29 Apr 2023, 18:26
އަވަށްޓެެރި އިންޑިއާގެ ޑިފެންސް މިނިސްޓަރު ރާޖްނާތު ސިންހް ރާއްޖެ ވަޑައިގަންނަވަން ހަމަޖެހިފައިވާކަމަށް އިންޑިއާގެ ބައެއް ނޫސްތަކުން މިއަދު ރިޕޯޓުކޮށްފިއެވެ.
ރިޕޯޓުތަކުގައިވާ ގޮތުގައި ތިން ދުވަހުގެ ރަސްމީ ދަތުރުފުޅެއްގައި ރާޖްނާތު ރާއްޖެ ވަޑައިގަތުމަށް ހަމަޖެހިފައިވަނީ އަންނަ ހޯމަ ދުވަހެވެ. އޭނާގެ މި ދަތުރުފުޅުގެ ތެރެއިން ރައީސް އިބްރާހީމް މުހައްމަދު ޞާލިހާއި ޚާރިޖީ ވަޒީރު އަބްދުﷲ ޝާހިދާ ބައްދަލުކުރުމަށް ވަނީ ހަމަޖެހިފައެވެ.
މި ދަތުރުފުޅުގެ މައިގަނޑު ބޭނުމަކީ އަސްކަރީ ދާއިރާއިން ރާއްޖެއާއެކު އޮތް ގުޅުން އިތުރަށް ބަދަހިކުރުމަށް މަޝްވަރާކުރުން ކަމަށް ރިޕޯޓުތައް ބުނެއެވެ.
އިންޑިއާ ނޫސްތަކުގައި މިގޮތަށް ރިޕޯޓު ކުރި ނަމަވެސް މި ދަތުރުފުޅާ ގުޅޭ އެއްވެސް މައުލޫމާތެއް މިހާތަނަށް ރައީސް އޮފީހާއި ފޮރިން މިނިސްޓްރީ އާއި ޑިފެންސް މިނިސްޓްރީން ހާމައެއް ނުކުރެއެވެ.
އިންޑިއާގެ ޑިފެންސް މިނިސްޓަރު ރާއްޖެ ވަޑައިގަންނަވާ ދުވަހު އިންޑިއާގެ ޗީފް އޮފް އެއާ ސްޓާފް މާޝަލް ވީއާރް ޗޯދަރީ ސްރީލަންކާއަށް ވަޑައިގަންނަވާ ގޮތަށް ހަމަޖެހިފައިވާކަމަށް ވެސް ރިޕޯޓުތައް ބުނެއެވެ.