27 Jul 2023, 16:02
ސަރުކާރު ކޯލިޝަންގައި ހިމެނޭ މޯލްޑިވްސް ރިފޯމް މޫވްމަންޓު (އެމްއާރުއެމް)، މި އަހަރުގެ ރިޔާސީ އިންތިޚާބުގައި ސަރުކާރާ އެކު ކޯލިޝަން ނުހަދާނެކަން ހާމަ ކުރުމުން، ރައްޔިތުން މަޖިލީހުގެ މަރަދޫ ދާއިރާގެ އެމްޑީޕީ މެންބަރު އިބްރާހިމް ޝަރީފް، އެ ޕާޓީއަށް ވަރަށް ބޮޑަށް ފާޑު ވިދާޅުވެއްޖެއެވެ.
ސެޕްޓެމްބަރު ނުވައެއްގައި އޮންނަ އިންތިޚާބުގައި ވެސް އެކުގައި މަސައްކަތް ކުރަން ރައީސް އިބްރާހިމް މުހައްމަދު ޞާލިޙް ފޮނުއްވި ދައުވަތަށް ހަ މަހަށް ވުރެ ގިނަ ދުވަސްވީ ފަހުން، އެމްއާރުއެމުން މިއަދު ވަނީ އެ ދައުވަތު ގަބޫލުނުކުރާނެކަން ހާމަކޮށް، ބަޔާނެއް ނެރެފައެވެ. އެ ޕާޓީން ބުނީ، އެމްޑީޕީގެ ސިޔާސަތުތައް ކަމުނުދާތީ، އެމްޑީޕީއާ އެކު ކޯލިޝަން ހަދަން ބޭނުންނުވާ ކަމަށެވެ.
އެ ކަމާ ގުޅިގެން ނުރުހުން ފާޅު ކުރައްވާ، ޝަރީފް މިއަދު ވިދާޅުވީ އެމްއާރުއެމަކީ އެމްޑީޕީން ޖެހިލުންވާ ވަރުގެ ޕާޓީއެއް ނޫން ކަމަށެވެ. އަދި، ސަރުކާރު ކޯލިޝަންގައި އޮވެގެން ވެސް ސަރުކާރަށް ކުރީ ޖެއްސުން ކަމަށް ވިދާޅުވެ، ވަރަށް ބޮޑަށް ނުރުހުންވިއެވެ.
"ކޯލިޝަންގެ ތެރޭ އޮވެ، ސަރުކާރަށް ޖެއްސުން ކުރަމުން އައި 3،000 މެންބަރުން ހަމަނުވާ ޕާޓީއެއް ކޯލިޝަން ތެރޭ އޮތުމަށް ވުރެ ނެތުން ހާސް ތަނުން ރަނގަޅު،" ޝަރީފް ވިދާޅުވިއެވެ.
ކުރީގެ ރައީސް މައުމޫން އަބްދުލްގައްޔޫމުގެ އެމްއާރުއެމުން މިއަދު ބުނެފައިވަނީ، އެމްޑީޕީން ދިން ކޯލިޝަންގެ ދައުވަތަށް އެ ޕާޓީއާ އެކު މަޝްވަރާ ކުރި ނަމަވެސް އެމްޑީޕީން ހުށަހެޅި ކަންކަމަށް އެއްބަސްނުވެވޭތީ އެ ޕާޓީގެ އެގްޒެކެޓިވް ކޮމިޓީން މި އަހަރު ބޭއްވި 10 ވަނަ ބައްދަލުވުމުގައި ނިންމީ ރައީސާ އެކު މަސައްކަތް ނުކުރަން ކަމަށެވެ.
އެހެންވެ، އެ ޕާޓީން ވަނީ އިދިކޮޅު ސިޔާސީ ޕާޓީތަކާ އެކު މަޝްވަރާ ވެސް ކޮށްފައެވެ. އަދި، އެ ޕާޓީތަކުން އެއް ކެންޑިޑޭޓަކު ނެރުމާ ގުޅޭ ގޮތުން ވެސް ވަނީ މަޝްވަރާ ކޮށްފައެވެ.
އެކަމަކު، 3،000 މެންބަރުން ހަމަނުވެގެން އިލެކްޝަންސް ކޮމިޝަނުން އުވާލަން ވެސް ނިންމި، އެމްއާރުއެމުން ވެސް ވަނީ އެ ޕާޓީގެ ކެންޑިޑޭތެއް ރިޔާސީ ރޭހަށް ނެރެން ނިންމައި، ޕްރައިމަރީއަށް ހުޅުވާލައިފައެވެ. އެ ޕާޓީގެ ޕްރައިމަރީގައި ވާދަކުރަން މިހާތަނަށް ފޯމު ލާފައިވަނީ މައުމޫން ދަރިކަލުން އަދި ޕާޓީގެ ރައީސް ފާރިސް މައުމޫން އެކަންޏެވެ.