16 Jun 2023, 14:31
މޯލްޑިވްސް އިސްލާމިކް ބޭންކް (އެމްއައިބީ)އިން އެ ބޭންކުގެ ކަސްޓަމަރުންނަށް ޑިޖިޓަލް މެމްބާޝިޕް ޕްރޮޑަކްޓެއްގެ ގޮތުގައި މިބް9 ކްލަބް ލޯންޗުކޮށްފިއެވެ.
އެމްއައިބީއަށް މުސާރަޖަމާކުރާ ކަސްޓަމަރުންނަށް މުޅީން އެކްސްކުލޫސިވް ޚިދުމަތްތަކާއެކު ލޯންޗުކުރި މިބް ނައިން ކްލަބުގެ މެމްބަރަކަށްވުމަށްޓަކައި މުސާރަޖަމާކުރާ ބޭންކަކީ އެމްއައިބީ ކަމަށް ވާން ޖެހޭނެއެވެ.
މިވަގުތު އިސްލާމިކް ބޭންކުން މިބް9 ކުލަބުގެ މެމްބަރުންނަށް ފޯރުކޮށްދޭން ފަށާ ޚިދުމަތްތަކުގެ ތެރޭގައި ކްލަބުގެ މެމްބަރުންނަށް އުޖާލާ ދިރިއުޅުމުގެ ފައިނޭންސިން ރޭޓު ކުޑަކޮށްދިނުމާއި އުޖާލާ ދިރިއުޅުން ފައިނޭންސިންގެ ޕްރޮސެސިން ފީ ކުޑަކުރުން ހިމެނެއެވެ. މީގެ ސަބަބުން މިބް9 މެމްބަރުންނަށް ލިބޭ ފައިނޭންސިން ލިމިޓް ބޮޑުވެ، މަހުންމަހަށް ދައްކަންޖެހޭ އިންސްޓޯލްމަންޓުގެ އަދަދު ކުޑަވާނެއެވެ.
ހަމައެއާއެކު، އެމްއައިބީއިން ކަސްޓަމަރުންގެ ދިވެހި ރުފިޔާ އެކައުންޓަށް ދޫކުރާ ވީސާ އެވްރީޑޭ ޑެބިޓް ކާޑަށް ރާއްޖޭން ބޭރުގެ ފައިސާގެ މުޢާމަލާތްތަށް ކުރުމަށް މަހަކު 100 ޑޮލަރުގެ ލިމިޓެއް ކްލަބުގެ މެމްބަރުންނަށް ލިބޭނެއެވެ. ދިވެހި ރުފިޔާ އެކައުންޓަކުން ބޭރުގެ ފައިސާގެ މުޢާމަލާތެއް ކުރުމަށް ޑޮލަރު ލިމިޓެއް ދިނުމަކީ އިސްލާމިކް ބޭންކުން މުޅީން އަލަށް ފަށާފައިވާ ޚިދުމަތެކެވެ. މިޚިދުމަތް މިވަގުތު ލިބޭނީ ހަމައެކަނި މުސާރަ ޖަމާކޮށްގެން، މިބް9 މެމްބަރަކަށްވުމުންނެވެ.
މީގެ އިތުރުން މިބް9 މެމްބަރަކު ވިސާ އެވްރީޑޭ ކާޑަކަށް އެޕްލައިކުރުމުން ކާޑުގެ ޖޮއިނިންގް ފީއަށް ބޭންކުން ޗާޖެއްނުކުރާނެއެވެ. އަދި ވީސާ އެވްރީޑޭ އާއިލާ ކާޑެއް ނަގާނަމަ އެއް ކާޑުގެ ޖޮއިނިން ފީ ބޭންކަކުން ނުނަގާނެއެވެ.
މިބް9 ކްލަބުގެ މެމްބަރުންނަށް ބޭންކުގެ ކަސްޓަމާ ކެއާ ކޮންޓެކްޓް ސެންޓަރުން ޚިދުމަތް ހޯދުމަށްޓަކައި ފަސޭހަކޮށްދިނުމުގެ ގޮތުން ވަކި ޚާއްސަ ޑިޖިޓަލް ޗެނަލެއް ފޯރުކޮށްދޭނެއެވެ. މީގެ ސަބަބުން ޚިދުމަތްތަށް ހޯދުމަށް ފަސޭހަވާނެއެވެ.
މިބް9 މެމްބަރަކަށް ވުމަށް އެދި ބޭންކަށް ހުށައަޅާކަށް ނުޖެހޭނެއެވެ. މިވަގުތު އެމްއައިބީއަށް މުސާރަޖަމާކުރާ ހުރިހާ ފަރާތްތަކުގެ ތެރެއިން ޝަރުތުހަމަވާ ފަރާތްތަށް ބޭންކުން މެމްބާޝިޕް ހަމަޖެހުނު ކަމުގެ އީމެއިލް ފޮނުވާނެ ކަމަށް އެމްއައިބީއިން ބުންޏެވެ. އަދި އަލަށް މި ކްލަބުގެ މެމްބަރަކަށްވުމަށް ބޭނުންވާ ފަރާތްތަކުން މުސާރަޖަމާކުރަން ފަށާތާ އެއް މަސްވުމުން ބޭންކުން އެކަސްޓަމަރުންނަށް މެމްބާޝިޕް ހަމަޖެހުނުކަން އީމެއިލް މެދުވެރިކޮށް އަންގާނެއެވެ.
އެމްއައިބީއިން ބުނި ގޮތުގައި، މިބް9 ކުލަބަކީ އިސްލާމިކް ބޭންކަށް މުސާރަ ޖަމާކުރާ ކަސްޓަމަރުންނަށް މުސްތަގުބަލުގައި ބޮޑެތި ފަސޭހަތަކާއި އިތުރު ޚިދުމަތްތަކެއް ފޯރުކޮށްދިނުމަށް ފަށާ ޚިދުމަތެކެވެ. އަދި މެމްބަރުންނަށް އަލަށް ފަށާނެ ޚާއްޞަ ޚިދުމަތްތަކުގެ ތަފްސީލު ބޭންކުގެ ވެބްސައިޓްއާއި ސޯޝަލް މީޑިއާ މެދުވެރިކޮށް އެ ބޭންކުން ކަސްޓަމަރުންނާ ހިއްސާ ކުރަމުންގެންދާނެއެވެ.