26 Apr 2023, 23:13
މޯލްޑިވްސް ރިޓަޔަމަންޓް ޕެންޝަން ސްކީމް ފަންޑު 19.6 ބިލިއަން ރުފިޔާއަށް އަރައިފިއެވެ.
ޕެންޝަން އޮފީހުން ނެރެފައިވާ 2022ވަނަ އަހަރުގެ އަހަރީ ރިޕޯޓުގައިވާ ތަފާސްހިސާބަށް ބަލާއިރު، މިދިޔަ އަހަރު ނިމުނުއިރު ޕެންޝަން ސްކީމްގެ ޖުމްލަ ފަންޑް އުޅެނީ 19.6 ބިލިއަން ރުފިޔާގައެވެ. ޕެންޝަން ފަންޑު ބިނާވެގެންވަނީ، ޕެންޝަން ފަންޑުގެ ބައިވެރިން ޖަމާކުރާ ފައިސާ އާއި ފަންޑުގައިވާ ފައިސާއިން އެކި ކަންކަމުން ކުރާ އިންވެސްޓްމަންޓްތަކުން ލިބޭ އެއްޗެއްގެ މައްޗަށެވެ.
ޕެންޝަން އޮފީހުން ނެރެފައިވާ މިދިޔަ އަހަރުގެ އަހަރީ ރިޕޯޓުގެ އުސްއަލިތަކަށް ބަލާއިރު، މިދިޔަ އަހަރުގެ ނިޔަލަށް ރިޓަޔަމަންޓް ޕެންޝަން ސްކީމަށް ފައިސާ ޖަމާކުރި މުއައްޒަފުންގެ އަދަދު 118،790 ގައި އުޅޭއިރު، ކުންފުނިތަކުގެ އަދަދު އުޅެނީ 3،212 ގައެވެ.
މިދިޔަ އަހަރުގެ ނިޔަލަށް ޕެންޝަން ފަންޑަށް ޕްރައިވެޓް ސެކްޓަރުން ޖަމާކުރި ފައިސާގެ އަދަދު 924 މިލިއަން ރުފިޔާގައި އުޅޭއިރު، ސަރުކާރަށް ނިސްބަތްވާ ކުންފުނިތަކުން ޖަމާކުރި ފައިސާގެ އަދަދު އުޅެނީ 568 މިލިއަން ރުފިޔާގައެވެ.
ޕެންޝަން ފަންޑުން ސަރުކާރުގެ ޓީބިލްސްގައި އިންވެސްޓް ކޮށްގެން އިންޓަރެސްޓްގެ ގޮތުގައި މިދިޔަ އަހަރު 426.7 މިލިއަން ރުފިޔާ ލިބުނުއިރު، ޓީބޮންޑުގައި ކުރި އިންވެސްޓްމަންޓުގެ އިންޓަރެސްޓްގެ ގޮތުގައި ވަނީ 174.5 މިލިއަން ރުފިޔާ ލިބިފައެވެ. މީގެ އިތުރުން، އެޗްޑީއެފްސީ ބޮންޑުން އިންޓަރެސްޓްގެ ގޮތުގައި 7.6 މިލިއަން ރުފިޔާ ލިބުނުއިރު ސުކޫކް އިންޓަރެސްޓްގެ ގޮތުގައި ވަނީ 21.3 މިލިއަން ރުފިޔާ ލިބިފައެވެ.
ސަރުކާރު ވަޒީފާތަކުގައި އުޅޭ މުވައްޒަފުން -- ސަން ފޮޓޯ/ މުހައްމަދު ހައްޔާން
މިދިޔަ އަހަރު އެކަނި ވެސް ވަޒީފާ އަދާކުރާ ފަރާތްތަކުންނާއި، ވަޒީފާ ދޭ ފަރާތުން ޕެންޝަންފަންޑަށް ވަނީ 1.5 ބިލިއަން ރުފިޔާ ޖަމާކޮށްފައެވެ. މިގޮތުން، މަހެއްގެ މައްޗަށް ޕެންޝަން ފަންޑަށް 123 މިލިއަން ރުފިޔާ ޖަމާކުރާކަމަށް ތަފާސްހިސާބުތަކުން ދައްކައެވެ. މިދިޔަ އަހަރު ފަންޑުގެ ބައިވެރިންނަށް ރިޓަޔަމަންޓް ޕެންޝަނުގެ ގޮތުގައި 128 މިލިއަން ރުފިޔާ ދީފައިވާއިރު، އަސާސީ ޕެންޝަނަރުންނަށް ވަނީ 1.16 ބިލިއަން ރުފިޔާ ދީފައެވެ.
ޕެންޝަން ފަންޑު މިދިޔަ އަހަރު ހިނގާދިޔަ ގޮތާ ގުޅޭގޮތުން މިދިޔަ އަހަރުގެ އަހަރީ ރިޕޯޓުގައި ޕެންޝަން އޮފީހުގެ ބޯޑުގެ ޗެއާޕާސަން ޑރ. އަހުމަދު އީނާޒް ވިދާޅުވެފައިވަނީ، 2019ވަނަ އަހަރު ކުރިމަތިވި ކޮވިޑު ބަލިމަޑުކަމާއި ކުރިމަތިވި ގޮންޖެހުންތަކަށް ފަހު، މިދިޔަ އަހަރު ފާހަގަކުރެވުނީ ޕެންޝަން ފަންޑަށް ކުރިއެރުން އައި އަހަރެއްގެ ގޮތުގައި ކަމަށެވެ.
މިގޮތުން ބޯޑުން މަސައްކަތް ކުރާނީ ޕެންޝަން ފަންޑުގެ ކަށަވަރުކަން ޔަގީންކޮށްދީ ފަންޑުގެ ބައިވެރިންނަށް ލިބެންޖެހޭ ނަފާ އެންމެ ފުރިހަމަ ގޮތުގައި ފޯރުކޮށްދިނުމަށް ކަމަށް އީނާޒު ވިދާޅުވިއެވެ.
ރިޓަޔަމަންޓް ޕެންޝަން ސްކީމް ފަންޑަކީ މިހާރު ރާއްޖޭގެ އެންމެ ބޮޑު ސޭވިން ފަންޑެވެ. މޯލްޑިވްސް ޕެންޝަން އެޑްމިނިސްޓްރޭޝަން އޮފީސް ވުޖޫދަށް އައިސްފައިވަނީ 2009ވަނަ އަހަރެވެ.