24 May 2023, 15:01
"ހަނގުރާމަ އޮންނާނެ" ކަމަށް ބުނެ، ރެއާލް މެޑްރިޑްގެ ބްރެޒިލް ފޯވަޑް ވިނީޝިއަސް ޖޫނިއާގެ ދިފާއުގައި ބާސެލޯނާގެ ބްރެޒިލް ފޯވަޑް ރަފީނިއާ ތެދުވެއްޖެއެވެ.
ސްޕެނިޝް ލަލީގާގައި މިދިޔަ އާދީއްތަ ދުވަހު ވެލެންސިއާ އަތުން 1-0 ގެ ނަތީޖާއަކުން ރެއާލް ބަލިވި މެޗުގައި ވެލެންސިއާގެ ސަޕޯޓަރުންތަކެއް ވަނީ ވިނީޝިއަސްއަށް ނަސްލީގޮތުން ދިމާކޮށްފައެވެ. އެކަމާ ހިތްހަމަނުޖެހުން ފާޅުކޮށް، ހިނގި މައްސަލައެއްގައި ވިނީޝިއަސްއަށް ވަނީ އެ މެޗުގައި ރަތް ކާޑެއް ވެސް ދައްކައިފައެވެ.
ލަލީގާގެ ޗެމްޕިއަންކަން ހޯދާފައިވާ ބާސާ އިން ރޭ ވިލަޑޮލިޑް އަތުން 3-1 ގެ ނަތީޖާއަކުން ބަލިވި މެޗުގައި ރަފީނިއާ ވަނީ ވިނީޝިއަސްގެ ދިފާއުގައި ހާއްސަ މެސެޖެއް ދީފައެވެ. އެ މެޗުގައި ދަނޑުން ފައިބަމުން ރަފީނިއާ ޖާޒީ ބާލާފައިވާ އިރު، އޭނާ އެތެރެއިން ލައިގެން ހުރި ޓީޝާޓުގައި ލިޔެފައިވަނީ، "ލޮލުގެ އަލިކަމަށް ވުރެ، މީހާގެ ކުލަ މުހިންމުވާ ނަމަ، ހަނގުރާމަ އޮންނާނެ،" ކަމަށެވެ.
ރޭ ކުޅުނު އެ މެޗުގެ ކުރިން ނަސްލީ ތަފާތުކުރުންތަކާ ދެކޮޅު މެސެޖެއް ވެސް ވަނީ ދައްކާލައިފައެވެ. ބާސާ އާއި ވިލަޑޮލިޑްގެ ކުޅުންތެރިން ހިފަހައްޓައިގެން ހުރި ބެނާގައި ވަނީ، ނަސްލީގޮތުން ތަފާތުކުރާ މީހުން ފުޓުބޯޅައިން ދުރަށް ދިއުމަށް ގޮވާލައިފައެވެ.
މިސީޒަނުގައި ގިނަ ބަޔަކު ވަނީ ވިނީޝިއަސްއަށް ނަސްލީގޮތުން ދިމާކޮށްފައެވެ. އެކަމާ ގުޅޭގޮތުން ލަލީގާއަށް ޝަކުވާތަކެއް ހުށަހަޅާފައިވާ އިރު، އެ މައްސަލަތަކުގައި ލަލީގާގެ ވެރިން ވެސް މިހާރު ވަނީ "ހޫނު ފެނަށް" ވެއްޓިފައެވެ.
ވިނީޝިއަސްއަށް ނަސްލީގޮތުން ދިމާކުރާތީ، އެކަމާ ދެކޮޅަށް މީގެ ކުރިން ވެސް ގިނަ ކުޅުންތެރިންތަކެއް ވަނީ އަޑު އުފުލައިފައެވެ. އޭގެ ތެރޭގައި ރަފީނިއާގެ އިތުރުން ޕީއެސްޖީގެ ބްރެޒިލް ތަރި ނޭމާ އާއި ފްރާންސް ތަރި ކިލިއަން އެމްބާޕޭ އަދި ބްރެޒިލްގެ ފުޓުބޯޅަ ލެޖެންޑް ރޮނާލްޑޯ ނަޒާރިއޯ ފާހަގަކޮށްލެވެއެވެ.
ވެލެންސިއާއާ ދެކޮޅަށް ރެއާލުން ކުޅުނު މެޗުގައި ވިނީޝިއަސްއަށް ނަސްލީގޮތުން ދިމާކުރި ބައެއް މީހުން ފުލުހުން މިހާރު ވަނީ ދެނެގަނެފައެވެ. ނަމަވެސް ފުލުހުންނަށް އަދި ދެނެގަނެވިފައިވަނީ އޭގެ ތެރެއިން ތިން މީހެކެވެ.
ލަލީގާއަށް ގިނަ ފާޑުކިޔުންތަކެއް އަމާޒުވެފައިވާ އިރު، އެ މައްސަލައިގެ ތެރެއަށް ސްޕެއިންގެ ފުޓުބޯޅަ ފެޑެރޭޝަން ވެސް ވަނީ ވަދެފައެވެ. ރަތް ކާޑާ ގުޅިގެން ވިނީޝިއަސްއަށް ކުރިމަތިވާ ސަސްޕެންޝަން މިހާރު ވަނީ އުވާލައިފައެވެ. އޭގެ އިތުރުން ވެލެންސިއާގެ ދަނޑުގައި ކުޅޭ ފަސް މެޗެއްގައި ސަޕޯޓަރުން ނުވައްދާ ގޮތަށް ފިޔަވަޅު އަޅައި، ނަސްލީގޮތުން ދިމާކުރާ ސަޕޯޓަރުން ބޮޑު އަދަދަކުން ޖޫރިމަނާކުރުމަށް ވަނީ ނިންމައިފައެވެ.