03 May 2023, 08:53
ބާސެލޯނާ އިން ސްޕެނިޝް ލަލީގާ ކާމިޔާބުކުރުމާ ގާތަށް ޖެހިލި އިރު، ރެއާލް ސޮސިއެޑާޑް އަތުން ރެއާލް މެޑްރިޑް ބަލިވެއްޖެއެވެ.
ބާސާ އިން ވަނީ އަމިއްލަ ދަނޑުގައި އޮސަސޫނާއާ ދެކޮޅަށް ކުޅުނު މެޗުގައި 1-0 ގެ ނަތީޖާއަކުން މޮޅުވެފައެވެ. އަދި ރެއާލުން ރަށުން ބޭރުގައި ރޭ ކުޅުނު މެޗުގައި ސޮސިއެޑާޑް އަތުން ބަލިވީ 2-0 ގެ ނަތީޖާއަކުންނެވެ.
އެ ނަތީޖާތަކާއެކު ބާސާ އިން ވަނީ ލީގު ތާވަލުގެ އެއްވަނައިގައި 14 ޕޮއިންޓުގެ ލީޑެއް ހޯދައިފައެވެ. ލީގު ތާވަލުގެ އެއްވަނައިގައި އޮތް ބާސާއަށް 33 މެޗުން 82 ޕޮއިންޓް ލިބިފައިވާ އިރު، ދެވަނައިގައި އޮތް ރެއާލަށް 33 މެޗުން ލިބިފައިވަނީ 68 ޕޮއިންޓެވެ. މިހާރު ރެއާލަށް ވަނީ ދެވަނަ ގެއްލުމުގެ ބިރާ ވެސް ކުރިމަތިލާން ޖެހިފައެވެ. ރެއާލާއި ތިންވަނައިގައި އޮތް އެތުލެޓިކޯ މެޑްރިޑާ ދެމެދު ދެ ޕޮއިންޓުގެ ފަރަގެއް އޮތް އިރު، މިރޭ ކުޅޭ މެޗުގައި އެތުލެޓިކޯ އިން ކާޑިޒް ބަލިކޮށްފި ނަމަ، އެޓީމަށް ދެވަނައަށް ޖެހިލެވޭނެއެވެ.
ރެއާލް ބަލިކުރި ސޮސިއެޑާޑަށް ވެސް ލިބިފައިވަނީ މުހިންމު މޮޅެކެވެ. ރެއާލް އަތުން ހޯދި މޮޅާއެކު ސޮސިއެޑާޑުން ވަނީ ހަތަރުވަނައިގައި އަށް ޕޮއިންޓުގެ ލީޑެއް ހޯދައިފައެވެ. ސޮސިއެޑާޑަށް 33 މެޗުން 61 ޕޮއިންޓް ލިބިފައިވާ އިރު، ފަސްވަނައިގައި އޮތް ވިލަރެއާލަށް 32 މެޗުން ލިބިފައިވަނީ 53 ޕޮއިންޓެވެ.
އޮސަސޫނާއާ ދެކޮޅަށް ރޭ ކުޅުނު މެޗުގައި ބާސާ އިން މޮޅު ކުޅުމެއް ދައްކައި، ގޯލު ޖަހާނެ ގިނަ ފުރުސަތުތަކެއް ވެސް ތަނަވަސްކުރިއެވެ. ބާސާ އިން ވަރުގަދަ ކުޅުމެއް ދައްކަމުންދަނިކޮށް، އޮސަސޫނާއަށް އިތުރު އުނދަގުލަކާ ކުރިމަތިލާން ޖެހުނީ މެޗުގެ 26 ވަނަ މިނެޓުގައި ބާސާގެ ސްޕެއިން މިޑްފީލްޑަރު ޕެޑްރީއަށް ކުރި ފައުލަކާ ގުޅިގެން 22 އަހަރުގެ ޑިފެންޑަރު ޖޯޖް ހެރާންޑޯއަށް ރަތް ކާޑު ދެއްކުމުންނެވެ. އެ މެޗު ވެގެންދިޔައީ ލަލީގާގައި އޭނާ ފެނިގެންދިޔަ ފުރަތަމަ މެޗަށެވެ.
ފުރަތަމަ ހާފުގައި ބާސާގެ ޕެޑްރީ އާއި ބްރެޒިލް ފޯވަޑް ރަފީނިއާއަށް ގޯލު ޖަހަން ފުރުސަތުތަކެއް ލިބުނު ނަމަވެސް، އޮސަސޫނާގެ ގޯލާ އަމާޒުކޮށް ބޯޅައެއް ފޮނުވާލެވިފައެއް ނުވެއެވެ. މެޗުގެ ފުރަތަމަ ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ގޯލެއް ނުޖެހި އެއްވަރުވެގެންނެވެ.
ގިނަ ހަމަލާތަކަކަށްފަހު ބާސާ އިން ތިން ޕޮއިންޓް ކަށަވަރުކުރި ގޯލު ފެނިގެންދިޔައީ މެޗު ނިމެން ފަސް މިނެޓަށް ވެފައިވަނިކޮށެވެ. ފްރެންކީ ޑި ޔޮންގް ނަގައިދިން ހުރަހަކުން ބާސާއަށް އެ ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން ނުކުތް ސްޕެއިން ޑިފެންޑަރު ޖޯޑީ އަލްބާއެވެ.
ސްޕެނިޝް ލަލީގާގައި ސޮސިއެޑާޑާ ދެކޮޅަށް ކުޅުނު މެޗުގައި ރެއާލްގެ ކާވަހާލް އާއި މިލިޓާއޯ، ރެފްރީއަށް ޝަކުވާކުރަނީ -- ފޮޓޯ/ ގެޓީ
ރެއާލުން ސޮސިއެޑާޑާ ދެކޮޅަށް ކުޅުނު މެޗުގައި އެޓީމުގެ މުހިންމު ބައެއް ކުޅުންތެރިން ފެނިފައެއް ނުވެއެވެ. ރެއާލްގެ ކެޕްޓަން ކަރިމް ބެންޒެމާއަށް އަރާމުކުރަން ފުރުސަތު ދިން އިރު، ބްރެޒިލް ފޯވަޑް ވިނީޝިއަސް ޖޫނިއާ އާއި ފްރާންސް މިޑްފީލްޑަރު އެޑުއާޑޯ ކަމަވިންގާ ހުރީ ސަސްޕެންޝަންގައެވެ.
މެޗުގެ ކުރީކޮޅު ރެއާލްގެ ފަރާތުން ވަރުގަދަ ކުޅުމެއް ފެނިގެންދިޔައެވެ. އެގޮތުން ރެއާލްގެ ފްރާންސް މިޑްފީލްޑަރު އޯރެލިއެން ޗުއަމެނީ އާއި ބްރެޒިލް ޑިފެންޑަރު އެޑާ މިލިޓާއޯއަށް ލިބުނު ފުރުސަތެއް ފާހަގަކޮށްލެއެވެ. އެ ދެ ހަމަލާ ވެސް ސޮސިއެޑާޑްގެ ސްޕެއިން ކީޕަރު އެލެކްސް ރެމީރޯ ވަނީ މަތަކޮށްފައެވެ.
ސޮސިއެޑާޑުން ވެސް ފުރަތަމަ ހާފުގައި ރެއާލްގެ ގޯލަށް ނުރައްކާކުރުމަށް މަސައްކަތްކުރިއެވެ. އެގޮތުން މެޗުގެ 19 ވަނަ މިނެޓުގައި މެންޗެސްޓާ ސިޓީގެ ކުރީގެ މިޑްފީލްޑަރު ޑޭވިޑް ސިލްވާ ފޮނުވާލި ހަމަލާ ފާހަގަކޮށްލެވެއެވެ. ސިލްވާ ފޮނުވާލި އެ ހަމަލާގެ ހުރަހަކަށްވީ ރެއާލްގެ ބެލްޖިއަމް ކީޕަރު ތިބައު ކޯޓުއާއެވެ. މެޗުގެ ފުރަތަމަ ހާފު ނިމިގެންދިޔައީ ދެ ޓީމުންކުރެ އެއްވެސް ޓީމަކަށް ގޯލެއް ނުޖެހި އެއްވަރުވެގެންނެވެ.
މެޗުގެ ދެވަނަ ހާފު ފެށިތާ ދެ މިނެޓުގެ ތެރޭގައި ސޮސިއެޑާޑުން ވަނީ ގޯލެއް ޖަހައި ލީޑު ހޯދައިފައެވެ. މިލިޓާއޯއަށް ހެދުނު ގޯހެއްގެ ފައިދާ ނަގައި، ސޮސިއެޑާޑަށް އެ ގޯލު ކާމިޔާބުކޮށްދިނީ ކުރިން ރެއާލަށް ސޮއިކުރި ނަމަވެސް، އެޓީމަށް ކުޅުމުގެ ފުރުސަތެއް ނުލިބުނު ޖަޕާން ފޯވަޑް ޓަކެފޫސާ ކޫބޯއެވެ. މިލިޓާއޯ ދިން ބޯޅަ، ޕެނަލްޓީ އޭރިއާ ތެރެއިން ކޯޓުއާއަށް ލިބުމުގެ ކުރިން ކޫބޯ ވަނީ ފަސޭހަކަމާއެކު ރެއާލްގެ ގޯލުގެ ތެރެއަށް ފޮނުވާލައިފައެވެ.
ރެއާލަށް އިތުރު އުނދަގުލަކާ ކުރިމަތިލާން ޖެހުނީ އެޓީމުގެ ތަޖުރިބާކާރު ޑިފެންޑަރު ޑެނީ ކާވަހާލްއަށް ދެވަނަ ރީނދޫ ކާޑަކާއެކު ރަތް ކާޑެއް ދެއްކުމުންނެވެ. މެޗުގެ 61 ވަނަ މިނެޓުގައި ދެއްކި އެ ރަތް ކާޑާ ގުޅިގެން ރެއާލުން މެޗުގެ ބާކީބައި ފުރިހަމަކުރަން ޖެހުނީ އެއް ކުޅުންތެރިޔަކު މަދުކޮށެވެ.
މެޗުގައި ސޮސިއެޑާޑުން ޖެހި ދެވަނަ ގޯލު ފެނިގެންދިޔައީ މެޗު ނިމެން ފަސް މިނެޓަށް ވެފައިވަނިކޮށެވެ. ޑޭވިޑް ސިލްވާ ދިން ރީތި ބޯޅައަކުން ސޮސިއެޑާޑަށް އެ ގޯލު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް ސްޕެއިން ފޯވަޑް ބަރެނެޗޭއެވެ. ޕެނަލްޓީ އޭރިއާ ތެރެއިން އޭނާ، ރެއާލްގެ ގޯލުގެ ތެރެއަށް ބޯޅަ ފޮނުވާލީ ހަނި އޭންގަލަކުންނެވެ.
ރެއާލަށް ކުރިއަށް އޮތީ ވަރަށް މުހިންމު ދެ މެޗެވެ. އެއީ ކޮޕާ ޑެލްރޭގެ ފައިނަލް މެޗާއި ޔޫއެފާ ޗެމްޕިއަންސް ލީގުގެ ސެމީ ފައިނަލުގެ ފުރަތަމަ ލެގު މެޗެވެ. ކޮޕާ ޑެލްރޭގެ ފައިނަލުގައި އަންނަ ހޮނިހިރު ދުވަހު ރެއާލުން އޮސަސޫނާއާ ދެކޮޅަށް ނުކުންނަން ޖެހޭ އިރު، އަމިއްލަ ދަނޑުގައި ކުޅޭ ސެމީގެ ފުރަތަމަ ލެގު މެޗުގައި އަންނަ ހަފްތާގެ އަންގާރަ ދުވަހު ނުކުންނަން ޖެހޭނީ މެންޗެސްޓާ ސިޓީއާ ދެކޮޅަށެވެ.