30 Jul 2023, 23:37
ފުވައްމުލައް ސިޓީން، މުޙައްމަދު ނާއިލް ޙަފީޒް
މި ދައުރުގައި ކުރެވުނު ތަޖުރިބާގެ އަލީގައި ދެވަނަ ދައުރަކަށް ރައީސް އިބްރާހިމް މުޙައްމަދު ޞާލިހު ހޮވުން މުހިންމުކަމަށް އެ މަނިކުފާނުގެ ކޯލިޝަން ޕާޓްނަރު އެމްޑީއޭގެ ރައީސް އަހްމަދު ސިޔާމް މުޙައްމަދު ވިދާޅުވެއްޖެއެވެ.
ފުވައްމުލަކުގައި އޮތް ރައީސް އިބްރާހިމް މުޙައްމަދު ޞާލިހުގެ ކެމްޕޭން ޖަލްސާގައި ވާހަކަފުޅުދައްކަވަމުން ސިޔާމް ވިދާޅުވީ ހިތްދަތި ހާލަތްތަކާއި އެ ނޫން ހާލަތްތަކުގައި ވެސް އެކި މީހުންނާއެކު އެކި ކަންކަން ތަޖުރިބާކުރަން ޖެހޭކަމަށެވެ.
އަދި އަބަދުވެސް ދެކެވޭ ވާހަަކައަކީ ތަޖުރިބާގެ އަލީގައި މަސައްކަތްކުރުމުގެ މުހިންމުކަމުގެ ވާހަކަކަމަށް ސިޔާމް ވިދާޅުވިއެވެ.
"އަަޅުގަނޑުމެން ކުޑައިރުއްސުރެ ވެސް އަހާ ވާހަކައެއް މީ ތަޖުރިބާގެ އަލީގައި ކަންތައްތައްކުރަން. ތަޖުރިބާ ލިބޭ ގޮތުގެ މަތިން ކަންތައްތައްކުރަން،" ސިޔާމް ވިދާޅުވިއެވެ.
އެ ވާހަކަފުޅަށް ބާރު ދެއްވައި ސިޔާމް ދެެއްކެވީ ކޮވިޑް19ގެ ހާލަތުގެ ވާހަކަފުޅެވެ.
ސިޔާމް ވިދާޅުވީ ރާއްޖޭގައި ކޮވިޑުގެ ހާލަތް މެނޭޖުކުރީ ދުނިޔޭގެ ބޮޑެތި ބާރުތަކަށް ވެސް މެނޭޖުކުރެވިފައިނުވާހާ ފުރިހަމަކޮށްކަމަށެވެ.
އެގޮތުން ޓޫރިޒަމަށް މުޅި ރާއްޖޭގެ އިގްތިޞާދު ބިނާވެފައި އޮތް އިރު އެ ހާލަތަކީ މުޅި ޓޫރިޒަމް އިންޑަސްޓްރީ ރާއްޖެއިން ނެތި ދިޔުމުގެ ބިރު އޮތް ވަގުތެއްކަމަށް ސިޔާމް ވިދާޅުވިއެވެ.
އެމްޑީއޭގެ ރައީސް އަހްމަދު ސިޔާމް މުޙައްމަދު ފުވައްމުލަކުގައި ރައީސްގެ ކެމްޕޭން ޖަލްސާގައި ވާހަކަފުޅުދައްކަވަނީ -- ފޮޓޯ/ އެމްޑީޕީ
"އަޅުގަނޑު އިންޑަސްޓްރީގެ އެންމެ ބޮޑަށް ތިބި މީހުންނާ ވާހަކަދެއްކިން. އޭގެ ތެރޭގައި ގާސިމް އިބްރާހީމް، [ހުސައިން]އަފީފް، [މުހައްމަދު އުމަރު މަނިކު] މޮހޮދޭ، މި ބޭފުޅުންނަށް އަޅުގަނޑު ފޯނުން ގުޅިން، ވާހަކަދެއްކިން އަދި ބައްދަލު ވެސް ކުރިން. އޭގެ ތެރެއިން ބައެއް ބޭފުޅުން މި ވިދާޅުވަނީ ތިމަންނަމެންގެ ދުވަސް މި ދިޔައިއްޔޭ،" ސިޔާމް ވިދާޅުވިއެވެ.
އެއީ ޓޫރިޒަމް އިންޑަސްޓްރީގެ ވެރިންނާ ރައީސް ބައްދަލުކުރައްވަން ނިންމެވި ވަގުތުކަން ފާހަގަކުރައްވައި ސިޔާމް ވިދާޅުވީ ރައީސް އޮފީހުގައި ކުރެވުނު މަޝްވަރާތަކުން ރައީސް ދެއްކެވީ އެ ހާލަތުގައި ކުރިއަށްދާނެ މަގާއި، ޔަގީންކަން ކަމަށެވެ.
"އެ ދުވަހު އެ މަނިކުފާނު އަޅުގަނޑުމެން އެންމެން ގެންގޮސް ހުރިހާ އިންޑަސްޓްރީގެ ބޮޑެތި މީހުންނާ ބައްދަލުކުރައްވައި ވިދާޅުވަނީ ތިމަންނަ އިރާދަކުރެއްވިއްޔާ ތި ވިޔަފާރިތައް ހަލާކުވެ، މީހުން ބަނޑަށްޖެހި މީހުންނަށް ނޫޅެވޭވަރު ވެގެން ދިޔަ ނުދޭނަމޭ،" ސިޔާމް ވިދާޅުވިއެވެ.
އޭނާ ވިދާޅުވީ ޓޫރިޒަމަކީ ރާއްޖޭގެ އާމްދަނީއަށް އޮތް އެންމެ ބޮޑުު ދާއިރާއަށްވީއިރު އެ ދާއިރާއާ ނުލައި، އެހެން ދާއިރާތައް ވެސް ކުރިއަށް ނުދާނެކަމަށެވެ.
"ޓޫރިޒަމް އިންޑަސްޓްރީއަކީ ދިވެހިރާއްޖޭގެ ލޭނާރު ކޮންމެ ގޮތެއް ވިޔަސް ވެސް. އެ ނޫން ގޮތަކަށް ފައިސާއެއް ނުލިބޭ. މަސްވެރިން ވެސް މަހަށް ފޮނުވަނީ ޓޫރިޒަމުން ލިބޭ ލާރިންކަން ތިބޭފުޅުން ދަންނާނެ،" ސިޔާމް ވިދާޅުވިއެވެ.
ސިޔާމް ވިދާޅުވީ ކޮވިޑާ ގުޅިގެން ގާތްގަނޑަކަށް ތިން ބިލިއަން ރުފިޔާ އެކި ވިޔަފާރިތަކާއި ކުދި އަދި މެދުފަންތީގެ ވިޔަފާރިތައް ކުރިއަރުވަން ދޫކުރިކަމަށެވެ.
"އެހެންވީމާ މީގައި ވިސްނަންޖެހޭ ކަމަކީ އަޅުގަނޑުމެންގެ ތަޖުރިބާގެ އަލީގައި މަސައްކަތް ކުރުން. ފޮނި އެއްޗަކުން ނުކުންނާނީ ފޮނި އެއްޗެއް. އެ ޝަައްކެތް އޮތް ކަމެއް ނޫން. އެ ފިތާލީމާ އަންނަނީ ފޮނި،" ސިޔާމް ވިދާޅުވިއެވެ.
ސިޔާމް ވިދާޅުވީ ހޮވަންވީ ޕޯޑިއަމްތަކުގައިި ބަސް ގިނަ މީހުންނެއް ނޫން ކަމަށެވެ. އެންމެ ވިސްނުންތެރިކަމާ އެކު މަޑުމައިތިރިކަން އިސްކުރާ ބޭފުޅަކު ކަމަށެވެ.
"ޓެސްޓުން ފާސްވެފައި ހުރި މީހަކާ އެކު ކުރިއަށްދިއުން މާ ރަނގަޅު ނޫންތޯ،" ސިޔާމް ވިދާޅުވިއެވެ.