03 Aug 2023, 07:55
އެމެރިކާގެ މުނިފޫހިފިލުވުމުގެ އިންޑަސްޓްރީގައި ހަރަކާތްތެރިވާ ލިޔުންތެރިންނާއި އެކްޓަރުން ކުރަމުން ގެންދާ ހަޅުތާލުތައް ހުއްޓުވުމަށް ބޮޑެތި ޕްރޮޑަކްޝަން ކުންފުނިތައް ބައްދަލުކުރަން ނިންމައިފިއެވެ.
އެމެރިކާގެ ރައިޓާސް ގިލްޑް (ޑަބްލިއުޖީއޭ) އިން އަންނަނީ ލިޔުންތެރިންނަށް މުސާރަ ލިބުމުގެ މައްސަލައިގައި މިދިޔަ މެއި މަހުގެ ދެވަނަ ދުވަހުން ފެށިގެން ހަޅުލާތު ކުރަމުންނެވެ. ޓީވީ ޝޯތަކާއި ފިލްމުތަކުގައި މަސައްކަތް ކުރާ ލިޔުންތެރިންނަށް އެކަށީގެންވާ އުޖޫރާ ނުދިނުމާ ގުޅިގެން މި ހަޅުލާތު ފަށާފައިވާއިރު އެކަމާ ގުޅިގެން އެތައް ބައެއް އަންނަނީ މަސައްކަތްތައް ހުއްޓައިލަމުންނެވެ. މި ހަޅުތާލުތަކުގައި އެކްޓަރުން ވެސް ވަނީ މިދިޔަ މަހުން ފެށިގެން ބައިވެރިވެފައެވެ.
މައްސަލަ ހޫނު ވެފައިވާއިރު ބޮޑެތި ސްޓްރީމިން ސާވިސްތަކާއި ޕްރޮޑަކްޝަން ކުންފުނިތަކުން ގިނަ ދުވަސްތަކެއް ވަންދެއް ދިނީ ބީރު ކަންފަތެކެވެ.
އެންމެ ފަހުން މިކަމާ ގުޅިގެން ޕްރޮޑަކްޝަންތަކުން ބައްދަލުވުމަށް ވަނީ ހަމަޖެހިފައެވެ. މި ބައްދަލުވުންތަކުގައި ބައިވެރިވާ ޕްރޮޑަކްޝަން ކުންފުނިތަކުގެ ތެރޭގައި ޑިޒްނީ އާއި ޔުނިވާސަލް އަދި ޑަބްލިއުބީ ހިމެނެއެވެ. މި ކުންފުނިތަކުން ދެން މަސައްކަތް ކުރާނީ ޑަބްލިއުޖީއޭ އާ ބައްދަލުކޮށް އެއްބަސްވުމަކަށް އަންނާށެވެ.
މައުލޫމާތު ލިބޭގޮތުގައި މި ހަފުތާ ބަންދުގެ ތެރޭގައި ސްޓޫޑިއޯތަކުން ޑަބްލިއުޖީއޭގައި ހިމެނޭ ލިޔުންތެރިންނާ ބައްދަލުކުރާނެއެވެ.
ލިޔުންތެރިންނާއި އެކްޓަރުން މި ހަޅުތާލަށް ނިކުމެ މަސައްކަތްތައް ހުއްޓުމުގެ ސަބަބުން ހޮލީވުޑްގެ ބޮޑެތި ބައެއް ޕްރޮޖެކްޓުތައް ވަނީ ޑިލޭ ކޮށްފައެވެ. ބައެއް ޕްރޮޖެކްޓްތައް ވަނީ ރިލީޒްކުރާނެ ދުވަހެއް ނޭނގޭ ގޮތަށް ވެސް ލަސްވެފައެވެ.
އެކްޓަރުންނާއި ލިޔުންތެރިން މިފަދަ ހަޅުތާލެއް އެންމެ ފަހުން ކޮށްފައިވަނީ 1980ގައެވެ. އެއީ ހޮލީވުޑްގައި ބޮޑެތި ޕްރޮޑަކްޝަން ކުންފުނިތަކުން އިތުރު ބަޔަކަށް ފިލްމު ނެރުމުގެ ހުއްދަތައް ދީފައި ނުވުމުންނެވެ. އޭރު ފިލްމުތަކާއި ޝޯތައް ދެއްކެނީ އެންމެ ތިން ޕްރޮޑަކްޝަނަކަށެވެ. ހަޅުތާލަށް އެކްޓަރުން ނިކުތުމާއެކު ފިލްމު އިންޑަސްޓްރީ ޑިމޮކްރަޓައިޒް ކުރުމަށް ބޮޑު ފިޔަވަޅަކަށް ވެގެން ދިޔައެވެ.