13 Jul 2023, 18:23
ސައުދީ އަރަބިއާގެ ހުށަހެޅުންތައް ގަބޫލުނުކޮށް، ވޭލްސް މިޑްފީލްޑަރު އާރޮން ރަމްސީ އަލުން ކާޑިފް ސިޓީއާ ގުޅުމަށް ނިންމައިފިއެވެ.
އުމުރުން 32 އަހަރުގެ ރަމްސީ ފްރާންސްގެ ނީސްއާއެކު ހަދާފައިވާ ކޮންޓްރެކްޓް މިދިޔަ މަހު ނިމުމަކަށް އައިސްފައިވާ އިރު، އޭނާ އެ ކްލަބުގައި ހޭދަކުރީ އެންމެ ސީޒަނެކެވެ. ނީސްއާއެކު ހަދާފައިވާ ކޮންޓްރެކްޓް ނިމުމަކަށް އައުމުން ކާޑިފްއާ ގުޅުމަށް އެ ކްލަބާއެކު އޭނާ މެޑިކަލް ހަދާފައިވާ ކަމަށް ރިޕޯޓުތައް ބުނެއެވެ.
ރިޕޯޓުތައް ބުނާގޮތުގައި ރަމްސީ ވަނީ ސައުދީގެ ކްލަބުތަކަކުން ހުށަހެޅި ބޮޑެތި ހުށަހެޅުންތަކެއް ގަބޫލުނުކޮށް ދޫކޮށްލައިފައެވެ. ރަމްސީ އެ ހުށަހެޅުންތައް ދޫކޮށްލީ އޭނާ ކެރިއަރު ފެށި ކާޑިފާއެކު ރިޓަޔާކުރުމަށް ކަމަށް ވެސް ރިޕޯޓުތައް ބުނެއެވެ.
ދާދި ފަހުން ރަމްސީ ދިން އިންޓަވިއުއެއްގައި އޭނާ ބުނެފައިވަނީ ކާޑިފަކީ އޭނާ އުޅެ ބޮޑުވި ތަން ކަމަށާއި އެ ކްލަބަކީ އޭނާއަށް ފުރުސަތުތައް ހޯދައިދިން ކްލަބު ކަމަށެވެ. އަދި ކެރިއަރުގައި މިހާތަނަށް ހޯދުނު ކާމިޔާބީތަކުގެ ފަހަތުގައިވާ ކްލަބަކީ ވެސް ކާޑިފް ކަމަށް އޭނާ ބުނެފައިވެއެވެ.
ރަމްސީ 2008 ވަނަ އަހަރު އާސެނަލާ ގުޅުމުގެ ކުރިން އޭނާގެ ކެރިއަރު ފެށީ 2006 ވަނަ އަހަރު ކާޑިފް ސިޓީ އިންނެވެ. އަދި ނީސްއާ ގުޅުމުގެ ކުރިން އޭނާ ވަނީ އިޓަލީގެ ޔުވެންޓަސްއަށް ވެސް ކުޅެފައެވެ.