23 May 2023, 09:39
ފިލްމާއި ޓީވީ ޝޯތަކަށް ލޯބި ކުރާ މީހުން މި ދުވަސްކޮޅު އެއްވެސް ސޯޝަލް މީޑިއާއަކަށް ވަންނަ ނަމަ އާންމުކޮށް ފެންނާނީ އެކައްޗެކެވެ. އެއީ, ނެޓްފްލިކްސް އިން އަލަށް ނެރުނު ރޮމް ކޮމް ޑްރާމާ ޝޯ "އެކްސް އޯ، ކިޓީ"ގެ ވާހަކައެވެ.
ނެޓްފްލިކްސް އިން މިދިޔަ ހަފުތާ ބަންދާ ދިމާކޮށް ނެރުނު ޝޯއަކީ މުޅި ޓްވިޓާ އާއި ފޭސްބުކްގެ އިތުރުން ޓިކްޓޮކްގައި ވެސް އެންމެ ގިނަ ބަޔަކު ވާހަކަ ދައްކަމުން އަންނަ ޝޯއެވެ. އެއްބަޔަކަށް ޝޯ ވަރަށް މަޖަލެވެ. އަނެއް ބަޔަކަށް ޝޯ ކަމަކު ނުދެއެވެ. ޝޯ އާ ގުޅޭ ގޮތުން ރުޅި އައިސްގެން އުޅޭ މީހުން ވެސް މަދެއް ނޫނެވެ. ކޮންމެ ގޮތެއް ވިޔަސް ހުރިހާ އިހުސާސެއް ހިއްސާ ކުރަން ނަމަވެސް ޝޯއާ ގުޅޭގޮތުން ވާހަކަ އެބަ ދައްކައެވެ.
އެކްސް އޯ ކިޓީ އަކީ ނެޓްފްލިކްސްގެ ހިޓް ފްރެންޗައިޒް ފިލްމު ސީރީޒް ކަމަށްވާ "ޓު އޯލް ދަ ބޯއިސް އަ ލަވްޑް"ގެ ސްޕިން އޮފް ޝޯއެކެވެ. މި ޝޯގައި އަލި އަޅުވާލާނީ ފިލްމު ސީރީޒްގެ ލީޑް ކެރެކްޓަރު ލާރާ ޖީން ކަވީގެ ކޮއްކޮ ކިޓީގެ ދިރިއުޅުމަށެވެ.
ފިލްމު ސީރީޒްއިން ވެސް ކިޓީ ފެނިގެން ގޮސްފައިވާއިރު އަލަށް ނެރުނު ޝޯގައި އޭނާ ދިރިއުޅުމަށް ބޮޑު ބަދަލެއް އަންނަ ގޮތް ކިޔައިދެއެވެ.
ޝޯގައި ކިޓީއަށް 16 އަހަރު ވެފައިވާއިރު އޭނާ ދިރިއުޅުން ކޮރިއާއަށް ބަދަލު ވަނީ ކިޔަވާށެވެ. ކޮރިއަން އެމެރިކަން އެއް ކަމަށްވާ ކިޓީގެ ދިރިއުޅުމުގެ ބޮޑު ބައެއް ހޭދަ ކުރީ އެމެރިކާގައެވެ. އެއަށް ފަހު ކޮރިއާއަށް ގޮސް ކަންތައް ވާ ގޮތް ޝޯއިން ފެނިގެން ދެއެވެ. ކޮރިއާއަށް ގޮސް ސްކޫލަކަށް ދާއިރު އެ ސްކޫލުން ތަފާތު އެކި ވައްތަރުގެ ކުދިންނާ ދިމާވެއެވެ.
މި ޝޯއަކީ ބޮޑު ބަޖެޓެއް ބޭނުންކޮށްގެން ތައްޔާރު ކޮށްފައިވާ ޝޯއަކަށް ވާއިރު ކޮރިއާގެ ބޮޑެތި ތަރިން ވެސް ވަނީ ކެމިއޯއެއްގެ ގޮތުގައި ޝޯއިން ފެނިފައެވެ. އޭގެ ތެރޭގައި ޓެކިޔޯން އާއި ހަން ޗައެ ޔަންގް އަދި ރިޔޫ ހަންބީ ވެސް ހިމެނެއެވެ.