06 Jun 2023, 09:04
ބްރައިޓަންގެ އާޖެންޓީނާ މިޑްފީލްޑަރު އެލެކްސިސް މެކް އެލިސްޓާ، ފަސް އަހަރު ދުވަހުގެ ކޮންޓްރެކްޓެއްގެ ދަށުން ލިވަޕޫލާ ގުޅުމަށް ނިންމާފައިވާ ކަމަށް ރިޕޯޓުކޮށްފިއެވެ.
ރިޕޯޓުތައް ބުނާގޮތުގައި އާޖެންޓީނާއަށް ވޯލްޑް ކަޕް 2022 ކާމިޔާބުކޮށްދިނުމުގައި އިސް ދައުރެއް އަދާކުރި މެކް އެލިސްޓާ ވަނީ ލިވަޕޫލަށް ދިގު މުއްދަތެއްގެ ކޮންޓްރެކްޓެއްގައި ސޮއިކުރުމަށް ނިންމައިފައެވެ. ލިވަޕޫލުގެ ހުށަހެޅުންތަކަށް މެކް އެލިސްޓާ އެއްބަސްވެފައިވާ އިރު، ކުރިއަށް ދެން އޮތީ ހަމައެކަނި މެޑިކަލް ފުރިހަމަކުރުން ކަމަށް ރިޕޯޓުތައް ބުނެއެވެ.
އިތުބާރު ހުރި ނޫސްވެރިޔާ ފަބްރީޒިއޯ ރޮމާނޯ ބުނެފައިވާ ގޮތުގައި ލިވަޕޫލުން މެކް އެލިސްޓާ ހޯދުމަށް 60 މިލިއަން ޕައުންޑް (74 މިލިއަން ޑޮލަރު) ހަރަދުކުރަން ޖެހޭނެއެވެ. މެކް އެލިސްޓާގެ ޓްރާންސްފާގެ އަގު ބޮޑުވި ނަމަވެސް، އެއީ ރެކޯޑު އަގެއް ކަމަކަށް ނުބެލެވެއެވެ.
މިސީޒަނަށްފަހު ލިވަޕޫލުން ނަބީ ކޭޓާ އާއި އެލެކްސް އޮކްސްލޭޑް ޗެމްބާލެއިން އަދި ޖޭމްސް މިލްނާގެ ކޮންޓްރެކްޓް ހަމަވުމާއެކު ކްލަބު ދޫކޮށްލުމުން، ލިވަޕޫލަށް ވަނީ މިޑްފީލްޑް މަގާމަށް ކުޅުންތެރިން ހޯދުމަށް މަޖުބޫރުވެފައެވެ. އެގޮތުން ލިވަޕޫލުން އެންމެ ބޮޑަށް ހޯދުމަށް މަސައްކަތްކުރާ ކުޅުންތެރިޔަކީ އުމުރުން 24 އަހަރުގެ މެކް އެލިސްޓާއެވެ.
އަންނަ ސީޒަނުގެ ޔޫއެފާ ޗެމްޕިއަންސް ލީގުން ޖާގައެއް ލިބިފައިނުވުމުން، ލިވަޕޫލުގެ ސްކޮޑަށް ވަނީ ބަދަލުތަކެއް ގެންނަން ޖެހިފައެވެ. އިނގިރޭސި ޕްރިމިއާ ލީގުގެ ފަސްވަނައިގައި ނިންމާލަން ޖެހުމުން އަންނަ ސީޒަނުގައި ލިވަޕޫލް ފެންނާނީ ޔޫރޮޕާ ލީގުންނެވެ.