03 May 2023, 08:56
ޕަރިނީތީއާއި ސިޔާސީ މައިދާނުން ފެންނަ ޒުވާން ޝަޚްސިއްޔަތު ރާގަވް ޗައްދާގެ ލޯބީގެ ގުޅުމުގެ ވާހަކަތަކާއެކު މިދުވަސްވަރު އިންޑިއާގެ މީޑިއާތަކުންދަނީ ޕަރިނީތީއަށް ފާރަލާން ފަށާފައެވެ. ބަތަލާ އެއަޕޯޓުން ފެނުނަސް ނުވަތަ އެހެން އިވެންޓަކުން ފެނުނަސް ކުރިމަތިވާ ސުވާލަކީ ޕަރިނީތީއާއި ރާގަވް ޗައްދާގެ ކައިވެންޏާ ގުޅުވައިގެންކުރާ ސުވާލުތަކެވެ.
މިހަފުތާތެރޭގައި ޕަރިނީތީވަނީ އިންޑިއާގެ މަޝްހޫރު ފެޝަން ޑިޒައިނަރު މަނީޝް މަލްހޯތްރާގެ ގެއަށް ދެ ފަހަރެއްގެ މަތިން ޒިޔާރަތްކޮށްފައެވެ. އާއްމުކޮށް ފިލްމީ ފަންނާނުން ޑިޒައިނަރު މަނިޝްއާ ބައްދަލުކުރާ ބައްދަލުކުރުންތަކަކީ އަމިއްލަ އިވެންޓެއްގައި ބޭނުންކުރާ ހެދުމާގުޅޭ މަޝްވަރާތައް ނުވަތަ އަމިއްލަ ކައިވެނީގައި ބޭނުންކުރާނެ ކައިވެނީގެ ހެދުންތަކާބެހޭގޮތުން ކުރެވޭ މަޝްވަރާތަކެކެވެ.
މަނިޝްގެ ގެއަށް ޕަރިނީތީ ޒިޔާރަތްކުރިއިރު ބޭރުގައި އެއްވެތިބި ނޫސްވެރިން ބަތަލާއަށް މަރުޙަބާކިޔުމުން ޖަވާބުގައި ޝުކުރިއްޔާއޭ ބުނިބުނުމަކީވެސް، ޕަރިނީތީއާއި ރާގަވްގެ ގުޅުން ކަށަވަރުވިކަމުގެ ސިގްނަލެއްކަމަށް މީޑިއާ ރިޕޯޓުތަކުންވަނީ ބުނެފައެވެ.
ފަހުގެ ރިޕޯޓުތަކުން ބުނެފައިވަނީ ޕަރިނީތީއާއި ރާގަވްގެ އެންގޭޖްމެންޓް ޙަފްލާ މިމަހުގެ 13ވަނަ ދުވަހު ބޭއްވުމަށް ނިންމާފައިވާކަމަށެވެ. ޕަރިނީތީއާއެކު ފިލްމު "ކޯޑް ނޭމް: ތިރަންގާ"ގައި މަސައްކަތްކުރި އެކްޓަރު ހާޑީ ސަންދޫ ދާދިފަހުން ބުނެފައިވަނީ ޕަރިނީތީހުރީ ޒަވާޖީ ޙަޔާތެއް ފެށުމަށްވާންޖެހޭ ހުރިހާ ތައްޔާރީއެއްވެފައިކަމަށެވެ.
އިންޑިއާގެ ޚަބަރުތައް ގެނެސްދޭ އިންޑިއަން އެކްސްޕްރެސް ނޫހާ ޙަވާލާދީ ބޮލީވުޑް ހަންގާމާއިން ބުނެފައިވަނީ މި އެންގޭޖްމެންޓް ހަފްލާ ބާއްވަނީ ނިއު ދިއްލީގައިކަމަށެވެ.
ޕަރިނީތީއާއި ރާގަވްގެ ގުޅުން ރަސްމީކޮށް ވަރަށް އަވަހަށް އިއުލާނުކުރާނެކަމަށާއި ދެ މީހުންގެ އެންގޭޖްމެންޓް ހަފްލާގައި ބައިވެރިވާނީ އާއިލާގެ މެމްބަރުން އެކަނިކަމަށްވެސް ބޮލީވުޑް ހަންގާމާގައި ބުނެފައިވެއެވެ.
ޕަރިނީތީއާއި ރާގަވްއަކީ އިނގިރޭސިވިލާތުގެ ލަންޑަންގައި ކިޔަވަން އުޅުނު ދުވަސްވަރުން ފެށިގެންވެސް ވަރަށް ގާތް ދެ ރަޙްމަތްތެރިންނެވެ. ދެ މީހުން އެކީގައި ފެންނަލެއް އާއްމުވެފައިވާއިރު ދެ ފަރާތުންވެސް މި ގުޅުމާބެހޭގޮތުން ކުރިމަތިކުރުވާ ސުވާލުތަކަށް ނޫނެކޭ ބުނެފައެއް ނުވެއެވެ.