20 Jun 2023, 17:18
ރިޔާސީ އިންތިޚާބު ވަގަށް ނެގުމަށް ޤައުމު ހުއްޓުމަކަށް ގެނެސްފައިވާކަމަށް ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
އިދިކޮޅު ކޯލިޝަންގެ ލީޑަޝިޕުން ވަނީ ރައީސް އިބްރާހީމް މުހައްމަދު ޞާލިހާ ބައްދަލުކުރެއްވުމަށް މިއަދު މެންދުރު ރައީސް އޮފީހަށް ވަޑައިގެންފައެވެ. ނަމަވެސް، ރައީސްއާ ބައްދަލު ނުވެ އެ ކަމުގެ ކަންބޮޑުވުން އެ ބޭފުޅުން ފާޅުކުރެއްވިއެވެ.
ރައީސް އޮފީސް ކައިރީގައި ނޫސްވެރިންނާ ބައްދަލުކުރައްވާ އަދުރޭ ވިދާޅުވީ ގައުމު ހުއްޓުމަކަށް ގެނެސްފައިވަނީ ރިޔާސީ އިންތިޚާބު ވަގަށް ނަގައި ރިޔާސީ އިންތިޚާބުގައި ވައްކަން ކުރަން ޖާގަ ހޯދަން ކަމަށެވެ.
އޭނާ ވިދާޅުވީ އެ ބޭފުޅުން ރައީސް އޮފީހަށް ވަޑައިގެންނެވީ ރައީސް އޮފީހުން ގުޅައި ރައީސް ވަގުތު ދެއްވައިފިކަމަށް ވިދާޅުވުމުން ކަމަށެވެ.
"އައިސް އަޅުގަނޑުމެން ވަދެ ގޮނޑީގައި އިށީންކަމެއް ނޭނގެ އަޅުގަނޑުމެންނަށް ފެނުނީ ރައީސް ނުކުމެވަޑައިގެންތަން. އަޅުގަނޑުމެންނަކަށް ނޭނގެ ކިހިނެއް ވީ ކަމެއް ކަމެއް،" އޭނާ ވިދާޅުވިއެވެ.
އަދުރޭ ވިދާޅުވީ އާއްމު ރައްޔިތުންނަކަށް ވެސް، ސަރުކާރުގެ މުއައްސަސާއަކަށް ވެސް ސިޔާސީ ޕާޓީއަކަށް ވެސް ރައީސް އިބްރާހިމް މުހައްމަދު ޞާލިހު ތެދެއް ނުހައްދަވާ ކަމަށެެވެ.
"މި ވަރުގެ ބޮޑު އޮޅުވާލުން އޮޅުވައިލާތީ މިއީ ވަރަށް ކަންބޮޑުވާ ކަމެއް،" އޭނާ ވިދާޅުވިއެވެ.
އިދިކޮޅު ލީޑާޝިޕުން ރައީސްއާ ބައްދަލުކުރައްވަން ވަޑައިގެންނެވީ އިދިކޮޅުގެ ރިޔާސީ ކެނޑިޑޭޓް ރައީސް އަބްދުﷲ ޔާމީން އަބްދުލްގައްޔޫމަށް ނުހައްގުން އަނިޔާކުރާތާ 900އަށްވުރެ ގިނަ ދުވަސް ވެފައިވާތީ އާއި ހައިކޯޓުގައި އޮތް މައްސަލަ ނުހިންގާތީ އެކަމާ ކަންބޮޑުވެގެން ކަމަށް އަދުރޭ ވިދާޅުވިއެވެ.
ރައީސްގެ ކިބައިން އޮޅުންފިލުވަން ބޭނުންވަނީ އެއްވެސް އިންސާފެއް ނެތި ރައީސް ޔާމީނަށް އަނިޔާކުރަމުން ގެންދާތީ އެ އަނިޔާއަށް ނިމުމެއް އަންނާނީ ކޮން ދުވަހަކުންތޯ ކަމަށް ވެސް އޭނާ ވިދާޅުވިއެވެ.
"ރައްޔިތުން މި ތިބީ ކެތްމަދުވެފައި ރައީސް ޔާމީން ވެރިކަމަށް ގެންނަން. ރައްޔިތުން އެބަ ބޭނުންވޭ ހައިކޯޓުގައި އޮތް މައްސަލަ އަވަސްކުރަން،" އަދުރޭ ވިދާޅުވިއެވެ.
ގައުމު ހުއްޓުމަކަށް އައިސްފައިވާކަމަށާއި ގައުމުގައި ހިނގާ އެއްވެސް މުއައްސަސާއެއް ނެތް ކަމަށް އަދުރޭ ތުހުމަތު ކުރެއްވިއެވެ. ދައުލަތް ޖަވާބުދާރީ ކުރުވަން މަތިކޮށްފައި އޮތް ރައްޔިތުންގެ މަޖިލިސް ސަރުކާރުން ހުއްޓުވައިފައިވާ ކަމަށް ވެސް އޭނާ ވިދާޅުވިއެވެ.
"މި ވަރުވީމަ ރައީސް އޮފީހަށް އާދެވޭވަރު މަދު،" އޭނާ ވިދާޅުވިއެވެ.