05 Jul 2023, 08:11
މިއަހަރު އެންމެ ގިނަ ބަޔަކު އެފިލްމަކަށް އިންތިޒާރުކުރާ "ރޮކީ އޯރް ރާނީކީ ޕްރޭމް ކަހާނީ"ގެ ޓްރެއިލާ އާއްމުންނަށް ދައްކާލައިފިއެވެ.
ފިލްމުގެ ޓްރެއިލާ ރިލީޒްކުރުމާއެކު މީގެކުރިން ފިލްމާބެހޭގޮތުން ދައްކާފައިނުވާ ގިނަ ވާހަކަތައްވަނީ ފަޅާއަރާފައެވެ. އެގޮތުން ފިލްމުގައި ހާއްސަ ފެނިލުންތަކުން ބޮލީވުޑުގެ ޒުވާން ބަތަލާއިންތަކެއް ފެނި އެކްޓަރު ވަރުން ދަވަންގެ ހާއްސަ ފެނިލުމެއް ހިމެނޭކަންވެސްވަނީ ފަޅާއަރާފައެވެ.
ވަރުންއާއެކު ފެންނަ އިތުރު ބަތަލާއިންގެތެރޭގައި، ސާރާ ޢަލީ ޚާން، ޖާންވީ ކަޕޫރު އަދި އަނަންޔާ ޕާންޑޭ ހިމެނެއެވެ. ވަރުންއާއެކު މި ބަތަލާއިން ފިލްމުގައި ފެންނަނީ ރަންވީރު ސިންގް ފެންނަ ހާއްސަ ލަވައަކުންނެވެ.
ފިލްމުގެ ޓްރެއިލާ ބެލުންތެރިންނަށް ދޫކޮށްލުމަށްފަހު އާލިއާވަނީ މިފިލްމުގެ ޝޫޓިންގްގައި ހޭދަކުރި އެންމެ ފަހު ދުވަހުގެ ހަނދާންތަކާއެކު ހާއްސަ ފޮޓޯއެއް އިންސްޓަގްރާމްގައި ހިއްސާކޮށްފައެވެ. މިފިލްމުގައި ފެންނަ ލަވަ 'ތުމް ކިޔާ މިލޭ'އަކީ އާލިއާގެ އަލަތު ދަރިފުޅު ރަހާ ވިހެއުމަށްފަހު ކުރި ފުރަތަމަ ފިލްމީ މަސައްކަތެވެ.
އިންޑިއާގެ ކަޝްމީރުގައި ޝޫޓްކޮށްފައިވާ މިލަވަ ދާދިފަހުންވަނީ ރިލީޒްކޮށްފައެވެ. އާލިއާގެ ޕޯސްޓުގައި ބުނެފައިވަނީ، މަޔަކަށްވުމަށްފަހު އެނބުރި މަސައްކަތުގެ މާޙައުލަށް ނުކުތުމަކީ ފަސޭހަކަމެއް ނޫންކަމަށެވެ. އެހެންނަމަވެސް މިފިލްމުގެ ޓީމުންނާއި ކްރޫއިންގެ ފަރާތުން ލިބުނު އެއްބާރުލުމާއެކު ފިލްމުގެ ނުނިމިއޮތް ހަމައެކަނި ލަވަ ޝޫޓްކުރުން ވަރަށް ފަސޭހަވިކަމަށް ބަތަލާވަނީ ބުނެފައެވެ.
ފިލްމުގެ ޓްރެއިލާ ރިލީޒްވުމާއެކު ގިނަ ބައެއްގެ ތަޢުރީފު ކަރަންއަށާއި ފިލްމުގެ ކްރޫއިންނަށްވަނީ ލިބިފައެވެ. މިއީ ކާމިޔާބު ފިލްމު "ގައްލީ ބޯއި"އަށްފަހު ރަންވީރް ސިންގްއާއެކު އާލިއާ ކުޅޭ ދެވަނަ ފިލްމެވެ. ރަންވީރުއާއި އާލިއާ ބަޓްގެ އިތުރުން ފިލްމުން ފެންނާނެ މުހިއްމު ތަރިންގެތެރޭގައި ކުރީގެ ބަތަލާ ޝަބާނާ އަޒްމީ، ޖަޔާ ބައްޗަން އަދި ދަރުމެންދްރަ ހިމެނެއެވެ. ކަރަން ޖޯހަރު ޑައިރެކްޓްކޮށްފައިވާ މިފިލްމު ސިނަމާތަކަށް ގެންނަން ނިންމާފައިވަނީ މިމަހުގެ 28ވަނަ ދުވަހުއެވެ.