03 Aug 2023, 11:45
ޕީޕީއެމްގެ ނައިބު ރައީސްގެ މަގާމުގައި ހުންނެވި މާލެ ސިޓީގެ މޭޔަރު ޑރ. މުހައްމަދު މުއިއްޒު މިއަދު ޕީއެންސީއަށް ސޮއި ކުރައްވައިފިއެވެ.
މުއިއްޒު ޕީއެންސީއަށް ސޮއި ކުރައްވާފައި މި ވަނި އަންނަ ރިޔާސީ އިންތިޚާބުގައި ވާދަކުރުމަށް ޕީއެންސީގެ ސެނެޓުން މިއަދު ނިންމާފައި ވަނިކޮށެވެ. އެ ޕާޓީގެ ފަރާތުން ވާދަ ކުރައްވާނެ ކެންޑިޑޭޓެއް އަދި އިއުލާން ކޮށްފައި ނުވާއިރު، މިއަދު 14:00 އާ ހަމައަށް ނަން ހުށަހެޅުމުގެ ފުރުސަތު އެ ޕާޓީން ވަނީ ހުޅުވާލައިފައެވެ.
އިދިކޮޅު ކޯލިޝަނުން ޔާމީނަށް ތާއީދު ކުރި ނަމަވެސް އާރަށު މައްސަލައިގައި އެ މަނިކުފާނުގެ މައްޗަށް އިއްވާފައިވާ ޖަލު ހުކުމުގެ ސަބަބުން ކެންޑިޑަސީ ފޯމު ބަލައިނުގަތުމަށް އިލެކްޝަންސް ކޮމިޝަން (އީސީ)ން ވަނީ ނިންމާފައެވެ.
އިދިކޮޅު ލީޑާޝިޕުން މީގެ ކުރިން ތިން ފަހަރެއްގެ މަތިން ވަނީ ޔާމީން ކެންޑިޑޭޓެއް ކަނޑައަޅުއްވައިދެއްވަން އެދިވަޑައިގެންފައެވެ. އެކަމަކު، ވަކި ބޭފުޅަކު އިޙްތިޔާރު ކުރައްވަން ދެކޮޅު ހައްދަވައި، އެ މަނިކުފާނު ވަނީ އެ ބާރު ސެނެޓަށް ދޫކޮށްލައްވައިފައެވެ.
މުއިއްޒުގެ އިތުރުން ޕީއެންސީގެ ޕީޖީ ލީޑަރު އަދި ކުރީގެ ޑިފެންސް މިނިސްޓަރު އާދަމް ޝަރީފު އުމަރު ވަނީ ޝައުގުވެރިކަން ފާޅު ކުރައްވައިފައެވެ. އެނގިފައިވާ ގޮތުގައި، ޕީއެންސީގެ ރިޔާސީ ޓިކެޓަށް އިތުރު ބޭފުޅަކު ޝައުގުވެރިކަން ފާޅު ކޮށްފައެއް ނުވެއެވެ.
އެ ޕާޓީން މިއަދު ހަވީރު ބާއްވާ ސެނެޓު ބައްދަލުވުމުގައި ކެންޑިޑޭޓަކު ނިންމަން ވަނީ ހަމަޖެހިފައެވެ.