24 Jul 2023, 11:15
"ޒުވާނުން މި ތިބީ އަވަދިވެފައި،"
ރޭ ހައުސް އޮފް ޑިމޮކްރެޓްސްގައި އެ ޕާޓީގެ ޒުވާން އެކްޓިވިސްޓު ފާތިމަތު ހަމްދާ ކިޔައިދިނީ ޒުވާނުންގެ ހާލަތެވެ. ދިރިއުޅުމުގައި ޒުވާނުންނަށް ފަތަން އޮތް ނިމުމެއް ނުވާ ކަނޑުގެ ބިޔަ ރާޅުތަކުގެ ވާހަކައެވެ. އޭނާގެ އަމިއްލަ ތަޖުރިބާއިންނެވެ.
ވަރަށް މޮޅަށް އެ ކަން ބަޔާން ވެސް ކޮށްދިނެވެ. ޒުވާނާގެ ވާހަކައިން ތަންކޮކޮޅު ނަގައިގެން ރެޔާއި މިއަދު މުޅި މީސްމީޑީއާގައި އޮތީ އެޔެވެ. އެއީ، ހަމްދާ ދެއްކި ވާހަކައިގެ ތެދެއް ވެސް އޮތީމައެވެ. ޒުވާނުންގެ އަޑު ސިޔާސީ ޕޯޑިއަމުން އިވުނީމައެވެ. ޒުވާނުން އުޅޭ ހާލު، ބުނެ ދިނީމައެވެ.
ވާހަކަ ފަށަމުން ހަމްދާ ކުރީ ސުވާލެކެވެ. "ބަޔަކު މޭ ފުއްޕާފައި" ގައުމު ސްޓޭބަލްއޭ ބުނާއިރު، އެއީ ކޮން ގޮތަކުންތޯ ޒުވާނާ ސުވާލު ކުރިއެވެ.
"ރާއްޖޭގައި މި ވަގުތު އަޅުގަނޑުމެންގެ މެންޓަލް، އިމޯޝަނަލް، ފިޒިކަލް، ސައިކޮލޮޖިކަލް، ނުވަތަ ފިނޭންޝަލް ސްޓެބިލިޓީއެއް އެއްވެސް ގޮތަކަށް ނެތް،" ޒުވާނާގެ ސުވާލަށް އޭނާ ޖަވާބު ދޭން ފެށިއެވެ.
"ދިރިއުޅުމުގެ ވައްޓަފާޅި ބިނާވެފައި އޮންނަ ގޮތުގެ ސަބަބުން، ގިނަ އާއިލާތައް މިހާރު ވަނީ ރޫޅިފައި. ބޮޑެތިވެފައި ތިބި އާއިލީ މައްސަލަތަކާއި ހިތްހަމަނުޖެހުންތަކާއި ހަމަނުޖެހުންތަކުގެ ތެރެއިން އާއިލީ ގުޅުންތަކަކީ ކިހާ މުހިއްމު ކަމެއްކަން ގަބޫލުކުރަން ބޭނުންނުވާ ޒާތަކަށް. ކައިވެންޏެއް ދަމަހައްޓާނެ މެންޓަލް ނުވަތަ އިމޯޝަނަލް ކެޕޭސިޓީއެއް ނުހުރޭ،"
ސިޔާސީ ދާއިރާއިން ކިޔަވާ ހަމްދާގެ ވާހަކައިގައި އެންމެން ޖެހުނެވެ. އެކި ފިކުރުތަކުގެ، ބޮޑެތި މަޝްހޫރު ބޭފުޅުންނާއި އަދި އާދައިގެ އާންމުން ވެސް އެ ވާހަކަތަކަށް ތާއީދެވެ.
އެއީ، މިއޮއްހާ ދުވަހު، އެނގިތިބެ އެކަކު ވެސް ދައްކަން ބޭނުންނުވި ވާހަކައެވެ.
"ރާއްޖޭގައި ދިރިއުޅުމުގެ ވައްޓަފާޅި މި އޮންނަނީ ރައްޔިތުން ދޮވެ ހުސްކުރާ އުސޫލުން. ދިރިއުޅުމުގެ އަގު މި ވަނީ އިންތިހާއަށް ބޮޑުވެފައި. ދިރިއުޅުމުގެ ޚަރަދުބަރަދު ބެލެހެއްޓުމަށް ދެތިން ވަޒީފާގެ އިތުރުން ފްރީލާންސް އެތައް ކަމެއް ކުރަން އެބަ ޖެހޭ. ކިޔަވަން ކޮލެޖަށް ދާން އެބަ ޖެހޭ. އެސައިމެންޓުތައް ނިންމަން ވަގުތު ވެސް ހޯދަން ޖެހޭ،" ހަމްދާ ކިޔައިދިނެވެ.
"އަޅުގަނޑުމެން މި ތިބެނީ އަވަދިވެފައި އިނގޭތޯ. އަވަދިވެފައި،"
ޒުވާނާ ބުނީ، ކަރަންޓާއި ފެނާއި ކުލި ދައްކާފައި މަސް ނިމޭއިރު ކާނެ އެއްޗެއް އަތުގައި ނޯންނަ ކަމަށެވެ. އަދި، އަމިއްލަ ކަންކަމަށް ހޭދަ ކޮށްލާނެ އެންމެ ލާރިއެއް ވެސް އަތުގައި ނޯންނަ ކަމަށެވެ.
"ވޭލާއިން އަގުހެޔޮ ރީތި ހެދުމެއް ލައިގެން، ދިރާގުން އިންސްޓޯލްމަންޓަށް ސެމްސަންގް އެސް 22 އަލްޓްރާއެއް ނަގައިގެން އުޅުނެއް ކަމަކު، އަޅުގަނޑުމެންގެ ހާލަތަކީ މިއީ އިނގޭތޯ. މިއީ ފިނޭންޝަލް އިންސްޓެބިލިޓީ. މި ހުރިހާ ކަމަކާ ވިސްނަވިސްނާ މީހާ ހުންނަނީ ހުލިވެފައި،" އޭނާ ބުންޏެވެ.
ޒުވާނުން ތިބެނީ ކުދިކުދި ކަންކަމާ ރުޅިގަދަ ވެފައި ކަމަށާއި ކޮންމެ ދުވަހެއް ނިމިދަނީ ދިރިހުރެވޭތޯ ކުރާ "ހަނގުރާމައިގައި" ކަމަށް އޭނާ ބުންޏެވެ. އެއީ، ހަމައެކަނި ހަމްދާގެ ހާލަތެއް ނޫނެވެ. ޒުވާނުންގެ ހާލަތެވެ.
ހަމްދާ ބުނީ އެފަދަ "ހަނގުރާމައެއް" ތެރޭ ޒުވާނުން އުޅޭއިރު، ވަޒީފާއަށް ފަރުވާ ކުޑަ ވާނެ ކަމަށެވެ. ޒުވާން ޖީލުގައި ވަޒީފާއަށް ދޭން ޖެހޭ އަހައްމިއްޔަތުކަން ދޭ ކުދިން މަދުވަނީ ކީއްވެކަން ކިޔައިދިނެވެ. ދެން ހަމްދާ ކިޔައިދިނީ އާބާދީ ދަށަށްދާ ސަބަބެވެ.
"އަޅުގަނޑު ކިތަންމެ އާއިލާއެއް ބޭނުންވި ކަމުގައި ވީނަމަވެސް މި ހާލަތުގައި ދަރިން ހޯދާކަށް، އާއިލާއެއް ބިނާ ކުރާކަށް ބޭނުމެއް ނޫން،" އޭނާ ބުންޏެވެ.
ދެން އޭނާ ބުނީ، ޒުވާނުން އުޅޭ ގޮތުގެ އިހްސާސް ބޮޑެތި އެޕާޓުމަންޓުތަކުގައި އަގުބޮޑު ކެއުން ކައިގެން އުޅޭ މީހުންނަށް "ގެޓު" ނުވާނެ ކަމަށެވެ. އެކަމަކު، އެއީ ޒުވާނުންގެ ހާލަތެވެ. އެންމެންގެ ތައުރީފު ހަމްދާއަށް އޮއްސާލީ އެހެންވެއެވެ. އޭގައި ޒުވާނުންގެ ހިތި ހަގީގަތް އޮތަތީއެވެ. އެއީ، ހަމަ ހަގީގަތުގައި ވެސް ޒުވާނުން އުޅޭ ހާލެވެ.
ހަމްދާގެ ވާހަކައަށް އެންމެން ތައުރީފު ކުރީ އެހެންވެއެވެ. ކުޅަދާނަ ވާހަކަދެއްކުން ތެރިޔާ، ކުރީގެ ވިލިމާލޭ ދާއިރާގެ މެންބަރު އަހުމަދު ނިހާން ހުސައިން މަނިކު ވިދާޅުވީ، އެއީ ތާރީޚީ ވާހަކައެއް ކަމަށެވެ.
"ދިވެހި ޒުވާން އަންހެން ކުއްޖަކު ސިޔާސީ ސްޓޭޖެއްގައި މިހާ ފުރިހަމަ، މާނަ ފުން، މިސްރާބަށް ދަތުރުކުރި، ކެވެލި ހަމަ، ވަގުތާ ހާލަތާއި ގުޅޭ، ތެދުވެރި ސްޕީޗެއް ދިންކަމެއް އަޅުގަނޑަށް އިނގޭކަށް ނެތް," ނިހާން ތައުރީފު ކުރެއްވިއެވެ.
ނިހާނު އެކަންޏެއް ނޫނެވެ. މަޖިލީހުގެ ނައިބު ރައީސް އީވާ އަބްދުﷲ ވެސް ހަމްދާގެ ވާހަކަ ސިފަ ކުރެއްވީ "ހުރިހާ ގޮތަކުން ވެސް ބާރުގަދަ،" ވާހަކައެއް ގޮތުގައެވެ.
ހަމްދާ ޒުވާނުންގެ ހާލަތު ކިޔައިދިނީ ވަރަށް ތަފުސީލުކޮށް، އެހާމެ ފުރިހަމައަށެވެ. އަދި، އަޑުއަހަން ބޭނުންނުވާ ހަގީގަތްތައް ވެސް އޭގައި ހިމަނައިގެންނެވެ. އޭނާގެ ވާހަކަތައް މުޅި މީސްމީޑިއާގައި ދައުރު ވަނީ އެހެންވެއެވެ. އެ ހަގީގަތް ވެރިންނަށް އަޑު އިއްވަން ޒުވާނުން ބޭނުން ވާތީއެވެ.