02 Aug 2023, 21:22
ކުރިއަށް އޮތް ރިޔާސީ އިންތިހާބުގެ ފުރަތަމަ ބުރުގައި އެހެން ކެންޑިޑޭޓެއްގެ ފަހަތަށް ނާރަން ޖުމްހޫރީ ޕާޓީ (ޖޭޕީ)ގެ ކައުންސިލުން މިއަދު ނިންމައިފިއެވެ.
މިއަދު ވަނީ ޖޭޕީގެ ކުއްލި ކައުންސިލް ބައްދަލުވުމެއް ބާއްވާފައެވެ. ގާތްގަނޑަކަށް ދެ ގަޑިއިރަށް ކުރިއަށް ދިޔަ މި ބައްދަލުވުމަށް ފަހު ނޫސްވެރިންނާ ވާހަކަދައްކަވަމުން އެ ޕާޓީގެ އިސްތަރުޖަމާނު އަލީ ޞާލިޙް ވިދާޅުވީ، އަންނަ މަހު ބާއްވާ ރިޔާސީ އިންތިހާބުގައި އެހެން ކެންޑިޑޭޓެއްގެ ފަހަތަށް ނާރައި، ގާސިމް އިންތިހާބުގައި ވާދަކުރަން ކައުންސިލުން މިއަދު ނިންމި ކަމަށެވެ.
މީގެކުރިން ގާސިމް ވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، އެމްއެންޕީގެ ރިޔާސީ ކެންޑިޑޭޓު މުހައްމަދު ނާޒިމާއެކު މަޝްވަރާ ކުރައްވައި، އެއް ކެންޑިޑޭޓަކު ނެރެން ނިންމިކަން އިއުލާން ކުރައްވާފައެވެ.
ނަމަވެސް މާގިނަ ދުވަސްތަކެއް ނުވެ ފެނުނީ ކޮންމެ ޕާޓީއަކުން ވެސް ވަކިން ކެންޑިޑޭޓަކު ނެރެ ކެމްޕެއިން ކުރަން ފެށި ތަނެވެ.
އަލީ ޞާލިޙް ވިދާޅުވީ މިއަދު ބޭއްވި ކައުންސިލްގެ ބައްދަލުވުމުގައި އެހެން ޕާޓީތަކާއެކު ގާސިމް ކުރެއްވި މަޝްވަރާގެ މައުލޫމާތު އެމަނިކުފާނު ހިއްސާކުރެއްވި ކަމަށެވެ.
"މިއަދު ބޭއްވި ކައުންސިލް ބައްދަލުވުމުން ނިންމީ އެހެން ޕާޓީއެއްގެ ފަހަތަށް ނާރަން. ގާސިމް އިބްރާހީމް އިންތިހާބުގައި ވާދަކުރައްވާނެ،" އަލީ ޞާލިޙް ވިދާޅުވިއެވެ.
އެފަދައިން ނިންމި ނަމަވެސް، ޖޭޕީ އާ އެހެން ޕާޓީތަކާ ދެމެދު އޮންނަ ގުޅުން ހީނަރު ނުވާނެ ކަމަށް އަލީ ޞާލިޙް ވިދާޅުވިއެވެ.
މިއަދު ބޭއްވި ކައުންސިލް ބައްދަލުވުމުގައި ވަނީ ރަނިންމޭޓަކު ކަނޑައެޅުމުގެ ފުރިހަމަ އިޚްތިޔާރު ގާސިމަށް ދީފައެވެ.
"ގާސިމް އިބްރާހީމްގެ ކެންޑިޑެސީ ފޯމް އިލެކްޝަންސް ކޮމިޝަނަށް ހުށަހެޅުމަށްޓަކައި ކުރަންޖެހޭ މަސައްކަތްތައް ކުރިއަށް އެބަދޭ،" އަލީ ޞާލިޙް ވިދާޅުވިއެވެ.
ފާއިތުވި ހުރިހާ އިންތިހާބުތަކެއްގައި ރިޔާސީ ކެންޑިޑޭޓުންނަށް އިންތިހާބު ކާމިޔާބު ކޮށްދިނުމަށް ގާސިމް މުހިންމު ދައުރެއް އަދާ ކުރެއްވިއެވެ.