02 Aug 2023, 14:51
މަސް ދޯނި ފަހަރުގައި ލޮނުފެން ފިނިކުރާ ނިޒާމު ހަރުކުރުމަށް ސަރުކާރުންދޭ "ކަނޑުފަޅު ނަފާ ލޯނު"ގެ ފައިސާ ސީދާ އޮޑިވެރިންގެ އެކައުންޓަށް ޖަމާވާ ގޮތަށް އުސޫލު ބަދަލުކޮށްފިއެވެ.
މީގެ ކުރި އެ ލޯނުގެ ފައިސާ ޖަމާކޮށްދެމުން ދިޔައީ އެ ސިސްޓަމް ސަޕްލައިކޮށް، ހަރުކޮށްދޭ ކުންފުންޏަށެވެ.
ފިޝަރީޒް މިނިސްޓްްރީން މިއަދު ބުނީ މިއަދުން ފެށިގެން އެ ލޯނުގެ ފައިސާ ދޫކުރާނީ އެޕްލިކޭޝަން ފޯމާ އެކު ކޯޓޭޝަނެއް ހުށަހެޅުމުން ކަމަށެވެ. އެއާ އެކު، އަމިއްލައަށް ސިސްޓަމް ގެނެސް ހަރުކުރުމަށް ބޭނުންވާ އޮޑިވެރިންނަށް ވެސް ލޯނުގެ ފުރުސަތު ލިބޭނެ ކަމަށް އެ މިނިސްޓްރީން ބުނެއެވެ.
އެސްޑީއެފްސީއާއި، ފިޝަރީޒް މިނިސްޓްރީ ގުޅިގެން މިދިޔަ އަހަރުގެ ނޮވެންބަރު މަހު، 34 މިލިއަން ރުފިޔާގެ ފަންޑަކާ އެކު، ތައާރަފުކުރި އެ ސްކީމުގެ ދަށުން ފައިސާ ދޫކުރުމަށް ހަމަޖެހިފައިވަނީ 500،000 ރުފިޔާއާ ހަމައަށެވެ.
އެ ފައިސާ ދޫކުރަނީ ހަ ޕަސެންޓުގެ އިންޓަރެސްޓަކާ އެކު، ހަ އަހަރު ދުވަސްތެރޭ އަނބުރާ ދައްކާގޮތަށް، ރަހުނަކާ ނުލައެވެ. ފެން ފިނިކުރާ ނިޒާމު ގަތުމަށާއި، ހަރުކުރުމަށް ހިނގާ ހުރިހާ ހަރަދަކަށް އެ ފައިސާ ބޭނުން ކުރެވެއެވެ.
ފިޝަރީޒް މިނިސްޓްރީން ބުނީ މިހާތަނަށް ފަސް އޮޑިއަކަށް ލޯނު ހަމަޖެހި، އެއްބަސްވުމުގައި ސޮއިކުރުމަށް ތައްޔާރުވެފައިވާ ކަމަށެވެ. އަދި، އުސޫލަށް ގެނައި ބަދަލާއެކު އިތުރު އޮޑިވެރިން އެ ކަމަށް ޝައުގުވެރިވާނެ ކަމަށް ގަބޫލުކުރާ ކަމަށެވެ.
ދޯނި ފަހަރުގައި ފެން ފިނިކުރާ ނިޒާމު ގާއިމުކުރުމަށް ލޯނު ދޫކުރުމަށް މިނިސްޓްރީން ނިންމީ މަސްވެރި މޫސުމުގައި އައިސް ހޯދުމަށް ދިމާވާ ދަތިކަމަށް ލުޔެއް ހޯދުމަށެވެ. މި ސިސްޓަމް ހަރުކޮށްފައި ހުންނަ އުޅަނދުތަކުގައި ގިނަ އިރު މަސް ތާޒާ ކަމާއެކު ބެހެއްޓޭތީ، ކަނޑުމަތީ މަސްވެރިކަމުގައި ގިނަ ވަގުތު އުޅުމުގެ ފުރުސަތު ލިބެއެވެ.