12 Apr 2023, 21:52
މި އަހަރުގެ ރޯދަ މަހުގެ ފުރަތަމަ ފަނަރައިގެ ތެރޭ 173 އެކްސިޑެންޓެއް ހިނގައިގެން ރިޕޯޓުކޮށްފައިވާކަމަށް ފުލުހުން ބުނެފިއެވެ.
ރޯދަ މަހު ފުލުހަށް ހުށަހަޅައިފައިވާ އެކި ކުށްތަކުގެ ރިޕޯޓާ ގުޅޭ މައުލޫމާތު "ސަން"އާ ހިއްސާކޮށްފައިވާއިރު އޭގައި ވަނީ ވަކިވަކި ކުށްތައް ފުލުހުންނަށް ރިޕޯޓުކުރި އަދަދުތައް ހިމަނައިފައެވެ.
އޭގައިވާ ގޮތުން އެންމެ ގިނައިން އެކްސިޑެންޓު ހިނގައިގެން ރިޕޯޓުކޮށްފައިވަނީ މާލޭ ސަރަހައްދުގައެވެ. އެގޮތުން މާލޭ ސަރަހައްދުން އެކަނި 151 އެކްސިޑެންޓު ހިނގައިގެން ރިޕޯޓުކޮށްފައިވެއެވެ.
ދެވަނައަށް އެންމެ ގިނަ އެކްސިޑެންޓު ހިނގީ އައްޑޫ ސިޓީގައެވެ. އައްޑޫއިން ނުވަ އެކްސިޑެންޓެއް ހިނގައިގެން ރިޕޯޓުކުރިއެވެ.
އެހެން ސަރަހައްދުތަކުން ފުލުހުންނަށް ރިޕޯޓުކުރި އެކްސިޑެންޓުތައް
ހދ. އަތޮޅުން، ތިން އެކްސިޑެންޓު
- ހއ. އަތޮޅާއި ގދ. އަތޮޅުގެ އިތުރުން ފުވައްމުލައް ސިޓީއިން ދެ އެކްސިޑެންޓު
- ރ. އަތޮޅާއި ބ. އަތޮޅާއި އދ. އަތޮޅުގެ އިތުރުން ދ. އަތޮޅާއި ލ. އަތޮޅާއި ގއ. އަތޮޅުން ކޮންމެ އަތޮޅަކުން އެކްސިޑެންޓެއް
ރޯދަ މަހު އެކްސިޑެންޓުތައް އާންމުކޮށް އިތުރުވެއެވެ. އެކަމަށް ސަމާލުވުމަށް ފުލުހުން އަބަދުވެސް އިލްތިމާސް ވެސް ކުރެއެވެ. މިހެންވެ މާލޭގެ ޓްރެފިކް ބާރުބޮޑުވާއިރު ފުލުހުން މިހާރު އެންމެ ބޮޑު އިސްކަމެއް ދެނީ ވެސް މާލޭގެ ޓްރެފިކް ބަލަހައްޓައި މަގުތައް އަމާން ކުރުމަށެވެ.
އެމްޓީސީސީ ބަހެއް ކޮންޓްރޯލް ނުވެގެން ގޮސް ހިނގި އެކްސިޑެންޓެއް -- ފޮޓޯ/ސޯޝަލް މީޑިއާ
މި މަހު ފުލުހުންނަަށް ރިޕޯޓުކޮށްފައިވާ އެހެން މައްސަަލަތަކަށް ބަލާއިރު، ދެވަނައަށް އެންމެ ގިނައިން ރިޕޯޓުކުރީ މަސްތުވާތަކެތީގެ މައްސަލަތަކެވެ. އެގޮތުން މާލެ ސަރަހައްދުން ރިޕޯޓުކުރި 66 މައްސަލައަކާއެކު މަސްތުވާތަކެތީގެ ޖުމުލަ 153 މައްސަލަ ފުލުހަށް ހުށަަހަޅައިފައިވެއެވެ.
އޭގެ އިތުރުން ރޯދަ މަހު ދުވާލު ކައިގެން ނުވަތަ ދުންފަތުގެ އިސްތިއުމާލުކޮށްގެން ހަތަރު މީހެއްގެ މައްސަލަ ރިޕޯޓުކޮށްފައިވެއެވެ. އަދި ބިރު ދެއްކުމުގެ 45 މައްސަލައަކާއި ޖިންސީ ފުރައްސާރައިގެ ދެ މައްސަލައަކާއި ޖިންސީ ގޯނާގެ ތިން މައްސަލައެއް ހުށަހަޅައިފައިވެއެވެ.