20 Apr 2023, 09:51
އަރަމުން އަންނަ ޒުވާން އެކްޓަރު އާޔުޝްގެ ކުރިޔަށްއޮތް އެކްޝަން ފިލްމުގެ ނަމަކީ "ރުސްލާން" ކަމަށް އިޢުލާނުކޮށް ފިލްމުގެ ފުރަތަމަ ޕޯސްޓަރު ޢާއްމުކޮށްފިއެވެ.
މަސްހުނި އެކްޝަން ފިލްމު "ރުސްލާން"އަކީ ކޭކޭ ރާދާ މޯހަން ޕްރޮޑިއުސްކޮށް ސްރީސަތްޔަސައި ނަމަކަށްކިޔާ ފިލްމު ކުންފުންޏަކުން ގެނެސްދޭ ފިލްމެކެވެ. އާޔޫޝް ލީޑް ރޯލްއިން ފެންނަ މި ފިލްމުގައި ބަތަލާގެ ރޯލް ކުޅެނީ 2015ވަނަ އަހަރުގެ ފެމިނާ މިސް އިންޑިއާ މުބާރާތުން ވިދާލި މޮޑެލް ސުޝްރީ މިޝްރާއެވެ. މި ފިލްމަކީ، ސުޝްރީ ބޮލީވުޑަށް ތައާރަފްވާ ފިލްމުވެސްމެއެވެ.
މީގެ އިތުރުން ފިލްމުން ފެންނާނެ އިތުރު ތަރިންގެތެރޭގައި ތެލުގޫ އެކްޓަރު ޖަގަޕަތީ ބާބޫއާއި ފިލްމު "ޗަކް ދެ އިންޑިއާ"ގެ ބަތަލާ ވިދްޔާ މަލްވަދޭވެސް ހިމެނެއެވެ. ފިލްމު "ރުސްލާން" އަދިވަނީ ޕޯސްޓްޕޮރޮޑަކްޝަން މަރުޙަލާގައެވެ. ފިލްމު ރިލީޒްކުރާނެ ވަކި ތާރީޚެއް އިއުލާނުކޮށްފައިނުވާއިރު މި އަހަރުތެރޭ ފިލްމު ރިލީޒްކުރުމަށް މަސައްކަތްކުރަމުން އަންނަކަމަށް ޕްރޮޑަކްޝަން ކުންފުނިން ވަނީ ބުނެފައެވެ.
އާޔުޝްގެ ފިލްމެއް ބެލުންތެރިންނަށް އެންމެފަހުން ފެނިފައިވަނީ 2021ވަނަ އަހަރުއެވެ. އެއީ އެކްޓަރު ސަލްމާން ޚާންއާއެކު ބޮޑު ކުރިމަތިލުމެއް ދައްކުވައިދިން ފިލްމު "އަންތިމް"އެވެ. ސަލްމާން ޚާންގެ ފިލްމު ކުންފުނިން ކުރިޔަށްއޮތް ޢީދު ދުވަހާ ދިމާކޮށް ރިލީޒްކުރާ ފިލްމު "ކިސީކާ ބާއި ކިސީކީ ޖާން"ގެ ރޯލެއް ވެސް އާޔުޝްއަށް ލިބުނެވެ. ނަމަވެސް ފިލްމުގައި ކުޅެން ލިބުނު ރޯލް ކުޑަކަމާއެކު އާޔުޝް ވަނީ ލިބުނު ފުރުސަތު ދޫކޮށްލާފައެވެ.
ފިލްމު "ލަވްޔާތްރީ"އިން 2018ވަނަ އަހަރު ފިލްމީ ދާއިރާއަށް ނުކުތް އާޔުޝް އަންނަނީ "ކްވާތާ" ނަމަކަށްކިޔާ ފިލްމެއްގައިވެސް މަސައްކަތް ކުރަމުންނެވެ. މި ފިލްމުގެ މަސައްކަތް ކުރިޔަށްދާއިރު ފިލްމު ރިލީޒްކުރާނެ ވަކި ތާރީޚެއް ކަށަވަރުނުވެއެވެ.