28 May 2023, 09:28
އެކްޓަރު އާޔުޝް ޝަރްމާގެ އެކްޝަން ފިލްމު "ރުސްލާން"ގެ ވާހަކައާއި ޑައިލޮގްސްއަކީ ކޮޕީއެއް ކަމަށް ބުނެ އެކްޓަރާއި ދެކޮޅަށް ދަޢުވާ އުފުލައިފިއެވެ.
އާޔުޝް ޝަރުމާއާއި ދެކޮޅަށް އިންޑިއާގެ ނިއު ދިއްލީ ކޯޓަށް ހުށަހެޅި މައްސަލައިގައި ބުނެފައިވަނީ ފިލްމު "ރުސްލާން"ގައި ބޭނުންކޮށްފައި ވަނީ 2009ވަނަ އަހަރު ރިލީޒްކުރެވުނު އަސްލު ފިލްމުގެ ސްޓޯރީ ލައިންއާއި ޑައިލޮގްތައް ކަމުގައެވެ. އަދި, މި ފިލްމުގެ ޑައިލޮގްތަކާއި ވާހަކަ ކުރީގެ ފިލްމާ އެއްގޮތަށް ބޭނުންކުރިއިރު އެއްވެސް ވަރަކަށް ކޮޕީ ރައިޓްސް ވެސް ހޯދާފައިނުވާ ކަމަށް ކޯޓަށް ހުށަހެޅި މައްސަލައިގައި ވަނީ ބަޔާންކޮށްފައެވެ.
މި މައްސަލައިގެ އަޑު އެހުން ކުރިއަށް އޮތް ޖޫން މަހުގެ ނުވަވަނަ ދުވަހަށް ޝެޑިއުލްކޮށްފައިވާއިރު އާޔުޝްއާ އެކު ފިލްމުގެ ދެ ޕްރޮޑިއުސަރުން ކަމަށްވާ ކޭކޭ ރާދާ މޯހަން އަދި ސައުތް އެކްޓަރު ޖަގްޕަތީ ބާބޫއާ ދެކޮޅަށް ވެސް މައްސަލަ ވަނީ ހުށަހަޅާފައެވެ.
މި އަހަރުގެ އޭޕްރީލް މަހު ފިލްމުގެ ޓްރެއިލާ އާއްމުންނަށް ދައްކާލާފައިވާއިރު ފިލްމު ރިލީޒްކުރުން މިހާރު ވަނީ ލަސްކުރެވިފައެވެ. ފިލްމުގައި އާޔުޝް ވަރުގަދަ އެކްޝަން ރޯލްއަކުން ފެންނައިރު ފިލްމުގެ ޓްރެއިލާ ރިލީޒްވުމާ އެކު ގިނަބަޔަކު ދިޔައީ ފިލްމު ރިލީޒްކުރާނެ ދުވަހަކަށް އިންތިޒާރު ކުރަމުންނެވެ.
އެކްޓަރު ސަލްމާން ޚާންގެ އަންހެން ކޮއްކޮ އަރުޕިތާގެ ފިރިމީހާ ފިލްމީ ދާއިރާއަށް ނުކުތީ 2018ވަނަ އަހަރު ފިލްމު "ލަވްޔަތުރީ"އިންނެވެ. އެއަށް ފަހު ފިލްމު "އަންތިމް"އިން 2021ވަނަ އަހަރު އާޔުޝް ބެލުންތެރިންނަށް ފެނުނެވެ.
މި ފިލްމަކީ، ސަލްމާން ޚާންއާ އެކު އާޔުޝްގެ ވަރުގަދަ ކުރިމަތިލުންތަކެއް ދައްކުވައިދިން ފިލްމެކެވެ. ދާދި ފަހުން ރިލީޒްވި ފިލްމު "ކިސީކާ ބާއި ކިސީކީ ޖާން"އިން ވެސް އާޔުޝްއަށް ފުރުސަތު ލިބުނެވެ. އެހެންނަމަވެސް އެ ފިލްމުގައި އާޔުޝްއަށް ހުށަހެޅި ރޯލް ކުޑަކަމުން އެކްޓަރުވަނީ ފަހުން ފިލްމު ދޫކޮށްލާފައެވެ. ފިލްމު "ރުސްލާން"ގެ އިތުރުން އާޔުޝް މަސައްކަތް ފަށާފައިވާ އިތުރު ފިލްމަކީ، "ކްވަތާ"ނަމަކަށް ކިޔާ ފިލްމެކެވެ. މި ފިލްމުގައި އާޔުޝްއާ އެކު ބަތަލާގެ ރޯލްއިން ފެންނާނީ ކެޓްރިނާ ކައިފްގެ ކޮއްކޮ އިޒަބެއްލާ ކައިފްއެވެ.