08 May 2023, 18:37
ދެ ހަފުތާގެ ސަސްޕެންޝަނަކާ ކުރިމަތިލަމުންދާ އާޖެންޓީނާ ތަރި ލިއޮނެލް މެސީ، ޕެރިސް ސެއިންޓް ޖާމައިން (ޕީއެސްޖީ) ގެ ތަމްރީނުތަކުގައި ބައިވެރިވާން ފަށައިފިއެވެ.
ކްލަބުގެ ހުއްދަ ނުހޯދައި ސައުދީ އަރަބިއާއަށް ދިއުމާ ގުޅިގެން ސަސްޕެންޑްކުރި މެސީއަށް ވަނީ ފްރާންސް ލީގުގައި އިއްޔެ ޕީއެސްޖީން 3-1 ގެ ނަތީޖާއަކުން ޓްރޯޔެސް ބަލިކުރި މެޗު ގެއްލިފައެވެ. އޭގެ އިތުރުން ސަސްޕެންޝަން އުވާނުލައިފި ނަމަ، އަންނަ ހޮނިހިރު ދުވަަހު އަޖެކްސިއޯއާ ދެކޮޅަށް ކުޅޭ މެޗު ވެސް އޭނާއަށް ގެއްލޭނެއެވެ.
ހަތް ފަހަރު ބެލޮންޑިއޯ ހޯދާފައިވާ އުމުރުން 35 އަހަރުގެ މެސީއަށް ޕީއެސްޖީގެ ކޭމްޕުގައި ބައިވެރިނުވެވުނު ނަމަވެސް، އޭނާ ވަނީ ސްކޮޑާ ވަކިން ތަމްރީނުތައް ފަށައިފައެވެ.
ޕީއެސްޖީން އަދިވެސް މެސީގެ ސަސްޕެންޝަނާ ގުޅޭގޮތުން ރަސްމީކޮށް ވާހަކަދައްކައިފައެއް ނުވެއެވެ. އެ މައްސަލައާ ގުޅިގެން ވީޑިއޯ މެސެޖެއް މެދުވެރިކޮށް މެސީ މައާފަށް އެދިފައިވުމުން އެ ކްލަބުން އޭނާއަށް ބާކީ ހަފުތާއަށް މައާފު ދޭނެ ކަމަށް ހަބަރުތައް ބުނެއެވެ.
ޕީއެސްޖީން އެންމެ އެދެވޭ ނަތީޖާތަކެއް ނެރެމުން ނުދާތީ، މެސީއަށް ވަނީ އެކަމުގެ ޕްރެޝަރާ ވެސް ކުރިމަތިލާން ޖެހިފައެވެ. އޭނާގެ އިތުރުން ބްރެޒިލް ތަރި ނޭމާއަށް އަމާޒުކޮށް ޕީއެސްޖީގެ ބައެއް ސަޕޯޓަރުން ދަނީ ނުރުހުން ފާޅުކުރަމުންނެވެ.
މިސީޒަން ނިމުމާއެކު ޕީއެސްޖީއާއެކު މެސީ ހަދާފައިވާ ކޮންޓްރެކްޓް ނިމުމަކަށް އަންނަ އިރު، ކޮންޓްރެކްޓް އާ ނުކުރުމަށް އޭނާ ނިންމާފައިވާ ކަމަށް އިތުބާރު ހުރި ނޫސްތަކުންނާއި މަޝްހޫރު ކުޅިވަރު ނޫސްވެރިޔާ ފަބްރީޒިއޯ ރޮމާނޯ ވެސް ވަނީ ދާދިފަހުން ރިޕޯޓުކޮށްފައެވެ.
މެސީ ގެންދިއުމަށް ސައުދީ އަރަބިއާގެ ކްލަބަކުން އޭނާއަށް އަހަރަކު 400 މިލިއަން ޑޮލަރު ލިބޭ ހުށަހެޅުމެއް ހުށަހަޅާފައިވާ އިރު, މެސީގެ ކުރީގެ ކްލަބު ބާސެލޯނާ އާއި އިނގިރޭސި ފުޓުބޯޅަ ލެޖެންޑް ޑޭވިޑް ބެކަމްގެ އިންޓަ މަޔާމީ އިންވެސް ވަނީ މެސީ ގެންދިއުމަށް ޝައުގުވެރިކަން ފާޅުކޮށްފައެވެ.