15 Jul 2023, 10:34
ޚަބަރު އުފެއްދުމުގައި އާޓިފިޝަލް އިންޓެލިޖެންސް (އޭއައި) ބޭނުންކުރެވޭނެ ގޮތް ދިރާސާ ކުރުމަށް، ޗެޓް ޖީޕީޓީ އުފެއްދި ކުންފުނި ކަމަށްވާ އޯޕަންއޭއައި އާއި އެސޯސިއޭޓެޑް ޕްރެސް (އޭޕީ)އާ ދެމެދު އެއްބަސްވުމެއް ހަދައިފިއެވެ.
އެ ދިރާސާތަކަށް އޭޕީގެ ޚަބަރު އާކައިވްގެ ބަޔެއް ބޭނުންކުރަން އެ އޭޖެންސީން ވަނީ އޯޕަންއޭއައިއަށް ލައިސަންސް ދީފައެވެ. އަދި މި އެއްބަސްވުމުގެ ދަށުން އޭޕީއަށް އޯޕަންއޭއައިގެ ޓެކްނޮލޮޖީއާއި ތަޖުރިބާތައް ބޭނުންކުރަން ލިބޭނެއެވެ.
އެހެންނަމަވެސް އޯޕަންއޭއައިގެ ޓެކްނޮލޮޖީ އޭޕީގެ ނިއުސް އޮޕަރޭޝަންތަކުގައި ބޭނުން ކުރާނީ ކިހިނެއް ކަމެއް އެ އޭޖެންސީއިން ހާމައެއް ނުކުރެއެވެ. ކޯޕަރޭޓް އާނިންސް ރިޕޯޓްތައް އޮޓޮމޭޓް ކުރުމަށާއި ކުޅިވަރު އިވެންޓްތައް ރީކެޕް ކުރުމާއި ބައެއް ލައިވް އިވެންޓްތަކަށް ޓްރާންސްކްރިޕްޝަން ހެދުމަށް އެ އެޖެންސީން މިހާރުވެސް އޭއައި ބޭނުންކުރެއެވެ.
ޗެޓްޖީޕީޓީ ފަދަ އޭއައި ސިސްޓަމްތައް ތަމްރީނު ކުރުމަށް ބޭނުންވާ ގިނަ އަދަދެއްގެ މައުލޫމާތު އޭޕީގެ އާކައިވް ޚަބަރުތަކުން ލިބޭނެއެވެ.
ނަމަވެސް ހަގީގަތާ ހިލާފު ދޮގު މައުލޫމާތު އުފެއްދުމުގެ ކަންބޮޑުވުންތަކާއި އިންސާނުން އުފައްދާ ކޮންޓެންޓާއި ކޮމްޕިއުޓަރު ޕްރޮގްރާމްތަކުން އުފައްދާ ކޮންޓެންޓް ވަކިން ދެނެގަތުމުގައި ހުރި ގޮންޖެހުންތަކާ ގުޅިގެން ޚަބަރުފަތުރާ ވަސީލަތްތަކުން މި ޓެކްނޮލޮޖީ ގެންގުޅެން ފަސްޖެހެއެވެ.
ބައެއް މީޑިއާތަކުން މިހާރުވެސް ދަނީ ކޮންޓެންޓަށް ޖެނެރޭޓިވް އޭއައި ބޭނުން ކުރަމުންނެވެ. ބަޒްފީޑުން އެ ކުންފުނީގެ ސައިޓުގައި ޕާސަނަލިޓީ ކުއިޒްތައް ހެދުމަށް އޭއައި ބޭނުންކުރާނެކަން އިއުލާންކޮށްފައި ވާއިރު، ނިއުޔޯކް ޓައިމްސް އިން ޗެޓްޖީޕީޓީ ބޭނުންކޮށްގެން މި އަހަރު ވެލެންޓައިންސް ޑޭ މެސެޖް-ޖަނަރޭޓަރެއް އުފެއްދިއެވެ.