17 Apr 2023, 15:14
އަބޫދަބީ (17 އެޕްރީލް 2023): އެމެރިކާ ޑޮލަރުން ކުރާ މުއާމަލާތްތައް ހުއްޓާލުމަށް ބްރަޒީލްގެ ރައީސް ލުއިސް އިނާސިޔޯ ލޫލާ ދަ ސިލްވާ ބްރިކްސްގެ ގައުމުތަކަށް ގޮވާލައްވައިފިއެވެ.
ޗައިނާއަށް ކުރެއްވި ދަތުރުފުޅެއް ނިންމާލެއްވުމަށްފަހު ޔުނައިޓެޑް އަރަބް އިމަރޭޓްސްގެ ވެރިރަށް އަބޫ ދަބީއަށް ވަޑައިގެން ދެއްވި ބަޔާނެއްގައި ދަ ސިލްވާ ވިދާޅުވީ އެމެރިކާ ޑޮލަރާ ނުލައި އަދި އެމެރިކާގެ މާލީ ނިޒާމު ކަމަށްވާ "ސްވިފްޓް" އާ މެދުވެރިނުކޮށްވެސް ބްރިކްސްގެ ގައުމުތަކަށް މިހާރު ވިޔަފާރީގެ މުއާމަލާތްތައް ހިންގޭނެ ކަމުގައެވެ.
ދަ ސިލްވާ ބްރިކްސްގެ ގައުމުތަކަށް ގޮވާލެއްވީ "ބްރިކްސް"ގެ މެދުގައި ކުރާ ވިޔަފާރީގެ މުއާމަލާތައް އެޖަމާއަތުގެ ގައުމުތަކުގެ އަމިއްލަ ފައިސާ ބޭނުންކޮށްގެން ކުރުމަށެވެ. އެކަންކުރެވޭނެ މާލީނިޒާމުތައް ބްރިކްސްގެ ގައުމުތަކުގައި މިހާރު ގާއިމްކޮށްފައިވާކަން އޭނާ ފާހަގަކުރެއްވިއެވެ.
ބްރަޒިލްގެ ރައީސް ޔޫއޭއީގައި
ބްރިކްސްގައި ހިމެނެނީ ފަސް ގައުމެކެވެ. އެއީ ޗައިނާ، ރަޝިއާ، އިންޑިއާ، ދެކުނު އެފްރިކާ އަދި ބްރަޒީލް އެވެ. މި ހަތަރު ގައުމުގައި ދުނިޔޭގެ އާބާދީގެ ގާތްގަނޑަކަށް 42 އިންސައްތަ މީހުން ހިމެނޭއިރު ދުނިޔޭގެ އާމްދަނީއާއި އުފެއްދުންތެރިކަމުގެ 23 އިންސައްތަ ހިއްސާ ކުރަނީ މިފަސް ގައުމުންނެވެ.
ދުނިޔޭގައި އިގްތިސާދީގޮތުން އެންމެ ބާރަށް ކުރިޔަށްދާ ގައުމުތަކުގެ ލިސްޓުގެ ކުރީގައި އުޅެނީވެސް މި ފަސް ގައުމެވެ. ބްރިކްސްގެ ގައުމުތަކުގެ ލީޑަރުންވަނީ އެގައުމުތަކަށް ޚާއްސަ ފައިސާއަކާއި އެގައުމުތަކަށް ޚާއްސަ މާލީ ނިޒާމެއް އުފައްދަން ނިންމާފައެވެ.
ނަމަވެސް މިކަމަށް އަދި ވަގުތު ނަގާނެތީ ދަ ސިލްވާ ގޮވާލެއްވީ ބްރިކްސްގެ ގައުމުތަކުގެ މެދުގައި ހިނގާ ވިޔަފާރީގެ މުއާމަލާތްތަކުގައި އެމެރިކާ ޑޮލަރު ބޭނުންކުރުމުގެ ބަދަލުގައި ކަރަންސީ ސްވެޕް ހަދައިގެން އެގައުމުތަކުގެ ފައިސާ ބޭނުންކުރުމަށެވެ.
ދަ ސިލްވާ މިހެން ގޮވާލެއްވުމުގެ ކުރިންވެސް ބްރިކްސްގެ ގައުމުތަކުންވަނީ އެގައުމުތަކުގެ މެދުގައި ހިނގާ ވިޔަފާރީގެ މުއާމަލާތްތަކުގައި ޑޮލަރުގެ އިތުރުން އެގައުމުތަކުގެ ފައިސާވެސް ބޭނުންކުރަން ފަށާފައެވެ. އެންމެ ގިނައިން އަމިއްލަ ފައިސާގައި ވިޔަފާރިކުރާ ބްރިކްސްގެ ގައުމުތަކުގެ ތެރޭގައި ހިމެނެނީ ރަޝިއާ، ޗައިނާ އަދި އިންޑިއާއެވެ.
ބްރަޒިލްގެ ރައީސް ޔޫއޭއީގައި
ޔުކްރެއިން ހަނގުރާމައާ ގުޅިގެން އެމެރިކާއާއި ޔޫރަޕުން ރަޝިއާއާ ދެކޮޅަށް ދަތިކުރުމުގެ ހަރުކަށި ފިޔަވަޅުތަކެއް އެޅުމުން ރަޝިއާވަނީ ޑޮލަރުން ކުރާ މުއާމަލާތްތައް ކުޑަކޮށް އެގައުމުގެ ފައިސާއާއި ޗައިނާގެ ފައިސާއާ އަދި އިންޑިއާގެ ފައިސާ ބޭނުންކޮށްގެން ވިޔަފާރީގެ މުއާމަލާތްތައް ވަރަށް ބޮޑަށް ފުޅާކޮށްފައެވެ. މިކަމުގެ ސަބަބުން އެމެރިކާއާއި ޔޫރަޕުން ރަޝިއާއާ ދެކޮޅަށް އަޅާފައިވާ ފިޔަވަޅުތަކުގެ ނޭދެވޭ އަސަރު އެމެރިކާ އުންމީދުކުރިވަރާ ގާތަށްވެސް ރަޝިއާއަކަށް ނުކުރެއެވެ.
ރަޝިއާ މިހާރުވަނީ އީރާނާއެކު ކުރާ މުއާމަލާތްތަކުގައިވެސް ޑޮލަރުގެ ބަދަލުގައި އެދެގައުމުގެ ފައިސާ ބޭނުންކުރަން ފަށާފައެވެ. މިއާއެކު މިދިޔަ އަހަރުގައި ޑޮލަރުން ކުރި ވިޔަފާރީގެ މުއާމަލާތްތައް އޭގެކުރީ އަހަރާ އަޅާބަލާއިރު 10 އިންސައްތަ ދަށަށް ގޮސްފައިވާކަމަށް ބައިނަލްއަގްވާމީ މާލީ އިންސްޓިޓިއުޓްތަކާއި ރިސާޗް މަރުކަޒުތަކުން ބުނެއެވެ.
މިއަހަރު ޑޮލަރާނުލައި ހިނގާނެކަމަށް ބެލެވޭ ވިޔަފާރީގެ މިންވަރު މިދިޔަ އަހަރަށްވުރެ ދެގުނަ އިތުރުވާނެކަމަށްވަނީ ބެލެވިފައެވެ. އެއީ ސައޫދީ އާއި ޔޫއޭއީ، ޗައިނާ އަދި ރަޝިއާ މިގައުމުތަކުގެ މެދުގައި ކުރާ މުއާމަލާތްތަކުގައި އެހަތަރު ގައުމުގެ ފައިސާ ބޭނުންކުރަން ފަށާފައިވާތީއެވެ.
ދަ ސިލްވާ ޔޫއޭއީ އަށް ވަޑައިގަތުމުން އެގައުމުގެ ރައީސް ޝައިޚް މުހައްމަދު ބިންޒާޔިދު އަލް ނިހްޔާން އޭނާއަށް ދެންނެވީ ވަރަށް ހޫނު މަރުހަބާ އެކެވެ.