19 Jun 2023, 10:47
ޕްރޮސެކިއުޓާ ޖެނެރަލްގެ އޮފީސް (ޕީޖީ އޮފީސް)އިން އަނެއްކާ ވެސް ހަފުތާއަކު ހަތަރު ދުވަހު މަސައްކަތް ކޮށްގެން ނިކުންނާނެ ނަތީޖާ ތަޖުރިބާ ކުރުމަށް ޓަކައި އަންނަ އާދިއްތަ ދުވަހުން ފެށިގެން އޯގަސްޓު ހަތަރުވަނަ ދުވަހުގެ ނިޔަލަށް ހަފުތާއަކު ހަތަރު ދުވަހު މަސައްކަތްކުރާ ގޮތަށް ހަމަޖައްސައިފިއެވެ.
ޕީޖީ އޮފީހުން ބުނީ މިއީ އެ އޮފީހުގެ މުވައްޒަފުންނަކީ އާންމު ދިރިއުޅުމާއި މަސައްކަތު މާހައުލުގައި ހަމަހަމަ މިންގަނޑެއް ގެންގުޅޭ، ނަފްސާނީ އަދި ޖިސްމާނީ ގޮތުން ދުޅަހެޔޮ ބަޔަކަށް ހެދުމަށް ޕްރޮސެކިއުޓާ ޖެނެރަލް ހުސައިން ޝަމީމް ގެންގުޅުއްވާ ތަސައްވުރުގެ ތެރެއިން ކުރާ ކަމެއްކަމަށެވެ.
ހަތަރު ދުވަހު މަސައްކަތް ކުރާ ގޮތަށް އޮތް ނަމަވެސް އެ އޮފީހުން ދޭ ޚިދުމަތްތައް އާންމު އުސޫލުގެ ތެރެއިން ރަސްމީ ބަންދުނޫން ފަސް ދުވަހު ވެސް ދޭނެ ކަމަށް ޕީޖީ އޮފީހުން ބުންޏެވެ.
ހަތަރު ދުވަހު މަސައްކަތްކުރާ ގޮތަށް ބަދަލުކުރުމާއެކު މަސައްކަތް ރާވާނެ ގޮތް:
ހަފުތާގެ ފަސް ދުވަހުގެ ތެރެއިން އެއް ދުވަހު މުވައްޒަފު އޮފީހަށް ނުކުމެ މަސައްކަތްކުރަން ނުޖެހޭ ގޮތަށް ހަމަޖެއްސުން.
- އޮފީހަށް ނުނިކުންނަ ދުވަހުގެ މަސައްކަތް އެހެން މަސައްކަތްތަކަށް ހުރަސް ނޭޅޭގޮތަށް މުވައްޒަފުންގެ މެދުގައި ބަހައިލުން.
- ގޭގައި މަސައްކަތްކުރާ ދުވަސްތަކުގައި ވެސް ޕްރޮސެކިއުޓަރުން ކޯޓަށް ދާންޖެހުން ފަދަ، އޮފީހަށް ނުކުމެ މަސައްކަތްކުރަންޖެހޭ ފަދަ ނުވަަތަ އެ ނޫން މަސައްކަތެއް އޮތްނަމަ އޮފީހަށް ނުކުމެ މަސައްކަތްކުރުން. އެ ދުވަހަކީ މުވައްޒަފަށް ލުއި ދުވަހެއްގެ ގޮތުގައި ހެދުން.
- މި މުއްދަތުގައި މުވައްޒަފު ސަލާމް ނުވަތަ އާއިލީ ޒިންމާ ޗުއްޓީއެއް ނަގައިފިނަމަ ޖެހިގެން އަންނަ ހަފުތާގައި އާންމު އުސޫލުން ފަސް ދުވަހު އޮފީހަށް ނުކުމެ މަސައްކަތްކުރުން.
ޕީޖީ އޮފީހުން ބުނީ އެ މުއްދަތުގެ ތެރޭގައި ހަތަރު ދުވަސް މަސައްކަތްކޮށް ނިކުންނަ ނަތީޖާ ގޯސްކަމަށް ފެނިއްޖެނަމަ އާންމު އުސޫލުން ފަސް ދުވަހު އޮފީހަށް ނުކުމެ މަސައްކަތްކުރާ ގޮތަށް ބަދަލުކުރާނެކަމަށެވެ.
ފާއިތުވި ރަމަޟާން މަހު ވެސް މަސައްކަތު ދުވަސް މަދުކޮށް ޕީޖީގެ މުވައްޒަފުން މަސައްކަތްކުރިއިރު އެ މުއްދަތުގެ ކުރެވުނު ތަޖުރިބާއާއި ނިކުތް ނަތީޖާ ވަރަށް އަވަހަށް ހިއްސާކުރާނެކަމަށް ޕީޖީ އޮފީހުން ބުންޏެވެ.