންފައެވެ.