ރައީސުލް ޖުމްހޫރިއްޔާ ޑރ. މުހައްމަދު ވަހީދު ހަސަން މަނިކުގެ ނާއިބު ރައީސް ކަމަށް އައްޔަން ކުރެއްވުމަށް ނިންމަވާފައިވާ، ހ. ޑީންސް ވިލާ، މުހައްމަދު ވަހީދުއްދީނަށާއި ރައީސް ވަހީދުގެ ކެބިނެޓްގައި ހިމެނިވަޑައިގަންނަވާ 14 ވަޒީރުންނަށް ރައްޔިތުންގެ މަޖިލީހުން ރުހުން ދީފިއެވެ. ރައްޔިތުންގެ މަޖިލީހުގެ މިއަދުގެ ޖަލްސާގައި، ވަހީދުއްދީނަށް ރުހުން ދިނުމަށް ފާސްކޮށްފައިވަނީ އެވަގުތު ޖަލްސާގައި ތިއްބެވި، 46 މެންބަރުންގެ ތެރެއިން ވޯޓު ދެއްވި 45 މެންބަރުންގެ އިއްތިފާގުންނެވެ.

ކެބިނެޓްގައި ހިމެނިވަޑައިގަންނަވާ 14 ވަޒީރުންގެ ތެރެއިން 13 ވަޒީރަކަށް ރުހުން ދިނުމަށް ފާސްކޮށްފައިވަނީ ވެސް ޖަލްސާގައި ތިއްބެވި 46 މެންބަރުންގެ ތެރެއިން ވޯޓު ދެއްވި 45 މެމްބަރުންގެ އިއްތިފާގުންނެވެ. ނަމަވެސް ފޮރިން މިނިސްޓަރު ހ. ހުވަދޫ ޑރ. އަބުދުއްސަމަދު އަބުދުﷲ އަށް ރުހުން ދީފައިވަނީ ޖަލްސާގައި ތިއްބެވި 46 މެންބަރުންގެ ތެރެއިން 44 މެންބަރުން ވޯޓު ދެއްވައިގެންނެވެ. ވޯޓްގައި ބައިވެރިވެ ވަޑައި ނުގަންނަވަނީ މާފަންނު ހުޅަނގު ދާއިރާގެ މެންބަރު އަބްދުﷲ އަބްދުއް ރަހީމެވެ.

ކެބިނެޓްގައި ހިމެނި ވަޑައިގަންނަވާ 14 ވަޒީރުންނަކީ ފޮރިން މިނިސްޓަރު ޑރ. އަބުދުއްސަމަދު އަބުދުﷲގެ އިތުރުން ހޯމް މިނިސްޓަރު ޏ.ފުވައްމުލަކު ދޫޑިގަން އީސްޓްލައިޓް، ޑރ. މުހައްމަދު ޖަމީލު އަހްމަދާއި، ޑިފެންސް މިނިސްޓަރު މ.ސީނު ކަރަންކާގޭ މުހައްމަދު ނާޒިމާއި އެޓާނީ ޖެނެރަލް މ. އާސްތާނާ އަލްއުސްތާޒާ އާއިޝަތު އާޒިމާ ޝަކޫރާއި، ހެލްތު މިނިސްޓަރު ހ.ވެހެލި ޑރ.އަހްމަދު ޖަމްޝީދު މުހައްމަދާއި އެޑިއުކޭޝަން މިނިސްޓަރު ގ. ފަރުކަނި ޑރ.އާސިމް އަހްމަދާއި، އިކޮނޮމިކް ޑިވެލޮޕްމަންޓް މިނިސްޓަރު ގ. އުފާ އަހްމަދު މުހައްމަދާއި، ޓްރާންސްޕޯޓް އެންޑް ކޮމިއުނިކޭޝަން މިނިސްޓަރު ގދ. ދެއްވަދޫ މާވެޔޮ ދަށުގެ ޑރ.އަހްމަދު ޝަމްޙީދު އާއި ހިއުމަން ރިސޯސަސް، ޔޫތު އެންޑް ސްޕޯޓްސް މިނިސްޓަރު މ.ކޮތަންމާގެ މުހައްމަދު ހުސެއިން. އާދި މިނިސްޓާ އޮފް ޓޫރިޒަމް އާޓްސް އެންޑް ކަލްޗާ ހ.ސާމަރާ އަހްމަދު އަދީބު އަބުދުލްޣަފޫރުގެ އިތުރުން މިނިސްޓާ އޮފް އިސްލާމިކް އެފެއާޒް ގއ.މާނެމްދޫ ސައީދު މަންޒިލް އައްޝައިޙް މުހައްމަދު ޝަހީމް އަލީ ސައީދެވެ. މީގެ އިތުރުން މިނިސްޓާ އޮފް ހައުސިން އެންޑް އެންވަޔަރަންމަންޓް މ.ދިމްޔާތު ޑރ.މުހައްމަދު މުއިއްޒާއި މިނިސްޓާ އޮފް ފިނޭންސް އެންޑް ޓްރެޝަރީ މާލޭ މުނިސިޕަލްޓީގެ ދަފްތަރު އަބުދުﷲ ޖިހާދާއި މިނިސްޓާ އޮފް ފިޝަރީޒް އެންޑް އެގްރިކަލްޗާ ހއ.އިހަވަންދޫ ވައިޖެހޭގެ އަހްމަދު ޝަފީޢު އެވެ.

މިބޭފުޅުންނަށް ރުހުން ދެއްވި އިރު ރައްޔިތުންގެ މަޖިލީހުގެ އެމްޑީޕީގެ މެންބަރު ޝިފާގު މުފީދު ވޯޓުގައި ބައިވެރިވެ ވަޑައިގެންނެވި އެވެ.