20 May 2023, 14:57
ރޭ މާލޭގައި ޒުވާން ދެ އަންހެނުން ހިންގި މާރާމާރީއާ ގުޅިގެން އެ ދެ މީހުން ވެސް ހައްޔަރުކޮށްފައިވާކަމަށް ފުލުހުން ބުނެފިއެވެ.
"ސަން"އާ ވާހަކަދައްކަވަމުން ފުލުހުންގެ މީޑިއާ އޮފިޝަލް ވިދާޅުވީ މާރާމާރީއާ ގުޅިގެން ފުލުހުންގެ ބެލުމުގެ ދަށުގައި ބައިތިއްބައިފައިވަނީ 19 އަހަރުގެ ދެ އަންހެނުންކަމަށެވެ.
އެ މާރާމާރީ ހިނގީ އަޅިވިލާ މަގުގައެވެ. އެ ކަމުގެ މައުލޫމާތު ލިބުމާއެކު ފުލުހުން އެ ތަނަށް ގޮސް އެ ކަން ހުއްޓުވުމަށް މަސައްކަތްކުރިކަމަށް ވެސް ފުލުހުންގެ މީޑިއާ އޮފިޝަލް ވިދާޅުވިއެވެ.
އެއާއެެކު މިހާރު އެ މައްސަލަ އިތުރަށް ތަހުގީގުކުރަމުން އަންނަކަމަށް ފުލުހުން ބުންޏެވެ.
ސޯޝަލް މީޑިއާގައި އާންމުވެފައިވާ ވީޑިއޯއިން ފެންނަނީ ދެ އަންހެނަކު މަގުމަތީ އަޑުގަދަކޮށް ޒުވާބު ކުރާ ތަނެވެ. އެއިރު ފުލުހުންގެ ވެހިކަލް އެ ތަނުގައި އޮތެވެ. އަދި ފުލުހުން ވެސް އެ ދެ މީހުން ހުއްޓުވުމަށް މަސައްކަތްކުރާ މަންޒަރު ފެނެއެވެ.
ނަމަވެސް އިރުކޮޅެއްފަހުން އެ ތަނުން އެއް އަންހެނަކު އަނެއް އަންހެން މީހާ ގައިގައި ޖަހަން އަތް ނަގައެވެ. އަދި ފުލުހުން އޭނާ ހުއްޓުވައި ދެ މީހުންގެ އަތުގައި ވެސް ބިޑި އަޅުވަން މަސައްކަތްކުރެއެވެ.
އެއަށްފަހު އެ ދެ މީހުން ވެސް ފުލުސް ކާރަށް އަރުވައެވެ.