26 Apr 2023, 10:09
ޕާޓިކަލްސް ސްޓޫޑިއޯއިން ޕްރޮޑިއުސްކޮށްފައިވާ ވަނާޖުބޭސާގެ ޕްރިމިއާ ނައިޓަށް ރޭ ގިނަ ބަޔަކު އޮލިމްޕަހަށް ޖަމާވިއެވެ. އެކަމަކު، 9:00ގައި އަޅުވަން އޮތް އެ ފިލްމު ކުއްލިއަކަށް އެއްގަޑިއިރު ލަސްވި ވާހަކަ ވަނާޖުބޭސާ ޓީމުން އިއުލާނު ކުރިއެވެ.
ސިނަމާ ތެރޭގައި އެތައް އިންތިޒާރެއް ކުރި އިރު ވެސް ފިލްމު ނޭޅުވި ގިނަ ވަގުތުތަކެއް ދިޔައެވެ. ފިލްމު އެޅުވުނީ 10:30ވެ ވެސް ބޮޑުވި ފަހުންނެވެ. ދޮޅުގަޑިއިރަަށްވުރެ ގިނައިރު މީހުން އިންތިޒާރުކުރަން ޖެހުނެވެ.
ފިލްމު އެހާއިރު އެޅުވި ނަމަވެސް، ދިމާވި ޓެކްނިކަލް މައްސަލަތަކަކާހެދި 1:45 މިނެޓުގެ މި ފިލްމުން، ދެއްކުނީ ގާތްގަނޑަކަށް 30 މިނެޓެވެ.
ފިލްމު ނިންމުމަށްފަހު، މީޑީއާތަކަށް ދިން އިންޓަވިއުގައި ވަނާޖުބޭސާ ޕްރޮޑަކްޝަން ޓީމުން ނާޒިރު ޝިހާމް (ކާއްޓޭ) ބުނީ ރޭ ދިމާވި ކަންތަކަށް ބެލުންތެރިންގެ ފަރާތުން ނިހާޔަތަށް މައާފަށް އެދޭ ކަމަށެވެ.
"އަޅުގަނޑުމެންނަށް އޮލިމްޕަސް އާ، މި މަސައްކަތް ވެސް އާ، އަޅުގަނޑުމެން އަޅުވަން އުޅުނު ގޮތް އޮލިމްޕަހަށް ވެސް އާ،" ކާއްޓޭ ބުންޏެވެ.
ކާއްޓޭ ބުނީ އޮލިމްޕަހުގައި ފިލްމު އަޅުވާނީ ނެޓްފްލިކްސް ފެންވަރުގައި ކަމަށާއި ދުނިޔޭގެ ފެންވަރުގެ ސިނަމާތަކުގައި ވެސް އަޅުވާ ފެންވަރުގައި ކަމަށެވެ. އެއީ ސައުންޑު 7.1 ގައި އެޅުވުން ކަމަށް އޭނާ ބުންޏެވެ.
"ސެވަން ޕޮއިންޓް ވަން އަކީ މިތާ ވަށައިގެން ހުރި ސްޕީކަރުތަކުން ސައުންޑް ދަތުރުކުރާ ގޮތަށް. ރާއްޖޭގައި އެ މިއުޒިކު ހަދާ ވެސް އުޅެނީ އެންމެ މީހަކު. އެ ފޯމެޓު ރާއްޖޭގެ އެހެން އެއްވެސް ފިލްމެއްގައި ޓްރައި ވެސް ކޮށްފައެއް ނެތް،" ކާއްޓޭ ބުންޏެވެ.
ކާއްޓޭ ބުނީ އެ ޗެލެންޖު ނަގައި އެ ކޮލިޓީގައި ފިލްމު ދައްކަން ބޭނުންވި ކަމަށެވެ. އެކަމަކު، އަޅުވާ ދުވަހާ ނުހަނު ގާތްވެފައި އޮއްވާ އެ ރިސްކު ނެގުމުން ބެލުންތެރިންގެ ކިބައިން އޭނާ ވަނީ މައާފަށް އެދިފައެވެ.
"ވަނާޖުބޭސާ ފުލްކޮށް މިރޭ ނުދެއްކުނަސް، ސެވަން ޕޮއިންޓް ވަން އަޅުގަނޑުމެން އޮލިޕްޕަހުގައި މިރޭ ލޯންޗުކޮށްފިން،" ކާއްޓޭ ބުންޏެވެ.
މި ފިލްމު ޕްރިމިއާ ނައިޓުގައި އެޅުވުން ލަސްވުމަކީ އޭނާ ދެކޭ ގޮތުގައި ފްލޮޕެއް ނޫނެވެ. ފެއިލްވުމެއް ވެސް ނޫނެވެ. އެފަދަ ބޮޑު މަސައްކަތެއް ކުރާއިރު ގޮންޖެހުންތަކާ ކުރިމަތި ނުވާނަމަ، ފިލާވަޅެއް ނުލިބޭނޭކަމަށް ވެސް ބުންޏެވެ.
"މިރޭ އަޅުގަނޑުމެންނަށް ފިލާވަޅެއް ލިބިއްޖެ ގާތްގަނޑަކަށް 100 ފޮތުން އެއްފަހަރާ،" ކާއްޓޭ ބުންޏެވެ.
ރޭގެ ޝޯވ އެޅުވުން ލަސްވުމުންނާއި ފިލްމު އެއްކޮށް ނުދެއްކުމުން، ވަނާޖުބޭސާ ޓީމުން ވަނީ ރޭ ޓިކެޓް ނަގައިގެން ދިޔަ އެންމެންނަށް މިރޭ ހިލޭ ޝޯވއެއް ދޭން ނިންމައިފައެވެ. މިރޭ ވަނާޖުބޭސާގެ ދެ ޝޯވ އޮލިމްޕަހުގައި އޮންނައިރު، ރޭގައި ނުދެއްކުނު ޝޯވ ފެށޭނީ 7:45 ގައެވެ.
"ރިފަންޑު ބޭނުންވާ ބޭފުޅުންނަށް އަޅުގަނޑުމެން ރިފަންޑު ވެސް ދޭނަން،" ކާއްޓޭ ބުންޏެވެ.
ވަނާޖުބޭސާއަކީ ރާއްޖޭގެ މިހާރު އެންމެ މަގުބޫލު ދެ ކޮމީޑިއަނުންކަމަށްވާ، ކާއްޓޭއާއި ހުސައިން ޝާދު (މަޓޭ) ލީޑު ރޯލުތަކުން ފެންނާނެ ފިލްމެކެވެ. އަދި ދިވެހި ފިލްމު ހާދަރު އިން މަޝްހޫރުވި މުހައްމަދު ސައީދު (ނިޔައްޓޭ) ވެސް ފެންނާނެއެވެ.
ފ. ނިލަންދޫ އާއި ފީއަލީގައި މި ފިލްމު ނަގައިފައިވާއިރު ދެން ފިލްމުގެ ލީޑް ރޯލްތަކުންނާއި ސައިޑް ރޯލްތަކުން ފެންނާނީ ހުސް ވެސް އެ ދެ ރަށުގެ މީހުންނެވެ.
ވިޝާލް ޒަކީ (ވިއްޓެ) ޕްރޮޑިއުސްކޮށް، ޑައިރެކްޓްކޮށްފައިވާ މި ފިލްމަކީ އޭނާ ލިޔެފައިވާ ވާހަކައެއް ވެސް މެއެެވެ. ކްރިއޮގްރަފަރަކީ ވެސް، އެޑިޓަރަކީ ވެސް ލައިޓިން އެންޑް ސައުންޑްގެ މަސައްކަތް ވެސް ކުރީ ވިއްޓެއެވެ.
ކާއްޓޭއާއި މަޓޭގެ ފިލްމަކަށް ވާތީ އޮލިމްޕަހަށް ގިނަ ބަޔަކު ޖަމާވީ ފޮނި އުންމީދުތަކަކާއެކުއެވެ. އެހާ ލަސްވިޔަސް، އިންތިޒާރުގައި ތިބީ އެ މީހުންގެ ފިލްމެއް ސަޅިވާނެކަމުގެ ޔަގީންކަން އޮންނާތީ ކަމަށް ވެދާނެއެވެ.
އެއްކޮށް ނުދެއްކުނަސް، ފުރަތަމަ މަންޒަރުތަކުގައި ވެސް މުޅި އޮލިމްޕަސް ގުގުމާލީ ހުނުމުގެ އަޑުންނެވެ. ފިލްމު ބަލައި ނިމިގެން އެންމެން ވެސް ނުކުތީ ހިތްހަމަޖެހުމާއެކުގައެވެ. ދެން އޮތް ބަޔަށް މާ ބޮޑަށް އިންތިޒާރު ކުރަމުންނެވެ.
"އަޅުގަނޑުމެން ބެލުންތެރިންނަށް ދަންނަވަން އޮތީ އަދި ފުރަތަމަ ހާފޭ ތި ބެލުނީ. ދެވަނަ ހާފު އަދި އޮތިއްޔޭ. އިރާދަކުރެއްވިއްޔާ ދެވަނަ ހާފު ބަލާފަ ހުރިހާ ބޭފުޅުން ވެސް މި ވީ ޑިލޭ، އެއީ ޑިލޭއެއް ކަމަކަށް ބަލައެއް ނުގަންނާނޭ،" ކާއްޓޭ ބުންޏެވެ.
ވަނާޖުބޭސާ މި ގޮތަށް ލަސްވުމުން، ބައެއް ބެލުންތެރިންގެ ހިތްހަމަނުޖެހުންތަކެއް ވެސް ހުއްޓެވެ. އެކަމަކު، އެއަށްވުރެ ބޮޑަށް ފިލްމުގެ ފުރަތަމަ 30 މިނެޓު ބަލައިފައި ވެސް އެންމެން ދެއްކީ ފިލްމުގެ ތަފާތު ވާހަކައެެވެ.
ލަސްވިޔަސް، ވަނާޖުބޭސާއިން އޮލިމްޕަސް ހެއްވާލާނެކަން މިހާރު ޔަގީނެވެ.