06 Aug 2023, 08:41
މަޝްހޫރު ރޮކް ބޭންޑު "ކުއީން"ގެ ލަވަކިޔުންތެރިޔާ ފްރެޑީ މާކިއުރީ ބޭނުންކޮށްފައިވާ ޕިއާނޯއެއް ނީލަމަށް ލައިގެން ވިއްކާލަން ތައްޔާރުވެއްޖެއެވެ.
ޖަޕާނުން ގަނެގެން 1975 ވަނަ އަހަރުގައި އިނގިރޭސިވިލާތަށް ގެންދިޔަ މި ޕިއާނޯއަކީ ފްރެޑީ އާންމުކޮށް މިއުޒިކް ތައްޔާރުކުރުމުގައި ބޭނުންކޮށްފައިވާ ޔަމަހާ ބްރޭންޑުގެ "ޖީ2" ޕިއާނޯއެކެވެ.
ނީލަމަށް ލައިގެން މި ޕިއާނޯ ވިއްކާލަން ތައްޔާރުވާއިރު ލަފާކުރެވޭ ގޮތުގައި 2.5 މިލިއަން ޑޮލަރާއި 3.8 މިލިއަން ޑޮލަރާ ދެމެދުގެ އަގަކަށް ޕިއާނޯ ވިއްކާލެވޭނެއެވެ.
ކުއީންގެ އެންމެ ފާހަގަކޮށްލެވޭ ލަވަ ކަމަށްވާ "ބޮހީމިއަން ރެޕްސޮޑީ" ތައްޔާރު ކުރުމުގައި މަސައްކަތް ކުރިއިރު ފްރެޑީ ބޭނުންކޮށްފައިވަނީ މި ޕިއާނޯއެވެ. މިއީ ޕިއާނޯގެ އަގު އެތައް ގުނައަކަށް އުފުލުމަށް މެދުވެރިވާ ސަބަބުތަކުގެ ތެރޭގައި ހިމެނޭ ސަބަބެކެވެ.
ފްރެޑީގެ ގާތް މީހުން ބުނާގޮތުގައި އެ ޕިއާނޯއަކީ ފްރެޑީ އޭނާގެ އެންމެ "ގާތް އެކުވެރިން"ގެ ތެރޭގައި ގުނާ އެކައްޗެވެ. މިއީ އޭނާގެ އެތައް މިއުޒިކެއް ހެދުމުގައި ބޮޑު ރޯލެއް ކުޅެފައިވާ އެއްޗެއް ކަމަށް ބުނެއެވެ.
ފްރެޑީ 1991 ވަނަ އަހަރު މަރުވުމުގެ ކުރިން އޭނާ ދިރިއުޅުން ބަދަލުކުރި ކޮންމެ ތަނަކަށް އޭނާ ޕިއާނޯ ގެންދިޔައެވެ. އޭނާ އެތައް ފަހަރެއްގެ މަތިން ވަނީ ދިރިއުޅޭ ތަން ބަދަލުކޮށްފައެވެ.
ފްރެޑީގެ ޕިއާނޯ ވިއްކާލުމުގެ މަސައްކަތް ކުރާނީ މަޝްހޫރު ނީލަން ކުންފުނި ކަމަށްވާ "ސަދަބީސް" އެވެ. މި ޕިއާނޯ ވިއްކާލާނީ އަންނަ މަހުގެ ފަހުކޮޅުގައި ބާއްވާ އިވެންޓެއްގައެވެ. ފްރެޑީގެ ޕިއާނޯގެ އިތުރުން، އޭނާ ގެންގުޅުނު ބައެއް ހިފާގެންގުޅޭ ތަކެތި ވެސް މި ނީލަން އިވެންޓުގައި ވިއްކާލުމަށް ވަނީ ހަމަޖެހިފައެވެ.