16 Apr 2023, 23:27
އިނގިރޭސި ޕްރިމިއާ ލީގުގައި ވެސްޓް ހަމް އަތުން މޮޅުނުވެވި، ލީގު ތާވަލުގެ އެއްވަނައިގައި އޮތް އާސެނަލަށް ބޮޑު ހާސްކަމެއް ކުރިމަތިވެއްޖެއެވެ.
ވެސްޓް ހަމްގެ ދަނޑުގައި އާސެނަލް ކުޅުނު މެޗު ނިމުނީ 2-2 ގެ ނަތީޖާއަކުން އެއްވަރުވެގެންނެވެ.
އެ މެޗުގައި ފުރަތަމަ ގޯލުޖަހައި ލީޑު ނެގީ އާސެނަލްއިންނެވެ. އެގޮތުން މެޗުގެ ހަތްވަނަ މިނެޓުގައި އާސެނަލްގެ ބެން ވައިޓް ނެގި ހުރަހަކުން ގަބްރިއާލް ޖީސުސް ވަނީ ގޯލެއް ޖަހައިފައެވެ.
އޭގެ ތިން މިނެޓު ފަހުން އަނެއްކާ ވެސް އާސެނަލްއިން ވަނީ ގޯލެއް ޖަހައި މެޗުގެ ލީޑު އިތުރަށް ފުޅާކޮށްފައެވެ. އެ ގޯލަކީ ގަބްރިއެލް މާޓީނެލީ ނެގި ހުރަހަކުން އާސެނަލްގެ ކެޕްޓަން، މާޓިން އޮޑެގާޑް ކާމިޔާބުކުރި ގޯލެކެވެ.
ނަމަވެސް ފުރަތަމަ ހާފު ނިމުމުގެ ކުރިން ވެސްޓް ހަމްއިން ވަނީ ގޯލެއް ޖަހައިފައެވެ. ވެސްޓް ހޭމްގެ ލޫކަސް ޕަކޭޓާއަށް އާސެނަލްގެ އޭރިއާ ތެރެއިން އެ ޓީމުގެ ކުޅުންތެރިއަކު ކުރި ފައުލަކަށް ދިން ޕެނަލްޓީއަކުން އެ ގޯލު ޖެހީ ވެސްޓްހަމްގެ ފޯވާޑް ސައީދު ބެންރާމާއެވެ.
ފުރަތަމަ ހާފު މޮޅަށް ކުޅި ނިންމާލި ވެސްޓް ހަމްއިން ވަނީ ދެވަނަ ހާފު ވެސް އެގޮތަށް ފަށާ، މެޗުގެ ނަތީޖާ ހަމަހަމަކޮށްފައެވެ. މެޗުގެ 54 ވަނަ މިނެޓުގައި ވެސްޓް ހަމްއަށް އެ ގޯލު ޖަހައިދިނީ ޖެރޮޑް ބޮވެންއެވެ.
ޖެހިޖެހިގެން ދެ ހަފްތާގައި އާސެނަލް އަތުން ހަތަރު ޕޮއިންޓް ގެއްލިފައިވާއިރު އާސެނަލް ތާވަލުގެ އެއްވަނައިގައި އޮތީ ކުޅުނު 31 މެޗުން 74 ޕޮއިންޓު ހޯދައިގެންނެވެ. ތާވަލުގެ ދެވަނައިގައި އޮތް ސިޓީ އާސެނަލްއަށް ވުރެ އެއް މެޗު މަދުން ކުޅެ ވަނީ 70 ޕޮއިންޓު ހޯދައިފައެވެ.