06 Jun 2023, 14:57
ރައްޔިތުންގެ މަޖިލީހުގެ ރައީސް، މުހައްމަދު ނަޝީދުގެ އަމަލުފުޅުތަކަށް ކެތް ކުރެވޭނީ ވަކި ވަރަކަށް ކަމަށާއި، އެމްޑީޕީ މެންބަރުންގެ މެދުގައި އެ މަނިކުފާނަށް އޮތް އިޙްތިރާމް ގެއްލިއްޖެ ކަމަށް އެމްޑީޕީގެ ޕާލިމަންޓްރީ ގްރޫޕުގެ ލީޑަރު، ހިތަދޫ އުތުރު ދާއިރާގެ މެންބަރު މުހައްމަދު އަސްލަމް މިއަދު ވިދާޅުވެއްޖެއެވެ.
މަޖިލީހުގެ ރިޔާސަތުގައި އިންނަވައި، ރައީސް ނަޝީދު އަމަލު ކުރައްވަމުން ގެންދަވާ ގޮތާ މެދު އެމްޑީޕީން ކަންބޮޑުވުން ފާޅުކޮށްފައިވާއިރު، އެކަމާ ގުޅިގެން އިއްޔެ ބޭއްވި ނޫސްވެރިންގެ ބައްދަލުވުމުގައި ވެލިދޫ ދާއިރާގެ މެންބަރު ވަނީ ރައީސް ނަޝީދު މަގާމުން ދުރު ކުރުމުގެ ވަގުތު އަދި ނުޖެހޭ ކަމަށް ވިދާޅުވެފައެވެ.
އަދި، އެ މަނިކުފާނަކީ އެމްޑީޕީގެ ރައީސަށް ވީހިނދު، އެ މަނިކުފާނަށް އޮންނަ އިޙްތިރާމެއްގެ ސަބަބުން ޕީޖީ ގްރޫޕްގެ ވިސްނުން ހުރީ މަޝްވަރާގެ މަގުން އޮމާންކަމާ އެކު ކަންކަން ހައްލު ކުރަން ކަމަށް ވެސް ވިދާޅުވިއެވެ.
ނަމަވެސް، އެމްޑީޕީގެ ޕާލިމަންޓްރީ ގްރޫޕުން ރައީސް ނަޝީދު މަގާމުން ދުރު ކުރުމުގެ މައްސަލަ ހުށަހަޅަން މިއަދު ވަނީ ނިންމާފައެވެ.
މިއަދު ބޭއްވި ނޫސްވެރިންގެ ބައްދަލުވުމުގައި އެކަމާ ގުޅިގެން "ސަން"އިން ކުރި ސުވާލަށް ޖަވާބު ދެއްވަމުން އަސްލަމް ވިދާޅުވީ، އެންމެން ވެސް ގަބޫލު ކުރަމުން ދިޔައީ ރައީސް ނަޝީދަކީ ޑިމޮކްރެޓިކް ހަމަތައް ނަގަހައްޓާނެ ބޭފުޅެއް ކަމަށާއި، ރާއްޖޭގެ އިސްލާހީ މަސައްކަތުގައި މަސައްކަތް ކުރައްވާނެ ބޭފުޅެއްގެ ގޮތުގައި ކަމަށެވެ.
މިއަދު އެމްޑީޕީ ޕީޖީ ގްރޫޕުން މަޖިލީހުގައި ބޭއްވި ނޫސްވެރިންގެ ބައްދަލުވުން -- ސަން ފޮޓޯ/ މުހައްމަދު ޝާތިއު އަބްދުﷲ
އެހެންނަމަވެސް މި ފަހުން ރައީސް ނަޝީދުގެ އަމަލުތައް ހުރީ އެއާ މުޅީން އިދިކޮޅަށް ކަމަށާއި، ރައީސް ނަޝީދު އިސްކަން ދެއްވަނީ އަމިއްލަ މަސައްކަތްޕުޅުތަކަށް ކަމަށް އޭނާ ތުހުމަތު ކުރެއްވިއެވެ.
ވަކިން ޚާއްސަކޮށް ރައްޔިތުންގެ މަޖިލީހުގެ މެންބަރުންތަކެއްގެ ގޮތުގައި އަޅުގަނޑުމެން ހަރަކާތްތެރި ވަމުން ދާއިރު، ވަރަށް މުހިންމު އެއް ކަމެއް މަޖިލީހުގެ ގަވާއިދާއި، ހަމަޖެހިފައި އޮންނަ އުސޫލުތަކުގެ ހުދޫދުގެ ތެރެއިން ކުރިއަށް ގެންދިއުން. އެހެން ނަމަވެސް އެކަންކަން މުގުރި، ފުނޑިގެން ދާތަން އަޅުގަނޑު މެންނަށް މި ފެންނަނީ. ރައްޔިތުންގެ މަޖިލީހުގެ ހައިބަތާ ކަރާމާތް ގެއްލިގެން ދާތަން މި ފެންނަނީ,ހިތަދޫ އުތުރު ދާއިރާގެ މެންބަރު މުހައްމަދު އަސްލަމް
އަސްލަމް ވިދާޅުވީ އެ ކަންކަމަށް އިންތިހާއަށް ކެތް ކުރެވިއްޖެ ކަމަށާއި، އެހެންނަމަވެސް ޕާލިމަންޓްރީ ގްރޫޕަށް ކަމެއް ހުށަހެޅުމުން، ޕީޖީ ލީޑަރުގެ ހައިސިއްޔަތުން އެ ކަމަށް ވޯޓަށް ދާން ޖެހޭނެ ކަމަށެވެ. ރައީސް ނަޝީދު މަގާމުން ދުރު ކުރަން ނެގި ވޯޓުގައި ބައިވެރިވެވަޑައިގެންނެވީ 41 މެންބަރުންނެވެ.
އެގޮތަށް ފާސްކުރަން ފެނިވަޑައިނުގަންނަވާ ކަމަށް ފަސް މެންބަރުން ވޯޓު ދެއްވިއެވެ.
އެހެން ނަމަވެސް އެ މެންބަރުން ތިއްބެވީ ނަޝީދު ވަކިކުރުމުގެ މައްސަލަ ކުރިއަށް ގެންދަވާ ގޮތަށް ކަމަށް ވެސް އޭނާ ވިދާޅުވިއެވެ. އެމްޑީޕީން ވަނީ މަޖިލީހުގެ ނައިބު ރައީސްގެ މަގާމުން އީވާ އަބްދުﷲ ވަކިކުރުމަށް ވެސް ހުށަހަޅައިފައެވެ.