05 Aug 2023, 08:36
ބަތަލާ ނުޝްރަތު ބަރޫޗާގެ ކުރިއަށް އޮތް ފިލްމު "އަކެއްލީ"ގެ ޓްރެއިލާ އާއްމުންނަށް ދައްކާލައިފިއެވެ.
މިފިލްމަކީ، އަލަށް ފިލްމު ޑައިރެކްޝަނަށް ނުކުންނަ ޕްރަނޭގެ ފިލްމެކެވެ. ޕްރަނޭވަނީ ކާމިޔާބު ފިލްމުތައްކަމަށްވާ "ކުއީން" އަދި "ކޮމަންޑޫ"ގައިވެސް އެސިސްޓެންޓް ޑައިރެކްޓަރެއްގެގޮތުގައި މަސައްކަތްކޮށްފައެވެ.
ނުޝްރަތު ލީޑް ރޯލްއިން ފެންނަ މިފިލްމަކީ، ތުރިލާ ޑްރާމާއެކެވެ. ނުޝްރަތު ފެންނާނީ އިރާޤުގައި ކުރިޔަށްދާ ހަނގުރާމައިގައި ތާށިވެ އެނބުރި ޤައުމަށް ދިއުމަށް މަސައްކަތްކުރާ ހިތްވަރުގަދަ އިންޑިއާ އަންހެނެއްގެ ރޯލްއިންނެވެ.
ނުޝްރަތުއާއެކު އިޒްރޭލުގެ ޓެލެވިޒަން ސީރީސް "ފައުދާ"ގެ ތަރިންކަމަށްވާ ތުސާހީ ހަލޭވީއާއި އާމިރު ބޯޓްރޯސް މުހިއްމު ރޯލްތަކުން ފެންނާނެއެވެ.
މިފިލްމަކީ ހިންދީ ސިނަމާއަށް ތަޢާރަފުވުމަށް ލިބުނު ވަރަށް ރަނގަޅު ފުރުސަތެއްކަމަށާއި އިންޑިއާގެ ފިލްމު އިންޑަސްޓްރީ ތަޖުރިބާކޮށްލަން މިއަށްވުރެ ވަކި ރަނގަޅު ޓީމެއް ނުލިބޭނެކަމަށް އެ ތަރިން ވަނީ ބުނެފައެވެ.
މިމަހުގެ 18ވަނަ ދުވަހު ރިލީޒްކުރުމަށް ތައްޔާރުވެފައިވާ މިފިލްމުން ނުޝްރަތު ފެންނާނީ މީގެ ކުރިން އޭނާ ފެނިފައިނުވާ ފަދަ، އުނދަގޫ ރޯލަކުންކަމަށް ޑައިރެކްޓަރު ޕްރަނޭވަނީ ބުނެފައެވެ.
ނުޝްރަތުގެ ތިން ފިލްމެއް މިއަހަރު މިހާތަނަށްވަނީ ރިލީޒްކޮށްފައެވެ. އެއީ އަކްޝޭ ކުމާރުއާއި އިމްރާން ހާޝްމީ މުހިއްމު ރޯލްތައް ކުޅުނު ފިލްމު "ސެލްފީ"އާއި ފިލްމު "ޗަތުރަޕަތީ" އަދި ޚާއްޞަ ފެނިލުމަކުން ބަތަލާ ފެނިފައިވާ "ތޫ ޖޫތީ މޭ މައްކާރު"އެވެ.
ފިލްމު "އަކެއްލީ" ރިލީޒްކުރުމުގެ މަރުހަލާގައި އޮތްއިރު ނުޝްރަތު ސޮއިކޮށްފައިވާ "ޗޯރީ 2"ގެ މަސައްކަތްވެސްވަނީ ނިމިފައެވެ. މިފިލްމު ރިލީޒްކުރާނެ ތާރީޚެއް އަދި ކަށަވަރެއް ނުވެއެވެ. ފިލްމު "ޗޯރީ2"އަކީ ހަމަ މިނަމުގައި 2021ވަނަ އަހަރު ރިލީޒްކުރި ފިލްމުގެ ސީކުއަލްއެކެވެ.