29 Apr 2023, 21:07
މި އަހަރުގެ މިހާތަނަށް ވައްކަމާ ގުޅުންހުރި 1،072 މައްސަލައެއް ރިޕޯޓުކޮށްފައިވާ ކަމަށް ދިވެހި ފުލުހުންގެ ޚިދުމަތުގެ ތަފާސްހިސާބުތަކުން ހާމަވެއްޖެއެވެ.
އެންމެ ގިނައިން ވައްކަމުގެ މައްސަލަތައް ރިޕޯޓުކޮށްފައިވާއިރު، ދެވަނައަށް އެންމެ ގިނައިން ރިޕޯޓުކޮށްފައި ވަނި އެއްގަމާއި ކަނޑުމަތީގެ އެކްސިޑެންޓް ތަކުގެ މައްސަލައެވެ. އެފަދަ ޖުމްލަ 676 މައްސަލައެއް ރިޕޯޓުކޮށްފައިވެއެވެ.
ފުލުހުންގެ ތަފާސްހިސާބުތަކަށް ބަލާއިރު ތިންވަނައަށް އެންމެ ގިނައީ މަސްތުވާތަކެއްޗާ ގުޅުންހުރި މައްސަލަތަކެވެ. މަސްތުވާތަކެއްޗާ ގުޅުންހުރި 602 މައްސަލައެއް ވަނީ ރިޕޯޓުކޮށްފައެވެ.
މީގެއިތުރުން ތަކެތި ގެއްލިގެން 462 މައްސަލައެއް ރިޕޯޓުކޮށްފައިވާއިރު ފުރައްސާރައިގެ 174 މައްސަލައެއް ރިޕޯޓުކޮށްފައިވެއެވެ. މއަދި، ބަދުއަހުލާގީ އަމަލު ހިންގުމުގެ 79 މައްސަލައަކާއި ފޭރުމުގެ 97 މައްސަލަ ވެސް މިހާތަނަށް އައިއިރު ހުށަހަޅާފައިވެއެވެ.
މީގެ ތެރެއިން ބައެއް މައްސަލަތައް ބަލައި ނިމިފައިވާއިރު، އަނެއްބައި މައްސަލަތައް ފުލުހުން އަންނަނީ ތަހުގީގުކުރަމުންނެވެ. އަދި އެކިއެކި ސަބަބުތަކާ ހުރެ ކުރިއަށް ނުގޮސްހުރި މައްސަލަތައް ވެސް މީގެ ތެރޭގައި ހިމެނެއެވެ.