26 Jun 2023, 19:41
މިސީޒަނުގައި މެންޗެސްޓާ ސިޓީއަށް ތިން ތަށި ހޯދައިދިން ކެޕްޓަން އިލްކާއީ ގުންޑޮގަން، ބާސެލޯނާއާ ގުޅޭނެކަން އެ ކްލަބުން އިއުލާންކޮށްފިއެވެ.
ސިޓީގައި ހަތް އަހަރު ހޭދަކުރުމަށްފަހު ގުންޑޮގަން، ބާސާއާ ގުޅުމަށް ނިންމާފައިވަނީ ސިޓީއާއެކު ހަދާފައިވާ ކޮންޓްރެކްޓް މިސީޒަންގައި ނިމުމަކަށް އައުމުންނެވެ.
ބާސާއާ ގުޅުމަށް ގުންޑޮގަން ނިންމާފައިވަނީ ދެ އަހަރު ދުވަހުގެ ކޮންޓްރެކްޓެއްގެ ދަށުންނެވެ. އެ ކޮންޓްރެކްޓްގެ ދަށުން އިތުރު އެއް އަހަރު ދުވަހަށް ކޮންޓްރެކްޓް އާކުރުމުގެ ފުރުސަތު ވެސް އޭނާއަށް ލިބޭނެއެވެ.
މިސީޒަން ނިމުމުން ސްޕެއިން މިޑްފީލްޑަރު ސާޖިއޯ ބުސްކެޓްސްގެ ކޮންޓްރެކްޓް ނިމުމަކަށް އަންނާތީ، ބާސާގެ ކޯޗު ޒަވީ ވަނީ ގުންޑޮގަން ހޯދުމަށް ގިނަ މަސައްކަތްތަކެއް ކޮށްފައެވެ. މިސީޒަނަށްފަހު ބުސްކެޓްސް ގުޅުމަށް ނިންމާފައިވަނީ އާޖެންޓީނާ ތަރި ލިއޮނެލް މެސީ ވެސް ސޮއިކޮށްފައިވާ އެމެރިކާ ކްލަބު އިންޓަ މަޔާމީއަށެވެ.
ބާސާ އިން ނެރުނު ބަޔާނެއްގައި ބުނީ ގޮންޑޮގަން ސޮއިކުރުމަށް އެ ކްލަބާއެކު އެއްބަސްވުމަކަށް އައިސްފައިވާ ކަމަށާއި ބާސާއާއެކު އޭނާގެ ރިލީސް ފީއެއް ކަމަށް ނިންމާފައިވަނީ 400 މިލިއަން ޔޫރޯ ކަމަށެވެ. އަދި އޭނާ ކްލަބާ ގުޅޭނީ ދެ އަހަރު ދުވަހުގެ ކޮންޓްރެކްޓެއްގެ ދަށުން ކަމަށް ވެސް ބަޔާނުގައި ބާސާ އިން ބުންޏެވެ.
ހިލޭ ޓްރާންސްފާއެއްގެ ދަށުން ބާސާއާ ގުޅުނު ގުންޑޮގަން، ރަސްމީކޮށް އެ ކްލަބުގެ ކުޅުންތެރިއެއްގެ ގޮތުގައި ވަރަށް އަވަހަށް ދައްކާލާނެ ކަމަށް ރިޕޯޓުތައް ބުނެއެވެ.