30 Jun 2023, 13:23
"މަރުދެކެ ގިނަފަހަރު ބިރުގަންނާނީ ދުނިޔޭގައި އުޅުނު މަގުސަދު ހަނދާން ނައްތާލާފައިވާ މީހުންނެވެ. ދުނިޔެއަށްވުރެ އިސްކުރަންވާނީ ތިމާއާއި ހެއްދެވި ފަރާތާއި އޮތް ގުޅުން ރަގަޅުކޮށް އަޅުކަން ކުޅައުމަށެވެ. އޭރުން ހިތާމަތައް ފިލާ ދުނިޔެއަށް ހުރި ޝައުގުކުޑަވެދާނެއެވެ. މަރަކީ ހަޔާތުގެ އެއްބަޔެވެ. އަބަދުވެސް މަރަށް ތައްޔާރުވެގެން ހުރުމުން ފަހުން ހިތާމަކުރާކަށް ނުޖެހޭނެއެވެ. ލޯބިވާނީވެސް ރުޅި އަންނާނީވެސް ތިމާ ހެއްދެވި ފަރާތަށްޓަކައެވެ. "
***
"އަދްރިއަންގެ ހުއްދަނެތި ކާއިނާތު ރާހާ ގެންގޮސް ސީޓީސްކޭން ހެއްދިއެވެ. ރިޕޯޓްލިބުމުން ޑޮކްޓަރ އެދުނީ އޭނަ އޮފީހަށް އައިސްދިނުމަށެވެ. ކާއިނާތުގެ ހިތުގައި ބިރުވެރިކަން ވަކި ހިއްޕައިލިގޮތުން މުޅިހަށިގަނޑަށްވެސް ފިނިވެ އައްސިވެލައިފިއެވެ. ޑޮކްޓަރުގެ އަޑުންވެސް ކަމެއް ގޯސްވެފައިވާކަން ދެނެގަނެވުނެވެ.
"އައިމް ސޮރީ ޓު ސޭ ދިސް އެކަމަކު އަޅުގަނޑަށް ބޮޑަށް ލަފާކުރެވެނީ ކެންސަރކަމަށް..އޮންކޮލިޖީ ޑިޕާޓްމެންޓަށް ރިފާރ ކޮށްލާނަން... އެމްއާރްއައި އާއި ބޯން މެރޯބައޮޕްސީވެސ އަދި ބޯންސްކޭންފަދަ އިތުރު ޓެސްޓްތައް އެޑޮކްޓަރުން އެޑްވައިސްކުރާނެ. އެޑްމިޓްކޮށްގެން އަވަހަށް ފަރުވާފެށީމަ ދެން ރަގަޅުވާނީ.."
ކާއިނާތު ބަސްހުސްވެ ބުނާނެ އެއްޗެއް ނޭގި ޑޮކްޓަރގެ މޫނަށް ކަޅި ހުއްޓާލައިގެން އިނީއެވެ.
"އަޅުގަނޑު ފިރިމީހާއާއި ވާހަކަދައްކާފައި ގޮތެއް ނިންމާނީ.............."ކާއިނާތު ގާވެފައިވާ ބުދެއްހެން އިނދެފައި ތެދުވުނެވެ. އޭނަ އެތަނުން ނުކުމެގެން ހިނގަައިގަތްގޮތަށް ކާރަަށް އެރިއެވެ. އޭރުވެސް ކާއިނާތުގެ ލޮލުން ފެނުނީ ހުސްކަމެވެ. ޑޮކްޓަރ ބުނި އެއްޗެހިން ސިކުނޑިއަށް ނަގައިގަނެވުނީ އެންމެ ލަފުޒެކެވެ. ކެންސަރެވެ. ގެއާއި ހަމަޔަށް ފޯރިއިރު ކާއިނާތުގެ ހިތާއި ސިކުނޑިއަށް ބަރުވެ ދެފައި ކިރިޔާ ބިންމަތިން ނެގޭކަމެވެ. ކޮޓަރިއަށް ވަދެ ރާހާގެ ރިޕޯޓްތައް ހިފައިގެން ހިނގައިގަތީ އަދްރިއަން ހުރިތަނެއް ހޯދުމަށެވެ. އަދްރިއަން އޭނަގެ ލައިބްރަރީގައި ހުރި ސޯފާގައި އިށީދެލައިގެން ބޭރަށް ބަލަހައްޓައިގެން އިންގޮތުން އޭނަވެސް ޒާދާގެ ގެއްލުމުގެ ހިތާމަ ތަހައްމަލު ކުރަނީއެވެ.
"މި ރިޕޯޓްތައް ބަލާފައި ޑޮކްޓަރ ބުނީ ރާހާއަށް ހުރީީ ކެންސަރު ޖެހިފައޭ. މާ މޮޅު މީހެއްކަމަށް ހީކޮށް އަހަރެން އޭނައަށް ދެއްކީ......." ކާއިނާތު ކޮފީ މޭޒުމައްޗަށް ރިޕޯޓްތައް އެއްލާލާފައި އައިވަރަށްވުރެ ބާރަށް އެތަނުން ނުކުތެވެ.
އަދްރިއަން މޭޒުމަތީގައި އޮތް ފައިލާއި ރިޕޯޓްތަކަށް ބަލަން އިނދެފައި އެކްސްރޭ ނެގިއެވެ. ހޫނުމޫސުމްގެ ހިތްގައިމު އަލި ހުރަހެއްނެތި ކޮޓަރިތެރެއަށް އެޅި ދިއްލާލާފައިވުމާއެކު އެކްސްރޭ ބަލަން ވިއުބޮކްސްއަކަށް ބޭނުމެއްނުވިއެވެ. އެހެންނޫނަސް ޓިއުމާ އެހެރީ ރީތިކޮށް ފެންނާށެވެ. އަދްރިއަންގެ މެޔަށް ފިނިވެލިއެވެ.
"ކާއީ......"އަދްރިއަން އަށް ތަންކޮޅެއް ބާރަށް ގޮވައިލެވުނެވެ. އެ އަޑުގައި އަވަސްކަމާއި ނުތަނަވަސްކަން އެކުލެވުނެވެ.
ކާއިނާތު ރާހާ ހޯދަމުން ދަނިކޮށް ފެނުނީ ބެކްޔާޑުގައި ކުރެހުމުގެ މަސައްކަތަށް ގެއްލިފައި ހުއްޓައެވެ. އެއްފަރާތުގައި ހުރި މޭޒުމަތީގައި ޗޮކްލެޓް ބުއިމަކާއި ޗޮކްލެޓާއި ކޭކު ހުރިއިރު ރާހާގެ މޫނުމަތިން ފެންނަނީ ހަމަޖެހުމެވެ.
"ދަރިފުޅު..."ކާއިނާތު ގޮވައިލިއެވެ.
"ޔެސް މަމް...."
"މަންމަ މިއައީ ޑޮކްޓަރަށް ރިޕޯޓް ދައްކާފައި. އޭނަ ބުނި އެއްޗެއް މަންމައަކަށް ގަބޫލެއްނުކުރެވުނު...."
"ކީކޭ ޑޮކްޓަރ ބުނުއްވީ.."ރާހާ ފަރުވާތެރިކަމާއެކު ކުރަހަމުން ދިޔައީ އުދަރެހުގެ ފޮޓޯއެކެވެ. މަންމަ ކައުނަށް ހުންނަ ޝައުގެއްގެ ބޮޑުކަމުން ރާހާގެ ފިހިންވެސް މިފަހަކަށް އައިސް ކުލަޖައްސާދެނީ އޭނަގެ މަންމަގެ ޚިޔާލުތަކެވެ. ބައެއްފަހަރު އެ ފޮޓޯތަކަށް އޭނަގެ މަންމަވެސް ލާފައެވެ.
"ބައްޕައަށް ބޮޑަށް އެނގޭނީ. އޮންކޮލޮޖިސްޓެއްވީމަ...ދަރިފުޅު ތި ފޮނި އަދި ތެލުލީ އެއްޗެހި ނުކައި ފުރުޓާއި ތަރުކާރީ ގިނަކޮށްބަލަ.."
"އެއީ ކީއްވެތަ މަންމާ. ޝުގާ ކްރޭވިން ވަރަށް ބޮޑު ދުވަސްކޮޅެއް......"ރާހާ ވަރަށް ލޯބިކޮށް ހީލުމަށްފަހު ފިހިގަނޑު އެއްފަރާތުގައި ބާއްވާފައި ހިންދެމިލިއެވެ. ތަދުވެގެން އުޅޭފަދަ ގޮތަކަށް އަޑެއް ލައްވައިލެވުނުއިރު ކާއިނާތު ދުވެފައި އައިސް ރާހާގެ ގައިގާ ހިފެހެއްޓިއެވެ.
"ޢައިމް އޯކޭ މަމް... ރިއަލީ.."ރާހާ މޯޅިއަކަށް ދެމިލިއެވެ."ކޮޅަށް ހުރެ ހުރެ ފައިގާ ރިއްސަންފެށީ..."
"މަންމައަށް އޮޅުވާނުލާ. ރާހާ އޯކޭއެއްނޫން...."
"ޑޮކްޓަރ ބުނީ ކީކޭ މަންމަ..."
"ކެންސަރޭ.."
ރާހާ ލޯކުޑަކޮށްލާފައި ވިސްނުމެއްގައި ހުރިފަދަ ގޮތަކަށް ހުރެފައި ތުންފަތުގައި ދަތް އަޅައިލިއެވެ.
"އެއީ ޑެތް ސެންޓެންސެއް ނު..."
"މަންމަ އެ ވާހަކަ ގަބޫލެއްނުކުރަން..އެއީ އަންހެނުންގެ ޚާއްސަ ޑޮކްޓަރެއް. އޭނައަށް ކިހިނެއް އެނގޭނީ ކެންސަރުކަމަށް ޔަގީންކަމާއެކު ބުނަން. މަންމަ ޑޮކްޓަރ އޮލީވިއާދެކެ ފޫހިވެއްޖެ............"
"މަންމާ. ދެޓް މީންސް އެ ޑެޑްލީ ބީސްޓް އިޒް އިންސައިޑް މީ..."
"އެ ޑެޑްލީ ބީސްޓް މަރައިލަން މަންމަމެން ބޭނުންކުރާނީ ފުރުޓްސް....މިވެސް ކައިލާ..."ކާއިނާތު ޕޮޓްތަކުގައި ހުރި ސްޓޯބެރީ ބިނދެފައި ރާހާގެ އަތަށް ދޭން ފެށިއެވެ."ކައިބަލަ ދަރިފުޅު....ދިފާއީ ނިޒާމް ވަރުގަދަކުރީމަ ބީސްޓުންނާއި މޮންސްޓާ ކީއްކުރަން އިފްރީތެއް ހުއްޓަސް މަރައިލާނެ..އެވެސް ދިރިއުޅޭނީ ލޭގައިތާ..."
"މަންމާ ކެންސަރު ޖެހުނީމަ އަޅުގަނޑު މަރުވާނީ...."
އަދްރިއަން އެހިސާބާއި އަރާ ހަމަވީއިރު ރާހާގެ ޖުމްލަ އިވި ފިޔަވަޅު ހުއްޓުނެވެ.
"ރާހާ....."ކާއިނާތުއަށް ބާރަށް ގޮވައިލެވުނެވެ.
"ކޮންކަހަލަ ވާހަކައެއް ތި ދައްކަނީ ރާހާ..."
"އެންމެންވެސް މަރުވާނެ ދޯ މަންމާ..."ރާހާ މައުސޫމްގޮތަކަށް ހިނިތުންވެލިއެވެ."ދަ ގުޑް ޑައި ޔަންގް..."
"މަންމަ ބުނެފީމެއްނު އެޑޮކްޓަރަކީ ބަލި ދެނެގަންނަ ފެންވަރުގެ މީހެއްނޫނޭ. އޭނައަކީ ކެންސަރުގެ ޚާއްސަމީހެއްނޫން. އަންހެނުންގެ ޑޮކްޓަރެއް.ރާހާގެ ބައްޕައަކީ އޮންކޮލޮޖިސްޓެއް. ބަައްޕައަށް އެކަހަލަ ކަންތައް ބޮޑަށް އެނގިލައްވާނީ. އަޒްކާރުކޮށްފިންތަ؟ އާންޓް އާޔާ އަބަދުވެސް ދަރިންނަށް ޒިކުރުކުރަން ހަނދާންކޮށްދޭ. ދެއިރު ޒިކުރުކޮށް ނަމާދުތައް ގަވާއިދުން ކުރުމަށް ބާރު އަޅާ. މަންމައަށް އެކަން ހަދާންނެތުމަކީ މައްސަލައެއް..މަންމަގެ ރާހާއަށް އެސްފީނާއެއްޖެހުނީކަން ނޭގޭ. ﷲ ރައްކާތެރިކޮށްދެއްވާށި....މިއީ ކޮންފަދަ އިމްތިހާނެއްކަމެއްވެސް ނޭގޭ....."ކާއިނާތުގެ އަޑު ތަންކޮޅެއް މަޑުވިއެވެ.
"ލައްބަ މަންމާ. ފަތިސްނަމާދުވެސް ނުކުރެވުނު..."
"އެއީ ކީއްވެ؟"
"ނަމާދު ޗުއްޓީވީމަ."
"ޒިކުރުކުރެވޭނެ. ދުޢާކުރެވޭނެ..ދުޢާއަކީ އެންމެ ބާރުގަދަ ހަތިޔާރު..ﷲ ސުބުހާނަހޫ ވަތައާލާ އިންސާނުން ހީވެސް ނުކުރާގޮތްގޮތުން ދުޢާ އިޖާބަކޮށްދެއްވާ. އެއަށް ކިޔަނީ މިރެކްލް. އެންމެ ފަހު ވަގުތާއި ހަމަޔަށް މަންމަވެސް އުއްމީދު ދޫކޮށެއްނުލާނަން........."ކާއިނާތުގެ އަޑުގައި ވި ރިހުން ފުންވިއެވެ."މަންމަ އެބައަންނަން.. ރާހާ ތި މަސައްކަތް ނިންމާލާ..."
ކާއިނާތު ފުން ނޭވާއެއް ދޫކޮށްލިއެވެ.
އަދްރިއަން ފެނުމުން ކާއިނާތު ލޮލުގައިވާ ކަރުނަ ތިކި ފޮހެލަމުން ފިޔަވަޅުތައް އަވަސްކޮށްލިއެވެ. އޭނަދެކޭގޮތުގައި ޒާދާ ގެއްލުމާއި ރާހާ ބަލިވުމުގައި ކުށްވެރިވަނީ އަދްރިއަންއެވެ. އަދްރިއަން ފަރުވާކުޑައީއެވެ. އަޅާނުލަނީއެވެ. ހުރިހާ ޒިންމާތައް ކޮނޑުގައި އަޅަންޖެހޭ މީހަކީވެސް ހާލާތްތައް ކުރިމަތިވަނީވެސް އަދްރިއަންއާއިހެދިއެވެ. އޭނައަށް ރާހާއާއިމެދު ޝައްކުވެގެން އެ ވާހަކަވެސް ކިތައްފަހަރު ބުނެވުނުހެއްޔެވެ؟ އެކަމަކު އަދްރިން ދެކުނީ ކާއިނާތުގެ ޝައްކާއި ވަހުމްކަމުގައެވެ. އެހެންވުމުގެ ސަބަބުން ރުޅިވެރިކަން އިތުރުވެ އަނގައިން ބުނާހިތެއްވެސް ނުވީއެވެ. އޭނަ ބޭނުންވީ އަދްރިއަން ދެރަކޮށްލުމެވެ. އަމިއްލަ ނަފުސް ކުށްވެރި އެއްޗެއް ވިސްނޭނެނޫންހެއްޔެވެ؟ ހަގީގަތަކީ އަދްރިއަންގެ ތަފާތުކަމެވެ. ކޮންމެފަދަ ހާދިސާއެއް ހިނގިޔަސް މިވީހާތަނަށް އަދްރިއަން ކާއިނާތު ކުށްވެރިކުރަން ނޫޅެ ކެތްތެރިކަން އިސްކުރުމެވެ.
"ކާއީ....ރިޕޯޓްތައް ބަލައިފިން.."
"އޭނަ ބުނީ ރަގަޅު އެއްޗެއްތަ؟"
"ރާހާ އެޑްމިޓްކޮށްގެން އިތުރު ޓެސްޓްތައް ހަދާނީ.."
"އަދްރިއަންވެސް ކެންސަރުކަމަށް ޝައްކުކުރަނީ؟"ކާއިނާތު ރުޅިއަންނަގޮތްވިއެވެ. އެލޮލުގައިވި ރުޅިވެރިކަމުގެ ތެރެއިން ކަރުނަތައްވެސް ފާއްދާލައިފިއެވެ.
"އަހަންނަށް އެނގެއޭ. ކިތައްފަހަރު އަދްރިއަން ގާތު ރާހާގެ ފަޔަށް ކަމެއްވެގެން އުޅޭ ވާހަކަ ބުނިން. އެހެން ޑޮކްޓަރެއްގެ ދަރިއަކަށް މިކަހަލަ ހާދިސާއެއްކުރިމަތިނުވާނެކަން ޔަގީން. ފަރުވާކުޑަ ބައްޕައެއްގެ ދަރިންނަށް ދެރަކަމެއްނޫނީ ނުވާނެ. ޒާދާ ގެއްލިގެން ކިތައްދުވަސް މިވީ؟އެކުއްޖާ ދުނިޔޭގައި ހުރިކަމެއްވެސް ނޭގޭ. އަދްރިއަން ތިހުންނަނީ ކައިގެން އެހެން މަސައްކަތެއްނުކޮށް ބަނޑުލާފައި ތިބޭ ފުލުހުންނާއި އެ މަސައްކަތް ހަވާލުކޮށްގެން އެމީހުން ޒާދާ ގެނެސްދޭނެކަމުގެ އުއްމީދުގައި ދޯ........."
އަދްރިއަން ބަސްމަދެވެ.
ކާއިނާތު ޔަގީންކުރީ "ގިލްޓީ" ވީކަމަށެވެ.
"އަދްރިއަން...ޖަވާހިރުފަދަ ދެދަރިން ލިބުނީމަ އެކުދިންނާއި އަޅާލާނެ ވަގުތެއް ނުވޭ. މިހާރު އެހެން ހިތަށް އަރާ ދޯ. ހަތަރުދަމުގޮސް އިންސާނިއްޔަތަށް ޚިދުމަތްކުރާށޭ ކިޔާފައިގޮސް ނަރުހުންނާއި ފްލާޓްކުރުން ނޫންކަމެއް ޑޮކްޓަރުން ނުކުރޭ.."ކާއިނާތު ދަތްތަކަށް ބާރުކޮށްލިއެވެ.
"ކާއީ.އިނަފް..........."
"ނޫން. އަދި ނުފުދޭ...އަދްރިއަންއާއި ހެދި މަގޭ ދިރިއުޅުން ހަލާކުވީ..."
"އެންމެރަގަޅު. ކާއީ ބޭނުންވަރަކަށް އަހަންނަށް ބްލޭމްކޮށްފައި އަހަރެންގެ ބޮލުގައި ހުރިހާ އެއްޗެއް އެޅުވިޔަސް އެންމެ ރަގަޅޭ. އެކަމަކު މިވަގުތު އަހަރެންގެ މަސައްކަތްވިޔަދީ..."އަދްރިއަން އިރުކޮޅަކަށް ލޯ މަރާލައިގެން ހުރުމަށްފަހު ލޯ ހުޅުވައިލިއެވެ."އައިމް ޓޭކިން ހާ ޓު ހޮސްޕިޓަލް..........އިތުރު ޓެސްޓް ހަދަން.."
"އަހަރެންވެސް ދާނަން..."
"އޯލްރައިޓް..."
ކާއިނާތު ރާހާއާއިއެކު ހޮސްޕިޓަލަށް ވަންނާން ދިޔައިރު އެމްބިއުލެންސުން ގެނެސް ބޭލީ ޒުވާނާއަށް އޭނަގެ ނަޒަރު ހުއްޓުނެވެ. އެކްސިޑެންޓްވީކަން ނޭގެއެވެ. ބޮލުން ލޭ އޮހެމުން ދިޔައިރު މޫނުން އަނިޔާގެ ނިޝާންތައް ފެނެއެވެ. އެމްބިއުލެންސްގެ ސްޓްރެޗާމަތީގައި ހަރަކާތެއްނެތި އޮތްގޮތުން މަރުވީކަމަށް ހީކޮށް ކާއިނާތުގެ ހިތުގައި ހަމްދަރުދީއުފެދުނެވެ. އަމިއްލަ ދަރިންނަށް ކުރިމަތިވެފައިވާ މައްސަލަތަކުގެ ސަބަބުން އެހެން މީހުންނަށްޓަކާވެސްް ބުނަންނޭގޭފަދަ ކުލުނެއް އުފެދިއްޖެއެވެ. މިއީވެސް ކޮންމެވެސް މީހެއްގެ ދަރިއެކެވެ. އެކުއްޖާގެ ހަޔާތުގެ ބައްތި ނިވެމުންދާއިރު މަންމަގެ ހިތަށް ކުޅަދާނަވާނެހެއްޔެވެ؟ ކަންބޮޑުވުމާއި ހާސްކަމުގެ ނަޒަރަކުން ބަލަހައްޓައިގެން ހުރެފައި ގޮސް ޕަރަމެޑިކްއަކާއި ސުވާލުކޮށްލެވުނީ އެޒުވާނާއާއި ތަންކޮޅެއް ކައިރިވެފައި މޫނަށް ބަލައިލަމުންނެވެ.
"އެކުއްޖާއަށް ކިހިނެއްވެފައި؟ ނިޔާވީތަ؟"
ޕަރަމެޑިކް ޖަވާބެއްނުދެނީސް އެޒުވާނާ ލޯ ހުޅުވާލާފައި ކާއިނާތުގެ މޫނަށް ބަލައިލިއެވެ. ދުނިޔޭގެ ހުރިހާ ހިތާމައަކާއި މޮޅިވެރިކަމެއް އެލޮލުގެ ތެރޭގައި ފޮރުވިފައިވާ ލޮލެކެވެ. ނަމަވެސް އެއީ ފަޅިސިކުންތުކޮޅެކެވެ. ޕަރަމެޑިކުން އަވަސް ޚިދުމަތްދެމުންދާއިރު އެހެން މީހުންނަށްޓަކާ މަޑުކުރުމެއް ނެތެވެ. އެމީހުން އަވަސްވެގަތީ ޒަޚަމްވެފައިވާ ޒުވާނާއަށް ފަރުވާދިނުމަށެވެ. ސްޓްރެޗާ ލޮލުގެ ކުރިމަތިން ގެއްލުނުއިރުވެސް ކާއިނާތުއަށް ހުރެވުނީ ރާހާގެ އަތުގައި ބާރަށް ހިފަހައްޓައިގެންނެވެ. ރާހާގެ އަނެއް ފަރާތުގައި ހުރި އަދްރިއަންއަށްވެސް އެ ޒުވާނާ ފެނުނެވެ.
"މަންމާ.ޕިއްޒާ ބޯއި......." ރާހާ އެ ޒުވާނާއަށް އިޝާރާތްކޮށްލިއެވެ.
"ކީކޭ؟" ކާއިނާތު ދެލޯ ބޮޑުވިއެވެ.
"އޭނަ...ޒާދާ ގެއްލުމުން ފުލުހުން ގެންދިޔައީ އޭނަ. އެމީހުން އަނިޔާކުރީކަމަށްވާނީ..ސަބަބަކީ.....ޓެރަރިސްޓަކަށްވީމަ...."ރާހާގެ ޖުމްލައިން ކާއިނާތުގެ ހިތަށް ލޮޅުމެއް އެރިއެވެ.
"ޔަގީންތަ ދަރިފުޅާ؟ އެހެންކަމަށްވަނީނަމަ އޭނަ މަރުވުމުގެ ކުރިން އޭނަ ޒާދާ ފޮނުވިތަނެއް އެނގެން ޖެހޭ. އޭނަގެ މޫނުމަތީ ޒަޚަމްވެފައި ހުރިތަނުގައި ޖަހާ އިތުރަށް އަނިޔާކޮށްލެވުނީމަ ހިތަށް ހަމަޖެހުން ލިބޭނީ......."ކާއިނާތު ރާހާގެ އަތުން ދޫކޮށްލާފައި ކުރިއަށް ޖެހިލުމާއެކު އަދްރިއަން ހުޝިޔާރުކަމާއެކު ކާއިނާތުގެ އަތުގައި ހިފެހެއްޓިއެވެ. ކާއިނާތު ފޮޅުވައިލަން އުޅެފައިވެސް މީހުންގެ ކުރިމަތީގައި އިހުތިރާމްކުރަން ޖެހޭނެތީއާއި ރާހާވެސް ހުރުމުން ކެތްކުރިއެވެ. ދަރިންގެ ކުރިމަތީގައި އެކުދިންގެ ބައްޕައާއި ދިމާލަށް އެއްޗެކޭ ބުނުމަކީ ރަގަޅުކަމެއް ނޫންކަމަށް އޭނަވެސް ގަބޫލުކުރެއެވެ. މިއީ އަދްރިއަންގެ ވަޒީފާ އަދާކުރާތަނެވެ.ފެންނަ ކޮންމެ މުވައްޒަފަކުވެސް އިހުތިރާމްއާއި އަދަބުވެރިކަމާއެކު އޭނައާއި ސަލާމްކޮށް ނޫނީ ބޯ ޖަހާލާފައި ނޫނީ ނުދެއެވެ.
"އޭނަ މަރުވެއްޖެއްޔާ..ސިއްރު ހިފައިގެން ކަށްވަޅަށް ދާނީ..އެހެންވެގެން ނުވާނެ......"
"ކާއީ....ކެތްތެރިވެބަލަ. މިއީ ހޮސްޕިޓަލެއް. ފުލުހުން އެމީހުންގެ ވާޖިބު އަދާކުރާނެ. އެމީހުންނަށް ނުވިކަމެއް ކާއީއަކަށްވެސް ނުކުރެވޭނެ.."
"އެ މޮންސްޓާއަށްޓަކާ ހިތުގައި ކުޑަ ކުޑަ ސިމްޕަތީއެއް ހިނގިކަމަށްޓަކާ ރިގްރެޓްކޮށްފިން...."ކާއިނާތު ހިންދިރުވައިލިއެވެ.
"ޑޭޑް..އަޅުގަނޑު ބިރުގަނޭ......"ރާހާ އޭނަގެ ބައްޕަގެ އަތުގައި ހިފާ ބާރުކޮށްލީ ވަށައިގެން ފެންނަ މަންޒަރުތަކުން ބިރުގަނެފައި ހުރެއެވެ. ބަލިމީހެއްގެ ގޮތުގައި މި އިމާރާތުގެ ތެރެއަށް ވަނުމުން ރާހާގެ ހިތަށް އުދަގޫދެނިވި އިހުސާސްތަކެއްކޮށް ހިތް ފިނިވިއެވެ. ހިނދުކޮޅަކަށް ވުރެެ ބޮޑަށް އެ ފިނިކަން އިތުރުވެ ނޭވާވެސް އެތެރެހަށީގައި ތާށިވާން އުޅުނެވެ.
ނުނިމޭ