18 May 2023, 18:36
ހިޔާ ފްލެޓުތަކުގެ އިމާރާތެއްގެ ދެ އެޕާޓްމަންޓް އެއްކޮށްލައިގެން އެއް އެޕާޓްމަންޓަކަށް ބަދަލުކުރި މައްސަލައިގައި ޖޫރިމަނާއަށް ތަބާނުވުމުން, 14 ދުވަސްތެރޭ އެ އެޕާޓްމަންޓް އާބަންކޯއަށް ހަވާލުކުރަން އަންގައިފިއެވެ.
މި މައްސަލަ މީޑިއާއަށް ފެންމަތިވީ މި މަހުގެ ފަސްވަނަ ދުވަހުއެވެ. މިކަން ތަހުގީގުކުރުމަށް ފަހު އާބަންކޯއިން ވަނީ ދެ އެޕާޓްމަންޓުގެ ވެރިފަރާތް 1000،000 ރުފިޔާއިން ޖޫރިމަނާ ކޮށްފައެވެ. އަދި, އެ ޖޫރިނަމާ ފަސް ދުވަހުގެ ތެރޭގައި ދެއްކުމަށާއި އެޕާޓްމަންޓް ކުރިން ހުރި ގޮތައް ބަދަލުކޮށް 10 ދުވަހުގެ ތެރޭގައި ދެއްކުމަށް އާބަންކޯއިން ބުންނެވެ.
އާބަންކޯއިން މިއަދު އެކަމާ ގުޅިގެން މީޑިއާތަކަށް ހިއްސާކުރި މެސެޖެއްގައި ވަނީ، އެ ދެ އެޕާޓްމަންގެ ވެރިފަރާތުން ޖޫރިމަނާ ފައިސާ ދައްކާފައި ނުވާކަމަށެވެ. އަދި, 10 ދުވަސްތެރޭ އެޕާޓްމަންޓް ހުރި ގޮތައް ބަދަލުކޮށް ދައްކަން އެދުމުން އެކަން ވެސް ކޮށްފައިނުވާ ކަމަށެވެ.
އެއްކޮއްލާފައިވާ ހިޔާ ފްލެޓުގެ ދެ އެޕާޓްމަންޓުގެ ފޮޓޯތައް ވެސް ސޯޝަލް މީޑިއާގައި ވަނީ ވައިރަލް ވެފައެވެ. އެ ފޮޓޯތަކުން ފެންނަ ގޮތުގައި ދެ އެޕާޓްމަންޓް އެއްކޮށްލާ އެތަން ހަދާފައި ވަނީ ވަރަށް ފެންވަރު ރަނގަޅު ކޮށެވެ.
ހިޔާ ފްލެޓުތަކުގައި ގަވާއިދާ ޚިލާފަށް އުޅޭ ފަރާތްތަކާ މެދު ފިޔަވަޅު އަޅަން، އާބަންކޯއިން ނިންމާފައިވާ ކަމަށް މިދިޔަ ފެބްރުއަރީ މަހު އެ ކޯޕަރޭޝަނުން ވަނީ ބުނެފައިވެއެވެ.
އެގޮތުން ހިޔާ ފްލެޓުތަކުގައި ގަވާއިދާ ޚިލާފު އެކި ކަންކަން ކުރަމުންދާކަން ފާހަގަވެފައިވާ ކަމަށް އާބަންކޯއިން އޭރު ބުންޏެވެ. އެ ކޯޕަރޭޝަނުން ބުނީ އޭގެ ސަބަބުން ފްލެޓުތަކުގައި އުޅޭ އެހެން ފަރާތްތަކަށް އުޅެން ދަތިވުމުގެ މައްސަލަތައް ފެންމަތިވަމުންދާ ކަމަށެވެ. ފްލެޓްތަކުގެ ސްޓަރްޗާއަށް ބަދަލު ގެނައުމަކީ މަނާ ކަމަކަށް ވީ ނަމަވެސް އެފަދަ ކަންކަން ފާހަގަވާ ކަމަށް އާބަންކޯއިން ބުންޏެވެ.
މިފަދަ މައްސަލަތައް މަދުކުރުމަށްޓަކައި ޚާއްސަ އިންސްޕެކްޝަން ތަކެއް އާބަންކޯއިން ކުރިއަށް ގެންގޮސްފައިވެއެވެ. އަދި, އެ ކުންފުނިން ބުނީ އެ އިންސްޕެކްޝަން ތަކުން ފާހަގަވާ ކަންކަމަށް ބަލައި އެކަށީގެންވާ ފިޔަވަޅުތައް އެޅުމުގެ މަސައްކަތް އެ ކުންފުނިން ކުރާނެ ކަމަށެވެ.
އާބަންކޯއިން ދަނީ ހިޔާ ފްލެޓުތަކުގެ ޙާލަތު ބެލުމަށް ދޭތެރެ ދޭތެރެއިން އެކި ކަހަލަ އިންސްޕެކްޝަންތައް ކުރިއަށް ގެންދަމުންނެވެ. މި ފަދަ އިންސްޕެކްޝަންތަކުގައި ފާހަގަވާ އެކި ކަންކަމަށް ޢާންމުންނަށް ނަސޭހަތްތެރިވި ނަމަވެސް، ބައެއް ޢާންމުންގެ ފަރާތުން އެހީތެރިކަން ނުލިބޭކަމަށް އެކުންފުނިން ބުނެއެވެ.