06 Jul 2023, 09:00
މަޝްހޫރު ޓީވީ ޝޯ ކަމަށްވާ ”ގޭމް އޮފް ތުރޯންސް“ އިން މަގުބޫލުކަން ހޯދި ދެ ތަރިން ކަމަށްވާ ކިޓް ހެރިންޓަން އާއި ރޯޒް ލެސްލީއަށް ދެވަނަ ދަރިއަކު ލިބިއްޖެއެވެ.
ބޭރުގެ ނޫސްތަކުން ހާމަކޮށްފައިވާ ގޮތުގައި މި ހަފުތާގެ ތެރޭގައި ދެމަފިރިންނަށް ވަނީ ދެވަނަ ދަރިއަކު ލިބިފައެވެ. އަދި، މިފަހަރު ލިބިފައިވަނީ އަންހެން ކުއްޖެއް ކަމަށް ވެސް ނޫސް ތަކުން ހާމަކޮށްފައިވެއެވެ.
ކިޓްގެ ސްޕޯކްސްޕާސަން ނެރުނު ބަޔާނެއްގައި ބުނެފައިވަނީ އާއިލާއަށް އާ މެމްބަރު ލިބުމާއެކު މުޅި އާއިލާ ތިބީ ވަރަށް އުފަލުންނެވެ.
ރޯޒް ދެވަނަ ދަރިއަކަށް ބަލިވެ އިންކަން ކިޓް ހާމަކޮށްފައިވަނީ މި އަހަރުގެ ފެބްރުއަރީ މަހުގައެވެ.
ގޭމް އޮފް ތުރޯންސްއިން ދިމާވި ދެމީހުން ކައިވެނިކޮށްފައިވަނީ 2018 ވަނަ އަހަރުގައެވެ. އެއަށް ފަހު ދެ މީހުންނަށް ދަރިއަކު ލިބިފައިވަނީ 2021 ވަނަ އަހަރުގައެވެ. ދެ މީހުންނަށް ލިބިފައިވަނީ ފިރިހެން ކުއްޖެކެވެ.
ކިޓް އައި ރޯޒްއަށް ލިބިފައިވާ ފިރިހެން ދަރިފުޅަށް ކިޔާ ނަމެއް މިހާތަނަށް ވެސް ހާމަކޮށްފައެއް ނުވެއެވެ. އަދި، ހަމަ އެފަދައިން އަންހެން ކުއްޖާގެ މައުލޫމާތު ވެސް ވީހާ ވެސް މީޑިއާ އާ ދުރުގައި ބެހެއްޓުމަށް މަސައްކަތް ކުރާނެއެވެ.
ގޭމް އޮފް ތްރޯންސްގެ ސެޓުން ދިމާވި އެ ފަންނާނުން ލޯބީގެ ގޮތުން ގުޅުނީވެސް ޝޯގެ ތެރެއިންނެވެ. އެއާ އެކު ދެ މީހުން ވަނީ 2017 ވަނަ އަހަރުގައި އެންގޭޖުވެ 2018 ވަނަ އަހަރުގެ ޖޫން މަހުގެ ތެރޭގައި ކައިވެނިކޮށްފައެވެ.
އެއަށް ފަހު ދެ މީހުންނަށް ދަރިއެއް ލިބި އެކީގައި ތިން މީހުން ފެނިފައިވަނީ 2021 ވަނަ އަހަރުގެ ފެބްރުއަރީ މަހުގެ ތެރޭގައެވެ.