18 Jul 2023, 08:50
އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ޓްރޫތު ސޯޝަލް އެޕްލިކޭޝަންގެ އިންޖިނިއަރިން ހެޑް އިސްތިއުފާ ދެއްވައިފިއެވެ.
ޓްރަމްޕްގެ އެޕްލިކޭޝަން ހިންގާ ކުންފުނީގެ ހެޑް އޮފް އިންޖިނިއަރިން އެލެކްސް ގްލީސަން ރޮއިޓާސްއަށް ވިދާޅުވީ އޭނާ އިސްތިއުފާ ދެއްވީ އެ ކުންފުންޏަށް ލިބުނު ބޮޑު ގެއްލުމުގެ ސަބަބުން ކަމަށެވެ.
އޭނާ އިސްތިއުފާ ދެއްވާފައި މިވަނީ ޓްރަމްޕްގެ މީޑިއާ އެންޑް ޓެކްނޮލޮޖީ ގްރޫޕް (ޓީއެމްޓީޖީ)ގައި ނުތަނަވަސްކަން އުފެދިފައިވާ ދަނޑިވަޅެއްގައެވެ.
ޓްރަމްޕް ސޯޝަލް މީޑިއާ ޕްލެޓްފޯމެއް އުފެއްދެވީ ޖެނުއަރީ 6، 2021 ގައި އެމެރިކާގެ ގާނޫނު ހަދާ މަޖިލީހުގެ އިމާރާތަށް އޭނާގެ ސަޕޯޓަރުން ވަދެގަނެ ދިން ހަމަލާއަށް ފަހު ސޯޝަލް މީޑިއާގެ ބޮޑެތި ޕްލެޓްފޯމްތަކުން ޓްރަމްޕް އެކަހެރި ކުރުމާ ގުޅިގެންނެވެ.
ގްލީސަންއަކީ ޓްވިޓާ އާއި ފޭސްބުކް ނޫން، "ލާމަރުކަޒީ" ސޯޝަލް މީޑިއާ ޕްލެޓްފޯމްތަކަށް އޯޕަން ސޯސް ޓެކްނޮލޮޖީ ފޯރުކޮށްދޭ ސޮޕްބޮކްސް ޓެކްނޮލޮޖީގެވެސް ބާނީއެވެ.
ގްލީސަން ދިން އިންޓަވިއުއެއްގައި ބުނީ ޓީއެމްޓީޖީ ދޫކޮށްލަނީ ފުލްޓައިމްކޮށް ސޯޕްބޮކްސްގެ މަސައްކަތް ކުރުމަށް ކަމަށާއި، ލާމަރުކަޒީ ގިނަ ޕްލެޓްފޯމްތައް ގުޅާލެވޭނެ ޓެކްނޮލޮޖީ ތަރައްގީ ކުރަމުން އަންނަ ކަމަށެވެ.
ގްލީސަން ވަކިވުމާ ގުޅޭ ގޮތުން ޓްރަމްޕްގެ މީޑިއާ ގްރޫޕުން ރަސްމީކޮށް އަދި އެއްޗެއް ބުނެފައެއް ނުވެއެވެ.
ޓްރޫތު ސޯޝަލް 2022 ވަނަ އަހަރުގެ ފެބްރުއަރީ މަހު ތައާރަފުކޮށްފައިވާއިރު، އެ ޕްލެޓްފޯމަށް މާބޮޑު ތަރުހީބެއް ލިބިފައެއް ނުވެއެވެ. އެގޮތުން ޓީއެމްޓީޖީން ކަނޑައަޅާފައިވާ ކުރިއެރުމުގެ ލަނޑުދަނޑިތަކާ އަޅާބަލާއިރު ޓްރޫތު ސޯޝަލް ބޭނުންކުރާ މީހުންގެ އަދަދު ވަރަށް މަދެވެ.
އެހެންނަމަވެސް ޓްރަމްޕް އާއި އޭނާގެ ސަޕޯޓަރުން އެ ޕްލެޓްފޯމް ބޭނުން ކުރެއްވުމުން ޓްރަމްޕް އެ ޕްލެޓްފޯމް އުފެއްދެވި މަޤްޞަދު ޙާޞިލްވާ ކަމަށް ބައެއް ފަރާތްތަކުން ދެކެއެވެ.
ޓްރޫތު ސޯޝަލް ބޭނުންކުރާ މީހުންގެ އަދަދު މަހަކު 607،000 އަށް އަރާ ކަމަށް ސިމިލާވެބްގެ ތަފާސްހިސާބުތަކުން ދައްކައެވެ.
ޓްރޫތު ސޯޝަލްގައި ޓްރަމްޕްގެ ފޮލޯވަރުންގެ އަދަދު އިއްޔެއާ ހަމައަށް 5.71 މިލިއަނަށް އަރާފައިވާއިރު، ޓްވިޓާއިން ޓްރަމްޕް ސަސްޕެންޑް ކުރިއިރު ޓްވިޓާގައި 88 މިލިއަނަށް ވުރެ ގިނަ ފޮލޯވަރުން ތިއްބެވެ.
ޓީއެމްޓީޖީން ވަނީ 2021 ވަނަ އަހަރުގެ އޮކްޓޫބަރު މަހު ބްލޭންކް ޗެކް ފާމް ޑިޖިޓަލް ވޯލްޑް އެކުއިޒިޝަން ކޯޕަރޭޝަން (ޑީޑަބްލިއުއޭސީ) އާ އެއްކޮށްލުމުގެ އެއްބަސްވުމެއް އިއުލާނުކޮށްފައެވެ. ނަމަވެސް އެ އެއްބަސްވުމާ ބެހޭ ގޮތުން އެމެރިކާގެ ޖަސްޓިސް ޑިޕާޓްމަންޓާއި ސެކިއުރިޓީޒް ރެގިއުލޭޓަރުގެ ތަހުގީގުތަކެއް ކުރިއަށްދާތީ، އެ މުއާމަލާތް ކުރެވޭނެ ކަމާމެދު ވަނީ ޝައްކު އުފެދިފައެވެ.