21 Apr 2023, 15:31
ސިޔާސީ ނުފޫޒުތަކާއި، ނުހައްގު އަނިޔާތަކާ ދެކޮޅަށް ސާބިތުވެ ތިއްބެވުމަށް އިލްތިމާސް ކުރައްވައި ދިވެހި ރައްޔިތުންނަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ފިތުރު އީދުގެ ތަހުނިޔާ ފޮނުއްވައިފިއެވެ.
ޖަލު ބަންދުގައި ހުންނެވި ރައީސް ޔާމީން އީދު ތަހުނިޔާ ފޮނުއްވީ އެމަނިކުފާނުގެ ދޮށީ ދަރިކަލުން ޒޭން އަބްދުﷲ ޔާމީން މެދުވެރިކޮށެވެ.
އެމަނިކުފާން ދެއްވި އީދު މެސެޖުގައި ވިދާޅުވީ ދިވެހި ގައުމުގެ ހައްގުގައި، ދިވެހި އެންމެހައި ލޮބުވެތި ރައްޔިތުން، ނަހަމަ ސިޔާސީ ނުފޫޒުތަކާއި، ނުހައްގު އަނިޔާތަކާ ދެކޮޅަށް ސާބިތުވެ ތިއްބެވުމަށް އެދިލައްވާ ކަމަށެވެ.
އެއަށް ފަހު ވަނީ އެ މަނިކުފާނާއި އާއިލާގެ ނަންފުޅުގައި ފިތުރު އީދުގެ ހެޔޮ އެދުމާއި ތަހުނިޔާ ދިވެހި ރައްޔިތުންނަށް އަރިސްކުރައްވާފައެވެ.
އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދިނުމުގައި ރިޝްވަތުގެ ގޮތުގައި ފައިސާ ނަގާ ފައިސާ ލޯންޑަކުރި ކަމަށް ކުރި ދައުވާ ސާބިތުވެ ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒް ކުރައްވަމުންނެވެ.
މި އަހަރު ބާއްވާ ރިޔާސީ އިންތިޚާބުގައި އިދިކޮޅު ކޯލިޝަންގެ ފަރާތުން ވާދަކުރައްވަން ރިޔާސީ ޓިކެޓު ވަނީ އެ މަނިކުފާނަށް އަރުވާފައެވެ. ޖަލުގައި ހުންނެވި ނަމަވެސް އެ މަނިކުފާނު މިނިވަންވެ ވަޑައިގެން އިންތިޚާބުގައި ވާދަކުރައްވާނެ ކަމަށް އިދިކޮޅު ކޯލިޝަނުން އަންނަނީ ބުނަމުންނެވެ.
ރައީސް ޔާމީންގެ ފަރާތްޕުޅުން އެ މައްސަލަ މިހާރު ވަނީ ހައިކޯޓުގައި އިސްތިއުނާފް ކޮށްފައެވެ.