15 May 2023, 17:22
ހަ ސަތޭކަ މިލިއަން ރުފިޔާއަށްވުރެ ބޮޑު ހޭދައަކަށް ހަތް ރަށެއްގައި 30 އެނދުގެ ހޮސްޕިޓަލްތައް އެޅުމަށް ދެ ކުންފުންޏަކަށް ހަވާލުކޮށް އެ ކަމުގެ އެއްބަސްވުމުގައި މިއަދު ސޮއިކޮށްފިއެވެ.
މި އެއްބަސްވުންތަކުގައި ސޮޮއިކުރީ ހެލްތު މިނިސްޓްރީގައި އެ ކަމަށްޓަކައި ބޭއްވި ޚާއްސަ ހަފުލާގައެވެ.
ހޮސްޕިޓަލް އެޅުމަށް ހަމަޖެހިފައިވާ ހަތް ރަށަށް ޖުމުލަ 686.1 މިލިއަން ރުފިޔާ ޚަރަދުވެއެވެ. މި މަޝްރޫއުގެ ދަށުން އިމާރާތްކުރާ ހުރިހާ ހޮސްޕިޓަލެއް ވެސް 18 މަސްދުވަހުގެ ތެރޭ ނިންމަން ޖެހެއެވެ.
ހޮސްޕިޓަލްތައް އެޅުމުގެ އެއްބަސްވުމުގައި ހެލްތު މިނިސްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ސްޓޭޓް މިނިސްޓަރު އަހްމަދު އާދިލެވެ.
ހޮސްޕިޓަލް އަޅަން ހަވާލުކުރި ހަތް ރަށާއި ކުރާ ޚަރަދު:
ހދ. ހަނިމާދޫ - 90.5 މިލިއަން ރުފިޔާ
- ތ. ވިލުފުށި - 109.3 މިލިއަން ރުފިޔާ
- ވ. ފެލިދޫ - 102 މިލިއަން ރުފިޔާ
- އދ. މާމިގިލި - 101.2 މިލިއަން ރުފިޔާ
މި ހަތަރު ހޮސްޕިޓަލް ހަވާލުކޮށްފައިވަނީ ދިވެހި ކުންފުންޏެއް ކަމަށްވާ ޑުޕްލެކްސް ޕްރައިވެޓް ލިމެޓެޑަށެވެ.
ށ. މިލަންދޫ - 95.6 މިލިއަން ރުފިޔާ
- ނ. ވެލިދޫ - 95.6 މިލިއަން ރުފިޔާ
- ކ. ތުލުސްދޫ - 92 މިލިއަން ރުފިޔާ
މި ތިން ހޮސްޕިޓަލް ހަވާލުކޮށްފައިވަނީ އިންޑިއާ ކުންފުންޏެއްކަމަށްވާ އާނަންދަ ބިލްޑްޓެކް ޕްރައިވެޓް ލިމިޓެޑަށެވެ.
މި ހޮސްޕިޓަލްތައް އެޅުމުގެ މަޝްރޫއަށް ފަންޑު ކޮށްފައިވަނީ ކުވައިތު ފަންޑުންނެވެ.
ހެލްތު މިނިސްޓްރީން މައުލޫމާތު ދޭ ގޮތުގައި މި ހޮސްޕިޓަލްތަކަކީ ކޮވިޑް ފެތުރޭ ހާލަތެއްގައި ވެސް އޮޕަރޭޝަން ނުހުއްޓި ހިންގޭ ގޮތަށް އިމާރާތްކުރާ ހޮސްޕިޓަލްތަކެކެވެ.
އެގޮތުން މި ހޮސްޕިޓަލްތަކުގައި ފްލޫ ކްލިނިކާއި އައިސޮލޭޝަން ފެސިލިޓީތައް ހުންނާނެއެވެ.
ހޮސްޕިޓަލަށް ބޭނުންވާ ކަރަންޓު އުފެއްދުމަށް ކޮންމެ ހޮސްޕިޓަލެއްގައި ވެސް 150 ކިލޯ ވޯޓުގެ ސޯލާ ޕީވީ ސިސްޓަމް ހަރުކުރާނެއެވެ. އަދި، ހޮސްޕިޓަލްގެ އެނދުތަކަށް ޕައިޕްޑް އޮކްސިޖަނާއި، މެޑިކަލް އެއާ އަދި ސަކްޝަން ވެސް އަޅައިފައި ހުންނާނެއެވެ.
ހެލްތު މިނިސްޓަރު އަހްމަދު ނަސީމް -- ސަން ފޮޓޯ
މިއަދު އޮތް ހަފްލާގައި ވާހަކަދައްކަވަމުން ހެލްތު މިނިސްޓަރު އަހްމަދު ނަސީމް ވިދާޅުވީ ފާއިތުވި ދޮޅު އަހަރަކީ ކޮވިޑަށް ފަހު މި ސަރުކާރަށް ހަމަޖެހިލައިގެން މަސައްކަތްކުރަން ލިބުނު ދުވަސްތައް ކަމަށެވެ.
އެގޮތުން ސަރުކާރުން ސިއްހީ ދާއިރާގެ މަސައްކަތްތައް ކުރިއަށް ގެންދިޔައީ ވަރަށް ރޭވުންތެރިކަމާއެކު ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ އަތޮޅު ތެރޭގެ ރަށްރަށުގައި ސިއްހީ ފެންވަރު ރަނގަޅުކުރުމުގައި އިސްކަން ދެނީ ލާމަރުކަޒުކުރުމަށް ކަމަށެވެ. އަދި މާލެއަށް ބަރޯސާ މިންވަރު ނިމުމަށް ގެނައުމަކަށްކަމަށެވެ.
"ރާއްޖޭގެ ފަސް ސަރަހައްދެއްގައި ޓާޝަރީ ހަސްފަތާލު ގާއިމްކުރުމުގެ މުހިންމު މަސައްކަތުގައި ވެސް އެންމެ ބޮޑަށް ބަލައިފައިވަނީ ރައްޔިތުންނަށް މުހިންމު ސްޕެޝަލިސްޓު ޚިދުމަތްތައް އެ ތަންތަނުގައި ގާއިމްކޮށް މާލެއަށް ވީހާ ވެސް މަދުން އަންނަންޖެހޭ ކަހަލަ ގޮތެއް ވޭތޯ،" މިނިސްޓަރު ވިދާޅުވިއެވެ.
މީގެ އިތުރުން މި ފަދަ ޚިދުމަތްތައް ހޯދޭހެން ފަސޭހައިން އެ ތަންތަނަށް ދަތުރުފަތުރުކުރެވޭނެ ނިޒާމެއް ގާއިމްވެފައި އޮތުން މުހިންމު ކަމަށް ވެސް މިނިސްޓަރު ވިދާޅުވިއެވެ.
"ހަމައެހެންމެ މި ތަންތަނަަށް ފަސޭހައިން ދެވޭނޭ ގޮތަށް އެއާޕޯޓާއި ފެރީގެ ނިޒާމުތައް ވެސް މި ދަނީ ތަރުތީބުވެގެން. އެހެންވެގެން އަޅުގަނޑު މި ދަންނަވަނީ ސިއްހީ ދާއިރާގެ ކަންތައްތައް ހަމައެކަނި ސިއްހީ ދާއިރާއަކުން ނޫން ކުރެވޭނީ،" މިނިސްޓަރު ވިދާޅުވިއެވެ.
އެއާ އެކު މިނިސްޓަރު ނަސީމްވަނީ ރާއްޖޭގެ ސިއްހީ ދާއިރާގެ ތަރައްގީއަށް ރައީސް އިބްރާހީމް މުހައްމަދު ޞާލިހު ކޮށްދެއްވާ މަސައްކަތްޕުޅަށް ޝުކުރު ދަންނަވައިފައެވެ.